សកម្មភាពប្រកួតប្រដាល់គុនខ្មែរជាលក្ខណៈអន្តរជាតិ នៅលើសង្វៀនថោន កាលពីសប្តាហ៍មុន។ រូបថត Ganzberg
សហព័ន្ធកីឡាប្រដាល់គុនខ្មែរ បានចេញសេចក្តីប្រកាសព័ត៌មានជាបន្ទាន់មួយ កាលពីថ្ងៃអាទិត្យ ដើម្បីបញ្ជាក់ពីឯករាជ្យភាព និងគោលជំហររបស់ខ្លួន ក្នុងការអនុវត្តការងារ ក៏ដូចជារៀបចំការប្រកួតប្រដាល់គុនខ្មែរទាំងថ្នាក់ជាតិ និងអន្តរជាតិ ដោយមិនស្ថិតក្រោមសហព័ន្ធគុនខ្មែរអន្តរជាតិនោះទេ។
ការចេញសេចក្តីប្រកាសបែបនេះ គឺដើម្បីឆ្លើយតបទៅនឹងសេចក្តីណែនាំរបស់សហព័ន្ធគុនខ្មែរអន្តរជាតិ ដែលតម្រូវឱ្យសហព័ន្ធកីឡាគុនខ្មែរជាតិ ប្រចាំប្រទេសនីមួយៗ ត្រូវស្នើសុំអាជ្ញាបណ្ណពីសហព័ន្ធគុនខ្មែរអន្តរជាតិ ទើបអាចរៀបចំការប្រកួតកីឡាប្រដាល់គុនខ្មែរ និងគុនខ្មែរអាជីពជាលក្ខណៈអន្តរជាតិគ្រប់ទម្រង់ លើសពី៥ប្រទេសឡើងទៅបាន។
សហព័ន្ធកីឡាប្រដាល់គុនខ្មែរ ក្រោមការដឹកនាំរបស់លោក ខូវ ឆាយ បានបញ្ជាក់នៅក្នុងសេចក្តីប្រកាសរបស់ខ្លួនថា៖ «សហព័ន្ធកីឡាប្រដាល់គុនខ្មែរ មិនស្ថិតនៅក្រោមសហព័ន្ធគុនខ្មែរអន្តរជាតិឡើយ សហព័ន្ធមិនដែលបានធ្វើលិខិតជាលាយល័ក្ខអក្សរស្នើសុំចូលជាសមាជិកសហព័ន្ធគុនខ្មែរអន្តរជាតិម្តងណាទេ»។
ជាមួយគ្នានេះ សហព័ន្ធកីឡាប្រដាល់គុនខ្មែរ បានបង្ហាញពីវិសាលភាពរបស់ខ្លួន ក្នុងនាមជាសហព័ន្ធកីឡាជាតិ ដែលត្រូវបានបង្កើតឡើងតាំងពីឆ្នាំ១៩៨០ ហើយការអនុវត្តការងារ សកម្មភាព ឈរលើបេសកកម្មរបស់ខ្លួនរហូតដល់អាណត្តិទី៨នេះ គឺសហព័ន្ធ មានសមាគមកីឡាប្រដាល់គុនខ្មែរ ក្រសួង រាជធានី-ខេត្ត ជាសមាជិកចំណុះចំនួន២៣ និងក្លិបចំណុះឱ្យសមាគមចំនួន១៤៤ក្លិប។
សេចក្តីប្រកាសដដែលនេះ បានបន្ថែមថា យោងតាមប្រការ៦ ជំពូកទី៣ នៃលក្ខន្តិកសហព័ន្ធកីឡាប្រដាល់គុនខ្មែរ បានចែងយ៉ាងច្បាស់អំពីបេសកកម្មរបស់សហព័ន្ធ មានសិទ្ធិគ្រប់គ្រាន់ក្នុងការ «ដឹកនាំ គ្រប់គ្រង អភិរក្ស និងអភិវឌ្ឍន៍វិស័យកីឡាប្រដាល់គុនខ្មែរ នៅទូទាំងព្រះរាជាណាចក្រកម្ពុជា និងនៅលើសកលលោក» ត្រូវបានអនុម័តដោយអង្គមហាសន្និបាត នាថ្ងៃទី២២ ខែមករា ឆ្នាំ២០២៥ ទទួលស្គាល់ដោយក្រសួងអប់រំ យុវជន និងកីឡា ដែលជាសេនាធិការជូនរាជរដ្ឋាភិបាលកម្ពុជា។
