ក្រុមនារីខេត្តពោធិ៍សាត់ និងក្រុមបុរសរបស់វិសាខា ពេលឡើងទទួលមេដាយមាស និងពានរង្វាន់លេខ១ ពីការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥។ រូបថត សហព័ន្ធ
ក្រុមកីឡាការិនីខេត្តពោធិ៍សាត់ បានក្លាយជាក្រុមបាល់ទះនារីដំបូងគេ ដែលបានឈ្នះពានពីការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥ ប៉ុន្តែក្រុមបុរសរបស់ក្រសួងមហាផ្ទៃ នៅតែបន្តជួបការខកចិត្ត ខណៈពួកគេមិនអាចរក្សាឱកាសដណ្តើមយកពានពីក្រុមវិសាខា បាននោះ។
តាមរយៈការប្រកួតផ្តាច់ព្រ័ត្រ ដែលធ្វើនៅវិមានពហុកីឡដ្ឋានជាតិអូឡាំពិក កាលពីព្រលប់ថ្ងៃអាទិត្យ ក្រុមក្រសួងមហាផ្ទៃ បានយកឈ្នះលើក្រុមវិសាខា ចំនួន២សិតមុន ជាមួយពិន្ទុ ២៥-២០ និង ៣៤-៣២ ប៉ុន្តែក្រុមវិសាខា បានវាយបកយកឈ្នះ៣សិតវិញ ជាមួយពិន្ទុ ២៥-២៣ ២៥-២០ និង ១៥-១២ ដើម្បីលើកពានយ៉ាងរំភើបបំផុត រីឯក្រុមស្នងការដ្ឋាននគរបាលរាជធានីភ្នំពេញ បានយកឈ្នះក្រុមបញ្ជាការដ្ឋានអង្គរក្ស ៣-០ ដើម្បីទទួលបានលេខ៣។
ចំពោះការចាញ់ក្រុមវិសាខា ៣-២ នេះ បានធ្វើឱ្យក្រុមក្រសួងមហាផ្ទៃ ជួបការខកចិត្តជាមួយថ្មីម្តងទៀត គឺដូចគ្នាទៅនឹងការប្រកួតផ្តាច់ព្រ័ត្រ ដណ្តើមពានរង្វាន់សម្តេចក្រឡាហោម ស ខេង ឆ្នាំ២០២៤ កាលពីថ្ងៃទី២៣ ខែធ្នូដែរ ដោយកាលនោះ ក្រុមក្រសួងមហាផ្ទៃ បានយកឈ្នះក្រុមស្នងការនគរបាលខេត្តស្វាយរៀង ចំនួន២សិតមុន តែបានចាញ់៣សិតវិញ ធ្វើឱ្យពួកគេ បានត្រឹមស្រក់ទឹកភ្នែកទទួលយកចំណាត់ថ្នាក់លេខ២។
សម្រាប់ការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥នេះ ក៏មានការដាក់ឱ្យប្រកួតលើវិញ្ញាសាបាល់ទះនារី ជាលើកដំបូងផងដែរ ហើយជាលទ្ធផលក្រុមកីឡាការិនីខេត្តពោធិ៍សាត់ បានក្លាយជាម្ចាស់ជើងឯក បន្ទាប់ពីពួកគេបានយកឈ្នះក្រុមខេត្តកណ្ដាល ដោយលទ្ធផល ៣-១ រីឯក្រុមនារីរាជធានីភ្នំពេញ បានយកឈ្នះក្រុមក្រសួងមហាផ្ទៃ ៣-០ ដើម្បីទទួលបានលេខ៣ សម្រាប់ការប្រកួត ដែលមាន៨ក្រុមចូលរួមនេះ។
ជុំវិញការដាក់ឱ្យមានការប្រកួតផ្នែកនារី ក្នុងពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥ ជាលើកដំបូងនេះ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានអះអាងថា វាជាផែនការយុទ្ធសាស្រ្តរបស់សហព័ន្ធ ដែលត្រូវចាប់ផ្តើមបំផុសបាល់ទះនារី ចាប់ពីឆ្នាំនេះទៅ តាមរយៈការដាក់ឱ្យមានវិញ្ញាសាបាល់ទះនារី នៅក្នុងព្រឹត្តិការណ៍បាល់ទះផ្នែកបុរស ដើម្បីឱ្យក្រុមបាល់ទះនាទីកម្ពុជា អាចមានលទ្ធផល ទៅប្រកួតប្រជែងថ្នាក់តំបន់បាន។
