សមាសភាពជម្រើស១១នាក់ដំបូងរបស់ក្រុមជម្រើសជាតិកម្ពុជា ពេលប្រកួតជាមួយក្រុមម្ចាស់ផ្ទះសិង្ហបុរី ពានរង្វាន់ ASEAN Mitsubishi Electric Cup 2024។ រូបថត FFC
ក្រុមជម្រើសជាតិបាល់ទាត់កម្ពុជា នឹងមានការប្រកួតមិត្តភាពអន្តរជាតិមួយទៀត នៅលើទឹកដីខ្លួនឯង ក្នុងខែមីនាខាងមុខនេះ គឺបន្ថែមទៅលើការប្រកួតមិត្តភាពអន្តរជាតិ ជាមួយក្រុមជម្រើសជាតិវៀតណាម ដែលធ្វើនៅក្នុងខែមីនាដូចគ្នា ប៉ុន្តែក្តីសង្ឃឹមរបស់កម្ពុជា ក្នុងការទទួលបានឱកាសទៅលេងក្នុងពាន AFC Asian Cup ជំនួសក្រុមជម្រើសជាតិប៉ាគីស្ថាន នោះ ហាក់គ្មានផ្លូវទៀតទេ។
តាមការប្រកាសរបស់សហព័ន្ធកីឡាបាល់ទាត់កម្ពុជា (FFC) នៅព្រឹកថ្ងៃសុក្រនេះ បានបញ្ជាក់ថា កម្ពុជា បានសម្រេចអញ្ជើញក្រុមជម្រើសជាតិអារូបា (Aruba) ដែលមកពីទ្វីបអាមេរិកខាងត្បូង ដើម្បីធ្វើការប្រកួតមិត្តភាពអន្តរជាតិ Minebea Mitsumi ជាមួយក្រុមជម្រើសជាតិកម្ពុជា នៅពហុកីឡដ្ឋានជាតិអូឡាំពិក នាថ្ងៃអង្គារ ទី២៥ ខែមីនា ឆ្នាំ២០២៥។
តាមការប្រកាសនេះ គឺមានន័យថា ក្រុមជម្រើសជាតិកម្ពុជា នឹងមានការប្រកួតមិត្តភាពអន្តរជាតិចំនួន២ នៅក្នុងខែមីនាខាងមុខនេះ ព្រោះកាលពីពេលថ្មីៗនេះ សហព័ន្ធកីឡាបាល់ទាត់វៀតណាម ក៏បានអញ្ជើញក្រុមជម្រើសជាតិកម្ពុជា ទៅប្រកួតជាមួយក្រុមជម្រើសជាតិរបស់ខ្លួន ដែលជាម្ចាស់ជើងឯកពានរង្វាន់ ASEAN Mitsubishi Electric Cup 2024 នៅខេត្ត Binh Duong នាថ្ងៃទី១៩ ខែមីនា ឆ្នាំ២០២៥នេះផងដែរ។
ជាមួយគ្នានេះ គ្រូបង្វឹកជនជាតិជប៉ុនលោក Koji Gyotoku ដែលត្រូវបានផ្តល់ទំនុកចិត្តឱ្យបន្តដឹកនាំក្រុមជម្រើសជាតិកម្ពុជា សម្រាប់ការប្រកួតមិត្តភាពអន្តរជាតិ ទាំង២ក្នុងខែមីនា ខាងមុខនេះ ក៏កំពុងតែពិនិត្យមើលពីគុណភាពលេងរបស់កីឡាករនៅតាមបណ្តាក្លិបនីមួយៗ មុនឈានទៅដល់ការជ្រើសរើសយកអ្នកមានសមត្ថភាពមកចូលរួមលេងតំណាងឱ្យកម្ពុជា ក្នុងការប្រកួតខាងមុខនេះ។
