ការប្រកួតកង់គួួក ក្នុងព្រឹត្តិការណ៍កីឡាទោចក្រយានជើងឯកថ្នាក់ជាតិ ឆ្នាំ២០២៤ ដែលធ្វើនៅខេត្តកំពត កាលពីថ្ងៃទី២៤ ដល់ទី២៦ ខែមករា ឆ្នាំ២០២៥។ រូបថត សហព័ន្ធ
មន្រ្តីជំនាញរបស់សហព័ន្ធកីឡាទោចក្រយានកម្ពុជា អះអាងថា ការប្រកួតកីឡាទោចក្រយានជ្រើសរើសជើងឯកថ្នាក់ជាតិ ឆ្នាំ២០២៤ ដែលបានលើកយកមកធ្វើនៅខេត្តកំពត ពីថ្ងៃទី២៤ ដល់ទី២៦ ខែមករា ឆ្នាំ២០២៥នេះ ជាការប្រកួតធ្វើតេស្តយ៉ាងសំខាន់ដល់ក្រុមអត្តពលិកចូលរួមទាំងអស់ ជាពិសេសក្រុមជម្រើសជាតិទាំងប្រភេទកង់ភ្នំ និងកង់គួក ដើម្បីត្រៀមចូលរួមការប្រកួតស៊ីហ្គេម លើកទី៣៣ នៅប្រទេសថៃ នាចុងឆ្នាំនេះ។
លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានឱ្យដឹងថា ការប្រកួតជើងឯកថ្នាក់ជាតិ ឆ្នាំ២០២៤នេះ មានសមាគម/ក្លិបចូលរួមជាង២០ គឺថយចុះ១០ក្លិប បើធៀបនឹងឆ្នាំ២០២៣ ដោយសារឆ្នាំនេះ សហព័ន្ធ បានរៀបចំលើផ្លូវ ដែលមានស្ថានភាពលំបាក និងជាការប្រកួតជ្រើសរើសកីឡាករប្រមូលផ្ដុំហ្វឹកហាត់ ត្រៀមការប្រកួតកីឡាស៊ីហ្គេម ឆ្នាំ២០២៥ នៅប្រទេសថៃ។
លោកបានចាត់ទុក ការប្រកួតថ្នាក់ជាតិលើកនេះ ជាការធ្វើតេស្ដសមត្ថភាពក្រុមជម្រើសជាតិ បន្ទាប់ពីពួកគេបានប្រមូលផ្ដុំហ្វឹកហាត់ កាលពីឆ្នាំ២០២៤ ដើម្បីវាយតម្លៃសមត្ថភាពួកគេ។ ជាលទ្ធផលសហព័ន្ធ បានមើលឃើញពីការខិតខំរបស់កីឡាករ កីឡាការិនីទាំងអស់ ពិសេសការជិះឡើងភ្នំ ដែលជាការឆ្លើយតបទៅនឹងការត្រៀមប្រកួតលើស្ថានភាពផ្លូវលំបាកដូចគ្នា ក្នុងស៊ីហ្គេមចុងឆ្នាំនេះ។
លោក នូ ចំរើន បាននិយាយថា៖ «តាមរយៈការប្រកួតជើងឯកថ្នាក់ជាតិនេះ យើងឃើញថា កម្រិតសមត្ថភាព និងបច្ចេកទេសរបស់កីឡាករ កីឡាការិនីយើង មានការរីកចម្រើន ជាពិសេសកីឡាករជម្រើសជាតិ ដែលបានប្រមូលផ្ដុំហ្វឹកហាត់ កាលពីឆ្នាំ២០២៤។ ពួកគាត់មានកម្រិតបច្ចេកទេសកើនឡើងគួរឱ្យកត់សម្គាស់ ពិសេសការជិះឡើងភ្នំបូកគោ គឺពួកគាត់ធ្វើបានល្អជាងឆ្នាំមុន»។
យ៉ាងណាក៏ដោយ អគ្គលេខាធិការសហព័ន្ធកីឡាទោចក្រយានកម្ពុជា លោក នូ ចំរើន បានអះអាងថា កម្រិតសមត្ថភាព និងថិរវេលាដែលក្រុមជម្រើសជាតិទោចក្រយានកម្ពុជាធ្វើបាន នៅពេលនេះ វានៅមិនទាន់អាចឆ្លើយតប សម្រាប់ការឆ្ពោះទៅដណ្តើមយកមេដាយ នៅស៊ីហ្គេម ឆ្នាំ២០២៥ទេ ដោយសហព័ន្ធ នឹងធ្វើការបោះជំរំហ្វឹកហាត់ និងចូលរួមប្រកួតផ្សេងៗទៀត ដើម្បីពង្រឹងសមត្ថភាពក្រុមជម្រើសជាតិឱ្យបានកាន់តែល្អ។
