ក្រុមអ្នកជិះកង់មកពី៩រាជធានី-ខេត្ត បានចុះឈ្មោះជាមួយសហព័ន្ធកីឡាទោចក្រយានកម្ពុជារួចហើយ ដើម្បីចូលរួមក្នុងព្រឹត្តិការណ៍ «ជិះកង់ភ្នំពេញ-បាត់ដំបង» លើចម្ងាយផ្លូវសរុប២៩២គីឡូម៉ែត្រ ដើម្បីរួមគ្នារៃអង្គាសថវិកាជួយដល់ក្មេងៗក្រីក្រ នៅអង្គការមូលនិធិនៃក្តីសង្ឃឹមកុមារកម្ពុជា (HOPE) នៅទីរួមខេត្តបាត់បង។
កម្មវិធីសប្បុរសធម៌ជិះកង់ដើម្បីកុមារកម្ពុជានេះ នឹងត្រូវធ្វើឡើង នៅថ្ងៃទី១៥ ខែកុម្ភៈខាងមុខនេះ ហើយលោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានឱ្យដឹងថា កម្មវិធីនេះ មានអ្នកចុះឈ្មោះចូលរួមចំនួន៨០នាក់ មកពីរាជធានី-ខេត្តចំនួន៩ គឺខេត្តកណ្តាល កំពត កំពង់ស្ពឺ កំពុងឆ្នាំង ពោធិ៍សាត់ បាត់ដំបង បន្ទាយមាននជ័យ ខេត្តសៀមរាប និងក្រុមជិះកង់នៅរាជធានីភ្នំពេញ។
អ្នកចូលរួមភាគច្រើន និងអ្នកគាំទ្រ នឹងមកជួបជុំគ្នានៅមុខវិមានរដ្ឋធម្មនុញ (វិមានឯករាជ) នាម៉ោង៤ទៀបភ្លឺ នាថ្ងៃទី១៥ ខែកុម្ភៈ ដើម្បីជិះកង់រួមគ្នាចេញពីចំណុចនេះ នៅម៉ោង ៤:៣០ ហើយក្រុមម៉ូតូធំ BMW ចំនួន១០គ្រឿង នឹងជិះអមក្បូនជិះកង់មួយនេះតាំងពីភ្នំពេញ រហូតដល់ទីរួមខេត្តបាត់ដំបង ចំណែកអ្នកជិះផ្សេងៗទៀត អាចរង់ចាំជិះ នៅតាមទីតាំងសម្រាក និងចេញដំណើរបន្តចំនួន៥កន្លែង នៅក្នុងខេត្តមួយចំនួន ដែលបានជិះឆ្លងកាត់។
តាមគម្រោង ក្បួនជិះកង់រៃអង្គាសថវិកាបែបសប្បុរសធម៌នេះ នឹងធ្វើដំណើរទៅដល់គោលដៅអង្គការ HOPE ទីរួមខេត្តបាត់ដំបង នៅម៉ោង៥រសៀល ហើយនេះជាលើកទី១ ដែលសហព័ន្ធកីឡាទោចក្រយានកម្ពុជា បានបង្កើតឱ្យមានកម្មវិធីជិះកង់ទៅកាន់ខេត្តបាត់ដំបង ដើម្បីការងារសប្បុរសធម៌។
លោក នូ ចំរើន បានបញ្ជាក់ថា៖ «គោលបំណងធំរបស់សហព័ន្ធ ដែលរៀបចំព្រឹត្តិការណ៍នេះឡើង គឺដើម្បីរៃអង្គាសសម្ភារ និងថវិកាមួយចំនួនយកទៅជួយដល់អង្គការ HOPE ដែលមានការខ្វះខាត ហើយមួយទៀត យើងចង់កៀរគរអ្នកជិះកង់ទាំងអស់ ឱ្យចូលរួមជិះកង់ពីភ្នំពេញទៅខេត្តបាត់ដំបង ដើម្បីបំផុសចលនាកីឡាជិះកង់ផង និងផ្សព្វផ្សាយវិស័យទេសចរណ៍នៅកម្ពុជាផង ដែលសម្បូរទៅដោយតំបន់ទេសចរណ៍ទាំងនៅរាជធានី និងខេត្តនានា»។
