កីឡាករ Praful និង សួន ចាន់ណារ៉ូ របស់ក្រុមស្វាយរៀង បានព្យាយាមលោតបាំងការគប់បាល់របស់ស្មាត់ធំ គួន មុំ របស់ក្រុមវិសាខា។ រូបថត សហព័ន្ធ
ក្រុមស្នងការនគរបាលខេត្តស្វាយរៀង បាននឹងកំពុងធ្វើព្យុះភ្លៀង នៅក្នុងការប្រកួតកីឡាបាល់ទះ «តេជោលីគ» រដូវកាលទី២ ឆ្នាំ២០២៥ តាមរយៈការការដណ្តើមបានជ័យជម្នះលើក្រុមខ្លាំងៗ ដើម្បីឈរនៅកំពូលតារាង ក្នុងជុំទី២ ជាបណ្តោះអាសន្ន។
បើទោះបីជាក្រុមស្វាយរៀង បានត្រឹមចំណាត់ថ្នាក់លេខ៥ សម្រាប់ការប្រកួតជុំទី១ ដែលមាន៨ក្រុម ដោយការឈ្នះ៣ និងចាញ់ដល់៤ប្រកួត ប៉ុន្តែក្រុមមួយនេះ បែរជាអាចកែប្រែស្ថានភាពលេងបានយ៉ាងល្អបំផុត នៅក្នុងការប្រកួតជុំទី២នេះ ដោយពួកគេបានយកឈ្នះក្រុមការពារតំណែងជើងឯក បញ្ជាការដ្ឋានអង្គរក្ស ក្រុមជើងឯករង វិសាខា និងក្រុមកងពលធំអន្តរាគមន៍លេខ៣ ដោយលទ្ធផល៣សិតដាច់ (៣-០) ដូចគ្នា។
ចំពោះកម្រិតលេងរបស់ក្រុមខេត្តស្វាយរៀង នៅពេលនេះ គឺមានភាពល្អប្រសើរខ្លាំងជាងការប្រកួតជុំទី១ ហើយអ្វីដែលគេចាប់អារម្មណ៍បំផុតនោះ គឺវត្តមានកីឡាករឥណ្ឌា R.Ashwal និង S.Praful ដោយអ្នកទាំង២នេះ មានគុណភាពទាំងការវាយប្រយុទ្ធ និងការធ្វើជារនាំង។
ម្ចាស់អាវលេខ១១ R.Ashwal និងម្ចាស់អាវលេខ៧ S.Praful បាននឹងកំពុងបង្ហាញពីគុណភាពលេងយ៉ាងល្អបំផុត ក្នុងការប្រកួតតេជោលីគ ក្នុងជុំទី២នេះ ជាពិសេស R.Ashwal ព្រោះការយកឈ្នះក្រុមបញ្ជាការដ្ឋានអង្គរក្ស ក្រុមកងពលធំអន្តរាគមន៍លេខ៣ និងក្រុមវិសាខា កន្លងមកនេះ ស្មាត់ធំរបស់ឥណ្ឌាម្នាក់នេះ បានជាប់ឈ្មោះជាកីឡាករល្អប្រចាំការប្រកួតទាំង៣នេះតែម្តង។
តារាងចំណាត់ថ្នាក់ការប្រកួតជុំទី២ នៃការប្រកួតបាល់ទះ «តេជោលីគ» រដូវកាលទី២ ឆ្នាំ២០២៥។
ចំណែកកីឡាកររបស់គុយបា Herrera Cabrera ក៏ជាផ្នែកមួយយ៉ាងសំខាន់ ក្នុងការជួយឱ្យក្រុមខេត្តស្វាយរៀង ទទួលបានជ័យជម្នះ៣លើកជាប់ៗគ្នានេះផងដែរ គឺកីឡាករបរទេសទាំង៣នេះ កំពុងបង្កើតឱ្យមានការភ្ញាក់ផ្អើលខ្លាំង ក្នុងការលើកកម្ពស់គុណភាពលេងរបស់ក្រុមខេត្តស្វាយរៀ ឱ្យត្រដែតលើគេ ក្រោមការលើកបាល់យ៉ាងស្ទាត់ជំនាញរបស់អតីតអ្នកលើកបាល់ដៃទី១នៃក្រុមជម្រើសជាតិ សួន ចាន់ណារ៉ូ។
