ការប្រកួតរវាងក្រុមភ្នំពេញក្រោន (ពណ៌បៃតង) និងក្រុមម្ចាស់ផ្ទះអង្គរថាយហ្គឺរ ដោយក្រុមទាំង២នេះ បានស្មើគ្នា ១-១។ រូបថត CPL
ការព្យាយាមរក្សាទីតាំងកំពូលតារាងនៃលីគកំពូលកម្ពុជា របស់ក្រុមភ្នំពេញក្រោន តាំងពីសប្តាហ៍ទី៤មកនោះ ត្រូវបានបញ្ចប់ត្រឹមសប្តាហ៍ទី២១ ដោយទីតាំងលេខ១នេះ បានធ្លាក់ទៅលើកណ្តាប់ដៃក្រុមព្រះខ័នរាជស្វាយរៀង វិញម្តង ហើយវាក៏ជាលទ្ធផលធ្វើឱ្យ ភ្នំពេញក្រោន ត្រូវដេញតាមពីក្រោយក្រុមស្វាយរៀងវិញ ដើម្បីប្រជែងគ្នាយកពាន នៅរដូវកាលនេះផងដែរ។
ការបាត់បង់ទីតាំងកំពូលតារាងរបស់ក្រុមភ្នំពេញក្រោន បានកើតឡើងកាលពីថ្ងៃអាទិត្យ គឺបន្ទាប់ពីពួកគេ បានត្រឹមស្មើ ១-១ ជាមួយក្រុមម្ចាស់ផ្ទះ អង្គរថាយហ្គឺរ ស្របពេលក្រុមព្រះខ័នរាជស្វាយរៀង ដណ្តើមបាន៣ពិន្ទុបន្ថែម តាមរយៈការយកឈ្នះលើក្រុមឡាយហ្វខេត្តព្រះសីហនុ (Life FC) ដោយលទ្ធផល ៣-១ នោះ។
លោក Pep Munoz បានសម្តែងការរីករាយខ្លាំង ចំពោះការដណ្តើមបាន៣ពិន្ទុដ៏មានន័យពីក្រុមឡាយហ្វខេត្តព្រះសីហនុ លើកនេះ ដែលបានជួយឱ្យក្រុមព្រះខ័នរាជស្វាយរៀងរបស់លោក មាន១ពិន្ទុលើសក្រុមភ្នំពេញក្រោនវិញ គឺ៤៩ទល់នឹង៤៨ពិន្ទុ ហើយជាលទ្ធផល ដែលធ្វើឱ្យគ្រប់គ្នាមានការភ្ញាក់ផ្អើលខ្លាំង និងកោតសរសើរដល់ក្រុមស្វាយរៀង ដែលបានតាមប្រជែងភ្នំពេញក្រោន តាំងពីមានគម្លាតពិន្ទុដាច់ពីគ្នា៦ពិន្ទុ រហូតមានពិន្ទុនាំមុខវិញនាពេលនេះ។
លោក Pep Munoz បាននិយាយ ក្រោយយកឈ្នះក្រុម Life FC បែបនេះថា៖ «នេះជាការប្រកួតដ៏ល្អមួយ ជាពិសេសនៅរយៈពេល១៥នាទីដំបូង យើងពិតជាធ្វើបានល្អមែនទែន ហើយគួរតែរកបាន១ទៅ២គ្រាប់បន្ថែមទៀត តែយើងបែរជារបូត១គ្រាប់វិញ ដោយសារកំហុសរបស់យើង ដែលទាត់បាល់ផ្តាច់ចេញទៅក្រៅមិនបាន»។
គ្រូបង្គោលក្រុមស្វាយរៀងរូបនេះ បានបន្ថែមថា៖ «យើងឃើញហើយថា Life ជាក្រុមធ្វើការខ្លាំង និងដាក់សម្ពាធខ្លាំងរាល់ការប្រកួត ហើយខ្ញុំចង់អបអរដល់ពួកគាត់ត្រង់ចំណុចនេះដែរ ហេតុនេះបើសិនជាយើងមិនអាចបញ្ចប់ទីបានសម្រេចទេ ពិតណាស់យើងនឹងជួបបញ្ហា នៅក្នុងការប្រកួតនេះ»។
តាមរយៈការប្រកួតកាលពីថ្ងៃអាទិត្យនោះ កីឡាករឡាវ Bounphachan Bounkong រកបានគ្រាប់បាល់នាំមុខឱ្យក្រុមស្វាយរៀង នៅនាទីទី១៣ ប៉ុន្តែ អ៊ុក ដេវីន បានអូសបាល់រំលងខ្សែការពារទាំង២នាក់របស់ស្វាយរៀង ទាំងត្រដាបត្រដួស ដើម្បីស៊ុតបញ្ចូលទី ជួយឱ្យក្រុម Life FC តាមស្មើនៅនាទីទី១៦ វិញ។