លោក ខូវ ឆាយ បានបញ្ជាក់នៅក្នុងសេចក្តីប្រកាសព័ត៌មានបែបនេះថា៖ «សហព័ន្ធកីឡាប្រដាល់គុនខ្មែរ មានបុព្វសិទ្ធិ និងស្វ័យភាពពេញលេញក្នុងការផ្សព្វផ្សាយ និងរៀបចំរាល់ការប្រកួតកីឡាប្រដាល់គុនខ្មែរ គ្រប់ទម្រង់ ទាំងក្នុងប្រទេស និងក្រៅប្រទេស ដោយមិនអនុញ្ញាតឱ្យសហព័្ធគុនខ្មែរអន្តរជាតិមកជ្រៀតជ្រែកជាដាច់ខាត»។
គួររំឭកថា កាលពីថ្ងៃទី១៥ ខែកុម្ភៈ កន្លងមកនេះ លោក មាម រ៉ា ប្រធានសហព័ន្ធគុនខ្មែរអន្តរជាតិ បានចេញសេចក្តីណែនាំមួយ ឱ្យសហព័ន្ធកីឡាគុនខ្មែរជាតិ ប្រចាំប្រទេសនីមួយៗ ទាំង៦៥ប្រទេស អនុវត្តតាម ទី១ ការរៀបចំការប្រកួតកីឡាប្រដាល់គុនខ្មែរជាលក្ខណៈអន្តរជាតិ និងប្រកួតគុនខ្មែរអាជីពជាលក្ខណៈអន្តរជាតិគ្រប់ទម្រង់លើសពី៥ប្រទេសឡើង នៅក្នុងប្រទេសរបស់ខ្លួន ត្រូវស្នើសុំអាជ្ញាបណ្ណ និងសេចក្តីសម្រេចសហព័ន្ធគុនខ្មែរអន្តរជាតិ ហើយត្រូវប្រើប្រាស់អាជ្ញាកណ្តាលចៅក្រមអន្តរជាតិរបស់សហព័ន្ធគុនខ្មែរអន្តរជាតិ។
ចំណុចទី២ កីឡាករ កីឡាការិនីគុនខ្មែរ ជាតិ និងអន្តរជាតិ ដែលចូលរួមប្រកួតកីឡាគុនខ្មែរជាអន្តរជាតិ ត្រូវមានអាជ្ញាបណ្ណកីឡា (Fighter License) ពីសហព័ន្ធគុនខ្មែរអន្តរជាតិ ទើបអាចចូលរួមជាផ្លូវការរបស់សហព័ន្ធគុនខ្មែរអន្តរជាតិបាន ហើយទី៣ សមាជិកពេញសិទ្ធិ គ្រប់ប្រទេសរបស់សហព័ន្ធគុនខ្មែរអន្តរជាតិ នឹងទទួលបានជំនួយបច្ចេកទេស និងសិទ្ធិស្របច្បាប់ ក្នុងការរៀបចំការប្រកួតជាលក្ខណៈអន្តរជាតិ ពីសហព័ន្ធគុនខ្មែរអន្តរជាតិ។
ប៉ុន្តែរាល់សេចក្តីណែនាំទាំងអស់របស់សហព័ន្ធគុនខ្មែរអន្តរជាតិ ត្រូវបានសហព័ន្ធកីឡាប្រដាល់គុនខ្មែរ ច្រានចោល ហើយបានបញ្ជាក់ជាចុងក្រោយថា៖ «សហព័ន្ធកីឡាប្រដាល់គុនខ្មែរ មិនមែនជាសមាជិកសហព័ន្ធគុនខ្មែរអន្តរជាតិនោះទេ។ រាល់សេចកក្តីសម្រេច ឬការចាត់តាំងណាមួយ ចេញដោយសហព័ន្ធគុនខ្មែរអន្តរជាតិ គឺមិនមានអនុភាពអនុវត្តលើសមាគម និងក្លិបដែលជាសមាជិករបស់សហព័ន្ធកីឡាប្រដាល់គុនខ្មែរនៃព្រះរាជាណាចក្រកម្ពុជាឡើយ»។
ការប្រកាន់ពីគោលជំហរយកត្រូវរៀងៗខ្លួនរបស់ថ្នាក់ដឹកនាំសហព័ន្ធទាំង២នេះ វាកំពុងក្លាយជាអណ្តាតភ្លើងនៃការវិវាទដ៏គួរឱ្យបារម្ភ ដែលអាចនឹងប៉ះពាល់ដល់ការពង្រីកសក្តានុពល «គុនខ្មែរ» ទៅកាន់ឆាកអន្តរជាតិផងដែរ បើសិនជាបញ្ហានេះ មិនត្រូវបានដោះស្រាយដោយសន្តិវិធី ពីស្ថាប័នជាសេនាធិការរបស់រាជរដ្ឋាភិបាលទេនោះ៕