អគ្គលេខាធិការរូបនេះ បានឱ្យដឹងទៀតថា ការជិះកង់ពីភ្នំពេញទៅកាន់ខេត្តបាត់ដំបងនេះ ជាព្រឹត្តិការណ៍ជិះកង់ដំបូងគេ ប្រចាំឆ្នាំ២០២៥ ចំណែកការរៀបចំកម្មវិធី «ជិះកង់ពីភ្នំពេញទៅខេត្តសៀមរាប» កាលពីឆ្នាំ២០២៤ សហព័ន្ធ ប្រមូលបានថវិកាតាមការបរិច្ចាគផ្សេងៗសរុប២១លានរៀល និងសម្ភារមួយចំនួនទៀត យកទៅជូនដល់មន្ទីរពេទ្យកុមារអង្គរ។ ប៉ុន្តែចំនួនថវិការៃអង្គាស សម្រាប់យកទៅជួយដល់អង្គការ HOPE នៅទីរួមខេត្តបាត់ដំបងខាងមុខនេះ ទើបតែបានជាង១ពាន់ដុល្លារទេ។
លោក នូ ចំរើន បាននិយាយថា៖ «ចំនួនថវិកាដែលយើងប្រមូលបានតាមរយៈការបរិច្ចាគរបស់អ្នកចូលរួម ក៏ដូចជាតាមរយៈ Page និងអ្នកគ្រប់គ្រងកម្មវិធីរបស់យើង បានជាង១ពាន់ដុល្លារហើយ ហើយសហព័ន្ធ ក៏មានជាសម្ភារដូចជានំ ទឹកដោះគោ និងដបទឹកមួយចំនួនទៀត ហេតុនេះយើងខ្ញុំសូមអំពាវនាវដល់បងប្អូនប្រជាពលរដ្ឋយើងផ្សេងៗទៀត មេត្តាចូលរួមបរិច្ចាគបន្ថែម ដើម្បីយើងបានថវិកាច្រើនជាងនេះ យកទៅជួយដល់អង្គការ HOPE»។
យ៉ាងណាក៏ដោយ លោក ធី សុធឿន នាយកអង្គការ HOPE នៅទីរួមខេត្តបាត់ដំបង បានបង្ហាញភាពសប្បាយរីករាយខ្លាំង ដែលអង្គការរបស់លោក បានបង្កើតទំនាក់ជាមួយសហព័ន្ធកីឡជាតិ ដើម្បីយើងអាចមានលទ្ធភាពទិញឯកសណ្ឋាន និងកង់ ជួយដល់ក្មេងៗជិត១០០នាក់ នៅក្នុងការសហគមន៍ ដែលកំពុងមានការខ្វះខាត។
លោកបានថ្លែងថា៖ «យើងអាចដឹងថា ថវិកា ដែលយើងនឹងទទួលបានតាមរយៈកម្មវិធីជិះកង់នេះ មានចំនួនមិនច្រើន ដូចអ្វីដែលយើងទទួលបានមកពីក្រៅប្រទេសមកនោះទេ ប៉ុន្តែយើងពិតជាសប្បាយចិត្តខ្លាំង ដែលបានកសាងទំនាក់ទំនងជាមួយសហព័ន្ធកីឡាជាតិ ហើយយើងនឹងរៀបចំស្វាគមន៍ឱ្យបានល្អបំផុត ដើម្បីជាការដឹងគុណដល់ពួកគាត់»។
លោកបានបន្ថែមថា៖ «ខ្ញុំជឿជាក់ថា តាមរយៈកម្មវិធីនេះ នឹងជួយបណ្តុះគំនិតឱ្យក្មេងៗរបស់យើងចេះជួយគ្នាទៅវិញទៅមក ហើយដោយសារអ្នកជិះកង់មកនេះ សុទ្ធតែជាជនជាតិខ្មែរអ៊ីចឹងអារម្មណ៍នៃការទំនាក់ទំនងផ្ទាល់របស់ក្មេងៗយើង វាអាចមានតម្លៃជាងឃើញបរទេសជួយដល់ពួកគេ ហើយសកម្មភាពខ្មែរជួយខ្មែរនេះ ក៏នឹងជួយបំផុសគំនិតដល់អាណាព្យាបាល ក៏ដូចជាក្មេងៗរបស់យើង ឱ្យបន្តការសិក្សាបានវែងឆ្ងាយផងដែរ»៕