យ៉ាងណាក៏ដោយ ការបង្កកំហុសរបស់អ្នកចាំទី Georgino Dasilva ដែលធ្វើឱ្យ Bounphachan Bounkong ដួលនៅក្នុងប្រអប់ទីនោះ នាំឱ្យអាជ្ញាកណ្តាលផ្តល់បាល់ពិន័យ១១ម៉ែត្រទៅឱ្យក្រុមស្វាយរៀង នៅនាទីទី៣៦ តែខ្សែការពារជាប្រធានក្រុម Takashi Odawara ស៊ុតមិនផុតដៃអ្នកចាំទី Georgino Dasilva។
តែទោះយ៉ាងណា នៅក្នុងតង់ទី២ Bounphachan Bounkong ស៊ុតបានគ្រាប់ទី២របស់ខ្លួន នាទីទី៤៨ ហើយខ្សែប្រយុទ្ធ ញាណ ស៊ុស៊ីដាន បានទាត់បាល់ហ្រ្វីឃីកបញ្ចូលទី១គ្រាប់ទៀត នៅនាទីទី៨០ ដើម្បីជួយឱ្យក្រុមស្វាយរៀង ឈ្នះក្រុម Life FC ៣-១។
ចំណែកការជួបគ្នារវាងក្រុមម្ចាស់ផ្ទះអង្គរថាយហ្គឺរ និងភ្នំពេញក្រោន បានក្លាយជាការប្រកួតដ៏ស្វិតស្វាញបំផុត ដោយក្រុមទាំង២នេះ មានឱកាសច្រើនដូចគ្នា ប៉ុន្តែរកបានត្រឹមម្នាក់១គ្រាប់ទេ ដោយក្នុងនោះខ្សែប្រយុទ្ធហូឡង់ Jelle Joost Goselink រកបានគ្រាប់បាល់នាំមុខឱ្យភ្នំពេញក្រោន នៅនាទីទី១៩ ប៉ុន្តែការបង្កកំហុសរបស់អ្នកចាំទី សាវែង សំណាង នាំឱ្យអាជ្ញាកណ្តាលផ្តល់បាល់ពិន័យឱ្យក្រុមអង្គរថាយហ្គឺរ ហើយកីឡាករជប៉ុន Nagashima ជាអ្នកធ្វើបានសម្រេចនៅនាទីទី៦០។
ការដណ្តើមបានត្រឹម១ពិន្ទុនេះ បានធ្វើឱ្យក្រុមភ្នំពេញក្រោន បាត់បង់ទីតាំងកំពូលតារាងរបស់ខ្លួន ដោយធ្លាក់ទៅឈរនៅលេខរៀងទី២វិញ ហើយក្រុមស្វាយរៀង ឡើងមកឈរនៅលេខ១ មាន៤៩ពិន្ទុលើសភ្នំពេញក្រោន១ពិន្ទុវិញ (៤៨ពិន្ទុ) ហើយតាមពីក្រោយក្រុមវិសាខា ដែលមាន៤១ពិន្ទុ និងក្រុមអង្គរថាយហ្គឺរ មាន៣៤ពិន្ទុ សម្រាប់ការប្រកួតចំនួន១៩លើកដូចគ្នា។
ចំណែកក្រុមណាហ្គាវើលដ៍ បានយកឈ្នះក្រុមម្ចាស់ផ្ទះក្រសួងមហាផ្ទៃ ២-១ កាលពីថ្ងៃអាទិត្យនោះដែរ ដើម្បីឈរនៅលេខ៥ មាន៣៣ពិន្ទុ ហើយក្រុមបឹងកេត បានលត់ក្រុម ISI ដង្កោសែនជ័យ រហូតដល់ ៨-១ សម្រាប់ការប្រកួតប្រជែងគ្នាយកតំបន់កំពូលតារាងទាំង៦ (Top6) កាលពីថ្ងៃសៅរ៍។
មានន័យថា បឹងកេត មានសុវត្ថិភាពហើយ សម្រាប់ការរក្សាទីតាំងលេងនៅ Top6 តែក្រុមមាន២៤ពិន្ទុ ISI ត្រូវធ្លាក់ទៅលេងនៅក្រុមចំណាត់ថ្នាក់ក្រោមគេទាំង៥ (Bottom5)៕