សកម្មភាពប្រកួតកង់ភ្នំ ក្នុងព្រឹត្តិការណ៍កីឡាទោចក្រយានជើងឯកថ្នាក់ជាតិ ឆ្នាំ២០២៤ ដែលធ្វើនៅខេត្តកំពត ពីថ្ងៃទី២៤ ដល់ទី២៦ ខែមករា ឆ្នាំ២០២៥។ រូបថត សហព័ន្ធ
លោកបញ្ជាក់ថា៖ «តាមអ្វីដែលក្រុមអត្តពលិករបស់យើងធ្វើបាន ក្នុងការប្រកួតថ្នាក់ជាតិលើកនេះ គឺពួកគាត់ នៅតែរក្សាបាននូវសិទ្ធផលល្អ ប៉ុន្តែយើងមិនគិតថា វាគ្រប់គ្រាន់ សម្រាប់ការត្រៀមស៊ីហ្គេម នៅថៃនោះទេ។ យើងត្រូវពង្រឹងសមត្ថភាពរបស់ក្រុមជម្រើសជាតិយើងថែមទៀត ជាពិសេសប្រភេទកីឡាកង់ភ្នំ ដែលយើងធ្លាប់ឈ្នះបានមេដាយប្រាក់១ និងសំរឹទ្ធ១ នៅស៊ីហ្គេម ឆ្នាំ២០២៣»។
តាមគម្រោង សហព័ន្ធកីឡាទោចក្រយានកម្ពុជា នឹងបញ្ជូនក្រុមជម្រើសជាតិ ទៅចូលរួមការប្រកួត ដែលរៀបចំដោយម្ចាស់ផ្ទះថៃ ដើម្បីធ្វើឱ្យពួកគេ កាន់តែមានភាពសមទៅនឹងទីលានប្រកួតនៅប្រទេសថៃ និងមានសង្ឃឹម ក្នុងការឈានទៅដណ្តើមបានមេដាយ នៅស៊ីហ្គេម ឆ្នាំ២០២៥ ខណៈការប្រកួតស៊ីហ្គេម នៅកម្ពុជា កាលពីឆ្នាំ២០២៣ កីឡាករ ឃីម ម៉េងឡុង ជាអ្នកដណ្តើមបានមេដាយប្រាក់១ និងសំរឹទ្ធ១ លើប្រភេទកីឡាកង់ភ្នំ ជាប្រវត្តិសាស្រ្តលើកដំបូងឱ្យកម្ពុជា។
មន្រ្តី និងអ្នកពាក់ព័ន្ធ ដែលបានចូលរួួមនៅក្នុងពិធីបើកការប្រកួតងកីឡាទោចក្រយានជើងឯកថ្នាក់ជាតិ ឆ្នាំ២០២៤ ដែលធ្វើនៅខេត្តកំពត កាលពីថ្ងៃទី២៤ ដល់ទី២៦ ខែមករា ឆ្នាំ២០២៥។ រូបថត សហព័ន្ធ
ជាមួយគ្នានេះ សហព័ន្ធកីឡាទោចក្រយានកម្ពុជា ក៏បានជ្រើសរើសខេត្តកំពត ជាកន្លែងបោះជំរំហ្វឹកហាត់សម្រាប់ក្រុមជម្រើសជាតិ សម្រាប់ត្រៀមស៊ីហ្គេម ឆ្នាំ២០២៥ ខណៈការប្រកួតថ្នាក់ជាតិលើកនេះ លោក នូ ចំរើន បានកោតសរសើរទៅដល់រដ្ឋបាលខេត្តកំពតដែលបានសហការយ៉ាងល្អជាមួយសហព័ន្ធ ក៏ដូចជាដៃគូឧបត្ថម្ភ Miracle City World Group, ភេសជ្ជៈទឹកប្រទាលកន្ទុយក្រពើ Zummer និងក្រសួងអប់រំ យុវជន និងកីឡា ធ្វើឱ្យការប្រកួតថ្នាក់ជាតិនេះ បានបញ្ចប់ដោយជោគជ័យ។
ចំពោះលទ្ធផលរួម នៃការប្រកួតកីឡាទោចក្រយានជើងឯកថ្នាក់ជាតិ ឆ្នាំ២០២៤នេះ ក្រុមអត្តពលិករបស់ក្លិបក្រសួងមហាផ្ទៃ ដណ្ដើមបានមេដាយមាស ៣ ប្រាក់ ១ និងសំរឹទ្ធ ២ នៅក្នុងចំណោមការប្រកួតទាំង៨វិញ្ញាសា ដើម្បីឈរនៅចំណាត់ថ្នាក់លេខ១ តាមពីក្រោយក្លិបកង់គិរីរម្យ ឈ្នះមេដាយមាស ២ និងប្រាក់ ១ រីឯក្លិប Electro Racing ឈ្នះមេដាយមាស ១ ប្រាក់ ១ និងសំរឹទ្ធ ២ ឈរលេខ៣ ក្លិបកង់កំពត ឈ្នះមេដាយមាស ១ និងសំរឹទ្ធ ១ ឈរលេខ៤ និងក្លិប Cambodia Biking ឈរលេខ៥ ឈ្នះមេដាយមាស ១គ្រឿង៕