លោក សិរីពិសិដ្ឋ មានការភ្ញាក់ផ្អើល ដែលវិញ្ញាសាបាល់ទះនារី ទទួលបានការគាំទ្រខ្លាំង សម្រាប់ការប្រកួតលើកនេះ។ លោកថ្លែងថា៖ «គ្មាននរណានឹកស្មានដល់ថា បាល់ទះនារីយើង ទទួលបានការគាំទ្រខ្លាំងបែបនេះទេ ចំណែកក្រុមអត្តពលិកជានារីរបស់យើង បានប្រាប់ខ្ញុំថា នេះជាលើកដំបូងហើយ ដែលអាជីពបាល់ទះរបស់គាត់ មានអ្នកគាំទ្រពេញស្តាត ហើយសកម្មភាពនេះ ជាចលកជំរុញឱ្យពួកគាត់មកចូលរួមប្រកួតនៅឆ្នាំក្រោយៗទៀត»។
ការប្រកួតផ្តាច់ព្រ័ត្ររវាងក្រុមវិសាខា (ពណ៌ខៀវ) និងក្រុមក្រសួងមហាផ្ទៃ នៅវិមានពហុកីឡដ្ឋានជាតិអូឡាំពិក កាលពីថ្ងៃអាទិត្យ។ រូបថត សហព័ន្ធ
តាមរយៈការទទួលបានជោគជ័យ សម្រាប់ការដាក់ឱ្យមានវិញ្ញាសាបាល់ទះនារីនេះ លោក អាំង សិរីពិសិដ្ឋ បានបញ្ជាក់ថា៖ «ខ្ញុំជឿជាក់ថា ចាប់ពីពេលនេះទៅ វិញ្ញាសាបាល់ទះនារីរបស់យើង នឹងងើបឡើងវិញ ហើយសម្រាប់ទិសដៅទៅថ្ងៃអនាគត គឺយើងចង់ឃើញក្រុមបាល់ទះនារីយើង អាចទៅប្រកួតប្រជែងជាមួយប្រទេសជិតខាងរបស់យើងបាន នៅថ្ងៃណាមួយ»។
តែទោះបីជាយ៉ាងណា លោក សិរីពិសិដ្ឋ បានទម្លាយថា ការអភិវឌ្ឍកីឡាបាល់ទះនារីកម្ពុជា ត្រូវការការវិនិយោគរយៈពេលវែង គឺដូចគ្នាទៅនឹងការអភិវឌ្ឍក្រុមបាល់ទះបុរសដែរ ដែលលោក ស សុខា ប្រធានសហព័ន្ធកីឡាបាល់ទះកម្ពុជា និងភរិយា បានបណ្តាក់ទុន ក្នុងការបណ្តុះធានធានកីឡាករ នៅក្នុងក្រុមវិសាខា តាំងពីឆ្នាំ២០១២ ហើយរហូតដល់ឆ្នាំ២០២១ ទើបកីឡាករភាគច្រើនរបស់វិសាខា ដណ្តើមបានមេដាយសំរឹទ្ធស៊ីហ្គេម ជាប្រវត្តិសាស្រ្តលើកដំបូង ក្នុងនាមជាក្រុមជម្រើសជាតិកម្ពុជា និងបន្តឈ្នះបានមេដាយប្រាក់ ពេលស៊ីហ្គេម លើកទី៣២ ឆ្នាំ២០២៣ នៅកម្ពុជា។
ការប្រកួតផ្តាច់ព្រ័ត្ររវាងក្រុមនារីខេត្តពោធិ៍សាត់ និងក្រុមខេត្តកណ្តាល ក្នុងការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥។ រូបថត សហព័ន្ធ
លោក អាំង សិរីពិសិដ្ឋ បានបញ្ជាក់ថា៖ «ការវិនិយោគទៅលើក្រុមអត្តពលិកផ្នែកនារីនេះ មិនមែនជារឿងសាមញ្ញនោះទេ គឺយ៉ាងហោចណាស់ក៏ពី៥ទៅ១០ឆ្នាំ ទើបបានលទ្ធផល។ វាប្រៀបដូចឯកឧត្តមអភិសន្តិបណ្ឌិត ស សុខា និងលោកជំទាវ ដែលបានបណ្តាក់ទុនលើវិស័យបាល់ទះផ្នែកបុរសតាំងពីឆ្នាំ២០១២ ហើយ១០ឆ្នាំក្រោយមក ទើបយើងទទួលបានលទ្ធផល»។
«ចំណែកក្រុមនារីក៏ដូចគ្នានេះដែរ គឺបើសិនជាបងប្អូនជនរួមជាតិ នៅតែបន្តគាំទ្រខ្លាំងបែបនេះ ខ្ញុំគិតថា វាអាចលឿនជាងនេះ គឺមិនដល់១០ឆ្នាំទេ យើងនឹងមានកីឡាការិនីល្អៗ អាចប្រកួតប្រជែងជាមួយគេបាន»។ អគ្គលេខាធិការសហព័ន្ធកីឡាបាល់ទះកម្ពុជារូបនេះ លោក អាំង សិរីពិសិដ្ឋ បានបន្ថែម៕
