លោកអាជ្ញាកណ្តាល អ៊ីវ ទីណា បានពិន័យកាតលឿងទៅឱ្យកីឡាករក្រុមភ្នំពេញក្រោន ពេលប្រកួតជាមួយក្រុមស្វាយរៀង ខណៈជំនូបនេះ លោកបានចាយកាតក្រហម២ និងកាតលឿងចំនួន៩។ រូបថត CPL
នៅទីបំផុតកំណត់ត្រាមិនស្គាល់ការចាញ់សោះ របស់ក្រុមភ្នំពេញក្រោន ត្រូវបានបំផ្លាញដោយក្រុមព្រះខ័នរាជស្វាយរៀង ស្របពេលពួកគេ នៅសល់សមាជិកត្រឹម១០នាក់ នៅលើទីលាន ខណៈជំនួបរវាងក្រុមទាំង២នេះ មានការប៉ះទង្គិចគ្នាខ្លាំង នាំឱ្យលោកអាជ្ញាកណ្តាល អ៊ីវ ទីណា បានពិន័យកាតចំនួន១១សន្លឹក គឺកាតក្រហម២ និងកាតលឿងចំនួន៩ ទៅដល់ក្រុមទាំង២នេះ។
គ្រូបង្គោលក្រុមព្រះខ័នរាជស្វាយរៀង លោក Pep Munoz បានបង្ហាញការសាទរខ្លាំង ចំពោះការដណ្តើមបាន៣ពិន្ទុដ៏មានន័យ ពីក្រុមភ្នំពេញក្រោន សម្រាប់ការប្រកួតក្នុងទឹកដីខ្លួនឯង តាមរយៈការយកឈ្នះ ៣-១ នៅកីឡដ្ឋានខេត្តស្វាយរៀង កាលពីយប់ថ្ងៃអាទិត្យ ព្រោះលទ្ធផល បានធ្វើឱ្យគម្លាតពិន្ទុរវាងក្រុមទាំង២ខុសគ្នាតែ១ពិន្ទុទេ គឺភ្នំពេញក្រោន បន្តឈរនៅលេខ១ មាន៤៤ពិន្ទុ និងស្វាយរៀង ឈរនៅលេខ២ មាន៤៣ពិន្ទុ។
លោក Pep Munoz បាននិយាយក្រោយការប្រកួតថា៖ «យើងសប្បាយចិត្ត សម្រាប់ការប្រកួតថ្ងៃនេះ ដោយនៅក្នុងរយៈពេល២៥នាទី ក្នុងតង់ទី១ យើងធ្វើបានល្អមែនទែន គឺយើងមានឱកាសច្រើន ក្នុងការទាត់បញ្ចូលទី ប៉ុន្តែយើងដឹងហើយថា គុណភាពកីឡាកររបស់ភ្នំពេញក្រោន ល្អ។ ពួកគេបានដាក់សម្ពាធមកលើយើង និងបង្កើតឱកាសរកបានគ្រាប់បាល់តាមស្មើ នៅចុងតង់ទី១វិញ»។
ចំណែកការប្រកួតនៅតង់ទី២ លោក Pep បានអះអាងថា កូនក្រុមរបស់លោកធ្វើបានល្អ ដោយពួកគេមានការយល់កាន់ច្រើនពីរបៀបលេងរបស់លោក ហើយគួរតែទាត់បាល់បញ្ចូលទីបានច្រើនជាងហ្នឹងទៀត ក្រោយពេលកីឡាកររបស់ក្រុមភ្នំពេញក្រោន ទទួលបានកាតក្រហម នៅនាទីទី៥៥ និងបន្ទាប់ពីខ្សែប្រយុទ្ធទើបជាពីរបួស Pablo Agusto បានស៊ុតបាល់ពិន័យ១១ម៉ែត្រ បានស្រេចនៅនាទីទី ៩០+២ ក្នុងការបន្ថែមម៉ោងចំនួន៨នាទី។
