ខ្សែប្រយុទ្ធប្រេស៊ីល Matheus Moresche និង Breno Caetano ដែលទើបបានមកចូលរួមជាមួយក្រុមព្រះខ័នរាជស្វាយរៀង។ រូបថត ស្វាយរៀង
ក្លិបបាល់ទាត់ព្រះខ័នរាជស្វាយរៀង បានសម្រេចនាំយកខ្សែប្រយុទ្ធប្រេស៊ីល២នាក់ទៀត មកជួយដល់ក្រុមទាំងការប្រកួតលីគកំពូលកម្ពុជា និងការប្រកួតវគ្គ៨ក្រុមចុងក្រោយនៃពានរង្វាន់ AFC Challenge League ប៉ុន្តែក្លិបមានមូលដ្ឋាននៅខេត្តស្វាយរៀងមួយនេះ នៅតែរក្សាទុក ខ្សែប្រយុទ្ធប្រេស៊ីល Pablo Augusto ទោះពេលនេះរូបគេមិនទាន់អាចចូលលេងបាន ដោយសារបញ្ហារបួស។
តាមការជូនដំណឹងចំនួន២ផ្សេងគ្នា គឺក្លិបព្រះខ័នរាជស្វាយរៀង បានសម្រេចចុះកិច្ចសន្យាជាមួយខ្សែប្រយុទ្ធស្លាបរបស់ប្រេស៊ីល Breno Caetano កាលពីថ្ងៃទី១៣ ខែកុម្ភៈ ហើយកាលពីថ្ងៃទី១៧ ខែកុម្ភៈ ក្លិបមួយនេះ បានសម្រេចនាំយកខ្សែប្រយុទ្ធប្រេស៊ីល Matheus Moresche មកម្នាក់ទៀត ដែលធ្វើឱ្យចំនួនកីឡាករប្រេស៊ីល នៅក្នុងក្រុមស្វាយរៀង មានរហូតដល់៥នាក់ រួមជាមួយកីឡាករជប៉ុន២នាក់ និងឡាវ១នាក់។
តែទោះបីជាយ៉ាងណា ចំពោះវត្តមានខ្សែប្រយុទ្ធប្រេស៊ីល២នាក់ចុងក្រោយនេះ គឺក្លិបព្រះខ័នរាជស្វាយរៀង បានចុះកិច្ចសន្យាជាមួយកីឡាករ Breno Caetano សម្រាប់លេងតែនៅក្នុងពានរង្វាន់ AFC Challenge League ទេ ចំណែក Matheus Moresche ត្រូវចូលលេងជំនួសខ្សែប្រយុទ្ធ Pablo នៅក្នុងការប្រកួតលីគកំពូលកម្ពុជា ដែលនៅសេសសល់។
ក្លិបព្រះខ័នរាជស្វាយរៀង បានជូនដំណឹងដល់អ្នកគាំទ្រ កាលពីល្ងាចថ្ងៃចន្ទថា៖ «Pablo កំពុងស្ថិតក្រោមការស្តានីតិសម្បទាសម្រាប់របួសរបស់គាត់ ដោយត្រូវការរយៈពេលយ៉ាងតិច៦សប្តាហ៍ ហេតុនេះកីឡាករ Matheus នឹងជំនួស Pablo សម្រាប់ការប្រកួតដែលនៅសល់ក្នុងលីគកំពូលកម្ពុជា។ ប៉ុន្តែ Pablo នៅតែជាកីឡាកររបស់យើង ហើយគាត់នឹងចូលរួមប្រកួតក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន និងពានរង្វាន់ AFC Challenge League»។