យ៉ាងណាក៏ដោយ អតីតអ្នកលើកបាល់ដៃទី១របស់ក្រុមវិសាខា សួន ចាន់ណារ៉ូ បានអះអាងថា រូបគេផ្ទាល់ និងមិត្តរួមក្រុមផ្សេងទៀត ហាក់នៅមិនទាន់អាចសម្របការលេងឱ្យបានល្អ១០០ភាគរយ ជាមួយស្មាត់ធំមកពីឥណ្ឌា R.Ashwal និង S.Praful នៅឡើយទេ ព្រោះទើបតែបានលេងជាមួយគ្នា៥ទៅ៦ប្រកួត នៅតេជោលីគនេះទេ ហេតុនេះត្រូវតែពង្រឹងគុណភាពលេងជាក្រុមបន្ថែមទៀត។
សួន ចាន់ណារ៉ូ បានប្រាប់ប្រព័ន្ធផ្សព្វផ្សាយបែបនេះថា៖ «ពួកគាត់ (Ashwal និង Praful) ជាកីឡាករលំដាប់ខ្ពស់នៅប៉ែកអាស៊ី ដែលធ្លាប់លេងឱ្យក្រុមជម្រើសជាតិ។
ពួកគាត់មានគុណផលល្អ ប៉ុន្តែសម្រាប់យើងនៅមិនទាន់អាចសម្របការលេងឱ្យត្រូវជាមួយគាត់ប៉ុន្មានទេ អ៊ីចឹងយើងនឹងប្រឹងប្រែងសម្របការលេងបន្ថែមទៀត ដើម្បីឱ្យក្រុមយើងលេងកាន់តែបានល្អ»។
ការប្រកួតរវាងក្រុមបញ្ជាការដ្ឋានអង្គរក្ស (ពណ៌ក្រហម) និងក្រុមក្រសួងមហាផ្ទៃ នៅវិមានពហុកីឡដ្ឋានជាតិអូឡាំពិក កាលពីថ្ងៃអាទិត្យ។ រូបថត សហព័ន្ធ
ចំណែកក្រុមក្រសួងមហាផ្ទៃ ដែលទទួលបានលេខ១ ក្នុងការប្រកួតជុំទី១នោះ ក៏នៅតែរក្សាភាពខ្លាំងរបស់ខ្លួន ដោយពួកគេបានឈ្នះទាំង៣ប្រកួត នៅជុំទី៣នេះ គឺការយកឈ្នះក្រុមកងពលធំអន្តរាគមន៍លេខ៣ ដោយលទ្ធផល ៣-១ ហើយឈ្នះក្រុមបញ្ជការដ្ឋានអង្គរក្ស និងក្រុមស្នងការនគរបាលរាជធានីភ្នំពេញ ៣-០ ដូចគ្នា។
លទ្ធផលនេះបានជួយឱ្យក្រុមក្រសួងមហាផ្ទៃ ឈរនៅលេខ២ជាបណ្តោះអាសន្ន ដោយមាន៩ពិន្ទុស្មើជាមួយក្រុមខេត្តស្វាយរៀង ហើយក្រុមទាំង២នេះ បានឈ្នះកៅអីឡើងទៅប្រកួតវគ្គខ្វែង៤ក្រុមចុងក្រោយដោយស្វ័យប្រវត្តិហើយ បើទោះបីជាការប្រកួតវិលជុំសន្សំពិន្ទុក្នុងជុំទី២នេះ នៅសល់២ប្រកួតទៀត។
ដោយឡែកក្រុមស្នងការនគរបាលរាជធានីភ្នំពេញ បានឈ្នះ២ និងចាញ់១ប្រកួត កំពុងឈរនៅលេខ៣ មាន៦ពិន្ទុ រីឯក្រុមការពារតំណែងជើងឯក បញ្ជាការដ្ឋានអង្គររក្ស ធ្វើមិនសូវបានល្អទេ សម្រាប់ការប្រកួតជុំទី២នេះ ដោយ៣ប្រកួតមកនេះ បានឈ្នះ១ និងចាញ់២ប្រកួត កំពុងឈរនៅលេខ៤មាន៣ពិន្ទុ ប៉ុន្តែប្រសើរជាងក្រុមធ្លាប់មានគុណភាពលេងល្អផ្តាច់គេ វិសាខា ដែលកំពុងឈរនៅតំបន់កាត់ចោលជាមួយក្រុមកងពលធំអន្តរាគមន៍លេខ៣ ដោយបានចាញ់ទាំង៣ប្រកួតដូចគ្នា៕