គ្រូបង្វឹកសញ្ជាតិអេស្ប៉ាញ លោក Pep Munoz បានបញ្ជាក់ថា៖ «បន្ទាប់ពីបាល់ប៉េណាល់ទីហើយ យើងគួរតែរកបានគ្រាប់បាល់បន្ថែមទៀត ហើយយើងសប្បាយចិត្តដែល Pablo បានវិលត្រឡប់មកចូលរួមជាមួយក្រុមវិញ គឺយើងសប្បាយចិត្តមែនទែន ជាពិសេសយើងសប្បាយចិត្តជាមួយអ្នកគាំទ្ររបស់យើង»។
តាមរយៈការប្រកួតយ៉ាងស្វិតស្វាញ និងក្តៅគគុក កាលពីយប់ថ្ងៃអាទិត្យនោះ ខ្សែប្រយុទ្ធ ញាណ សុស៊ីដាន ជាអ្នកស៊ុតគ្រាប់បាល់នាំមុខឱ្យក្រុមម្ចាស់ផ្ទះ ព្រះខ័នរាជស្វាយរៀង នៅនាទីទី៥ ប៉ុន្តែខ្សែប្រយុទ្ធ Jelle Joost Goselink ស៊ុតតាមស្មើឱ្យក្រុមភ្នំពេញក្រោន វិញ នៅនាទីទី៣៦។
ការប្រកួតរវាងក្រុមភ្នំពេញក្រោន (ក្រហម) និងក្រុមព្រះខ័នរាជស្វាយរៀង កាលពីថ្ងៃអាទិត្យ ដោយភ្នំពេញក្រោន ចាញ់ជាលើកដំបូង ក្រោយសល់សមាជិកត្រឹម១០នាក់។ រូបថត ភ្នំពេញក្រោន
យ៉ាងណាក៏ដោយ ភាពក្តៅក្រហាយរបស់ក្រុមភ្នំពេញក្រោន បានកើតមានឡើង នៅពេលលោកអាជ្ញាកណ្តាលលោក អ៊ីវ ទីណា បានសម្រេចផ្តល់កាតក្រហមទៅឱ្យខ្សែការពារ យ៉ើ មូស្លីម នៅនាទីទី៥៥ បន្ទាប់ពីរូបគេបានជ្រុលរុញកីឡាករ ថេឡរ ឌឿន នីកូឡាស ឱ្យដួលនៅក្បែរគំនូសស។
ជាមួយការនៅសល់សមាជិកត្រឹម១០នាក់នៅលើទីលាននេះ បានធ្វើឱ្យ ភ្នំពេញក្រោន រងសម្ពាធខ្លាំងពីការវាយលុករបស់ក្រុមស្វាយរៀង ហើយអ្វីៗកាន់តែពិបាក នៅពេលខ្សែប្រយុទ្ធ Gabriel Silva Costa រកបានគ្រាប់បាល់ទី២ ឱ្យក្រុមម្ចាស់ផ្ទះ នៅនាទីទី៧១ ខណៈជំនួយការគ្រូបង្វឹករបស់ក្រុមភ្នំពេញក្រោន គឺលោក Anatolii Bondarenko ក៏ត្រូវបានអាជ្ញាកណ្តាលពិន័យកាតក្រហម នៅនាទីទី៧៥ទៅទៀត។
បន្ថែមលើនេះ លោកអាជ្ញាកណ្តាល អ៊ីវ ទីណា បានសម្រេចផ្តល់បាល់ពិន័យ១១ម៉ែត្រ ទៅឱ្យក្រុមស្វាយរៀង នៅនាទីទី៩០+២ បន្ទាប់ពីប្រធានក្រុម អ៊ន ចាន់ប៉ូលីន បានបុកឱ្យខ្សែប្រយុទ្ធ Cristian Roque ដួលនៅក្នុងតំបន់គ្រោះថ្នាក់នោះ។ ខ្សែប្រយុទ្ធទើបជាពីរបួស Pablo Agusto ជាអ្នកស៊ុតបាល់ពិន័យនោះ បានសម្រេច។