បន្ថែមលើនេះ ក្រុមព្រះខ័នរាជស្វាយរៀង ក៏បានដាក់ខ្សែប្រយុទ្ធកម្ពស់ ១,៨០ម៉ែត្រ Matheus Moresche ឱ្យចូលរួមប្រកួតវគ្គ៨ក្រុមចុងក្រោយនៃពានរង្វាន់ AFC Challenge League ផងដែរ ដោយក្រុមស្វាយរៀង ត្រូវប្រកួត២ជើងជាមួយក្រុម Shan United របស់មីយ៉ាន់ម៉ា នៅក្នុងខែមីនា ឆ្នាំ២០២៥។
ជាមួយគ្នានេះ Matheus Moresche ដែលធ្លាប់លេងនៅលីគប្រទេសប្រេស៊ីល លីគប្រទេសបេឡារុស (Belarusian Premier League) លីគកំពូលសិង្ហបុរី ( Singapore Premier League) លីគប្រទេសអូស្រ្តាលី (A-League Men) និងលីគប្រទេសចិន (China League One) បានបង្ហាញភាពសប្បាយរីករាយ សម្រាប់ការមកលេងនៅលីគកំពូលកម្ពុជា ជាលើកដំបូង ជាមួយក្រុមស្វាយរៀង លើកនេះ។
Matheus បានអះអាងថា រូបគេពិតជាមានការភ្ញាក់ផ្អើលមែនទែនជាមួយប្រទេសកម្ពុជា ជាមួយក្រុមព្រះខ័នរាជស្វាយរៀង និងកន្លែងហ្វឹកហាត់ផងដែរ។ «ខ្ញុំពិតជាសប្បាយចិត្តខ្លាំងណាស់ ដែលបានមកទីនេះ ដើម្បីចូលរួមជាមួយក្រុម ហើយខ្ញុំព្យាយាមធ្វើឱ្យបានល្អ ដើម្បីជោគជ័យជាមួយក្រុម»។
ខ្សែប្រយុទ្ធវ័យ២៦រូបនេះ បានបន្ថែមថា៖ «ក្លិបព្រះខ័នរាជស្វាយរៀង ពិតជាអស្ចារ្យណាស់ គឺជាក្រុមមួយដ៏ល្អនៅលីគ ហើយក្រុមទាំងមូល មានទម្រង់លេងមួយដែលល្អ ជាពិសេសលោកគ្រូ Pep ក៏មកពីប្រទេសអេស្ប៉ាញ អ៊ីចឹងនេះជាមូលហេតុដែលខ្ញុំមកទីនេះ គឺល្អសម្រាប់កីឡាករ ដែលចូលចិត្តគ្រប់គ្រងបាល់ច្រើន»។
យ៉ាងណាក៏ដោយ Matheus Moresche បានឱ្យដឹងថា ប្រទេសកម្ពុជា មានអាកាសធាតុក្តៅ ជាពិសេសនៅក្នុងខែមេសា ប៉ុន្តែដោយសាររូបគេធ្លាប់លេងនៅប្រទេសប្រេស៊ីល និងសិង្ហបុរី ហេតុនេះវាមិនជាបញ្ហាសម្រាប់រូបគេ ក្នុងការសម្របខ្លួននោះទេ ហើយម្ចាស់អាវលេខ៩៨រូបនេះសង្ឃឹមថា រូបគេនឹងធ្វើបានល្អជាមួយក្រុមទាំងមូល ដើម្បីទទួលបានជោគជ័យទាំងអស់គ្នា។
Matheus បានបញ្ជាក់ថា៖ «ខ្ញុំនឹងព្យាយាម១០០ភាគរយ! ទោះបីជាពេលនេះ ខ្ញុំមិនទាន់រួចរាល់១០០ភាគរយក៏ពិតមែន ប៉ុន្តែខ្ញុំគិតថា ខ្ញុំនឹងរួចរាល់ក្នុងពេលមួយអាទិត្យទៀត។ ខ្ញុំនឹងព្យាយាមទាត់បញ្ចូលទីឱ្យបានច្រើន តាមដែលអាចធ្វើទៅបាន និងលេងឱ្យបានល្អជាមួយកីឡាករប្រេស៊ីលដទៃទៀត ដោយខ្ញុំសង្ឃឹមថា គ្រប់យ៉ាងនឹងល្អតាមផែនការរបស់យើង»៕