លោក Pep Munoz ពេលប្រតិកម្មតវ៉ាជាមួយអាជ្ញាកណ្តាល ពេលលោកដឹកនាំក្រុមស្វាយរៀង យកឈ្នះក្រុមភ្នំពេញក្រោន ៣-១ នៅកីឡដ្ឋានខេត្តស្វាយរៀង។ រូបថត CPL
នៅនាទីទី ៩០+៤ ខ្សែប្រយុទ្ធទើបដាក់ឱ្យចូលលេង មិន រតនៈ បានស៊ុតបញ្ចូលទីឱ្យក្រុមស្វាយរៀង១គ្រាប់តែ ប៉ុន្តែត្រូវបានបដិសេធដោយអាជ្ញាកណ្តាល ដោយសម្អាងថា ជាបាល់អកហ្ស៊ឺ ខណៈជំនួបនេះ មានការប៉ះទង្គិចគ្នាខ្លាំង នាំឱ្យលោកអាជ្ញាកណ្តាល អ៊ីវ ទីណា ពិន័យកាតចំនួន១១សន្លឹក គឺកាតក្រហម២ និងកាតលឿង៦ ទៅឱ្យក្រុមភ្នំពេញក្រោន និងកាតលឿងចំនួន៣ទៀត ទៅលើកីឡាករក្រុមស្វាយរៀង។
ជុំវិញការកាត់សេចក្តីនេះ លោក Pep Munoz បាននិយាយថា៖ «សម្រាប់មន្រ្តីអាជ្ញាកណ្តាលថ្ងៃនេះ គាត់ធ្វើបានល្អ ក្នុងការគ្រប់គ្រងការប្រកួតមួយដែលល្អ ហើយវាក៏ពិបាកដែរ ក្នុងការសម្រេចចិត្ត ចំពោះការប្រកួតបែបនេះ ហើយបើសិនជាមានជំនួយការអាជ្ញាកណ្តាល បានជួយដល់គាត់ ក្នុងការសម្រេចចិត្តមួយចំនួនទៀត ប្រហែលជាប្រសើរជាងហ្នឹង»។
ការលើកឡើងបែបនេះ ព្រោះលោក Pep បានមើលឃើញថា ការកាត់សេចក្តីមួយចំនួនរបស់ក្រុមន្រ្តីអាជ្ញាកណ្តាល នៅមានការខ្វះខាតដែរ ធ្វើឱ្យក្រុមស្វាយរៀង ខាតបង់ដូចគ្នា ហើយចំពោះសកម្មភាពរបស់ អ៊ន ចាន់ប៉ូលីន ដែលរត់ទៅបុក Cristian Roque ឱ្យដួល គួរតែត្រូវបានបណ្តេញចេញ ដោយការពិន័យកាតលឿងជាលើកទី២ ព្រោះ ចាន់ប៉ូលីន ទទួលកាតលឿងនៅនាទីទី៦០ម្តងហើយ។
លោកបានសង្កត់ធ្ងន់ថា៖ «នៅតង់ទី២ អាជ្ញាកណ្តាលបានលើកទង់អកហ្ស៊ឺ២ទៅ៣បាល់ទាំងបាល់អត់អកហ្ស៊ឺទេ ជាពិសេសគ្រាប់បាល់ស៊ុតបញ្ចូលទីរបស់ មិន រតនៈ គឺអត់អកស្ស៊ឺឡើយ ហើយចំពោះ ចាន់ប៉ូលីន គួរតែទទួលបានកាតលឿងទី២ ស្មើនឹងកាតក្រហម»។ លោកបន្ថែមថា៖«ឱ្យបាល់ប៉េណាល់ទីជារឿងមួយហើយ តែត្រង់នេះជាកំហុសកាតលឿង ឬកាតក្រហមទៀត ប៉ុន្តែអាជ្ញាកណ្តាល មិនពិន័យកាតទេ។ នេះគ្រាន់តែកំហុស១ទៅ២ចំណុចទេ តែជារួមគាត់ធ្វើបានល្អហើយ»៕