ការប្រកួតរវាងក្រុមជម្រើសជាតិកម្ពុជា និងក្រុមទីម័រខាងកើត ក្នុងពាន ASEAN Mitsubishi Electric Cup 2024 នៅពហុកីឡដ្ឋានជាតិអូឡាំពិក កាលពីថ្ងៃទី១៧ ខែធ្នូ ឆ្នាំ២០២៤។ រូបថត FFC
ចំណែកលោក កែវ សារ៉េត អគ្គលេខាធិការ FFC បានឱ្យដឹងថា ការរៀបចំឱ្យមានការប្រកួតមិត្តភាពអន្តរជាតិ សម្រាប់ក្រុមជម្រើសជាតិកម្ពុជា នៅក្នុងកាលវិភាគនៃការប្រកួតអន្តរជាតិរបស់ FIFA (FIFA Calendar)នេះ គឺត្រូវបានធ្វើឡើង ដើម្បីបំពេញទៅតាមការចង់បានរបស់ម្ចាស់ឧបត្ថម្ភ និងអ្នកគាំទ្រ ជាពិសេសផ្តល់ឱកាសឱ្យក្រុមជម្រើសជាតិកម្ពុជា បានប្រកួតប្រជែងជាមួយក្រុមផ្សេងៗ ដើម្បីពង្រឹងសមត្ថភាពលេង។
លោកបញ្ជាក់ថា៖ «ស្របពេលដែលក្រុមជម្រើសជាតិរបស់ប្រទេសផ្សេងៗ ត្រៀមប្រកួតផ្លូវការ និងប្រកួតមិត្តភាព ក្នុងកម្មវិធី FIFA Calendar អ៊ីចឹងដើម្បីទទួលបានផលចំណេញ ក៏ដូចផ្តល់ឱកាសឱ្យក្រុមជម្រើសជាតិរបស់យើង បានប្រកួតបង្កើនកម្រិតបច្ចេកទេស យើងក៏បានរៀបចំឱ្យមានការប្រកួតដែរ គឺទី១ ខាងវៀតណាម បានអញ្ជើញក្រុមយើងទៅប្រកួត និងទី២ យើងបានអញ្ជើញក្រុមអារូបា មកប្រកួតនៅលើទឹកដីយើងវិញ»។
សម្រាប់ការអញ្ជើញក្រុមជម្រើសជាតិអារូបា មកប្រកួតមិត្តភាពអន្តរជាតិ នៅក្នុងកម្មវិធី FIFA Calendarនេះ ក៏ដោយសារតែក្រុមជម្រើសជាតិកម្ពុជា មិនមានការប្រកួតផ្លូវការក្នុងពានរង្វាន់ ឬព្រឹត្តិការណ៍អ្វីទៀតនោះទេ ព្រោះក្រុមកម្ពុជា បានធ្លាក់ចេញពីគ្រប់កម្មវិធីប្រកួតអស់ហើយ។
ចំណែកការដាក់ក្តីសង្ឃឹមក្នុងការទទួលបានកៅអីឡើងទៅលេងក្នុងពូលE នៃពានរង្វាន់ AFC Asian Cup 2025 ជំនួសក្រុមជម្រើសជាតិប៉ាគីស្ថាន ដែលបានដកខ្លួនចេញនោះ ក៏គ្មានផ្លូវទៀតនោះដែរ ព្រោះគិតមកដល់ពេលនេះ សហព័ន្ធកីឡាបាល់ទាត់ទ្វីបអាស៊ី (AFC) មិនបានផ្តល់នូវតម្រុយណាមួយមកដល់ FFC នោះទេ ខណៈការប្រកួតជម្រុះប្រចាំពូលEនេះ នឹងចាប់ផ្តើម ពីថ្ងៃទី២៥ ខែមីនា ខាងមុខនេះតទៅហើយ។
ជុំវិញបញ្ហានេះ លោក កែវ សារ៉េត បានប្រាប់ថា៖ «ខាង AFC មិនបានទាក់ទងមកយើងទេ អ៊ីចឹងមិនសង្ឃឹមថា យើងបានទៅជំនួសគេ (ក្រុមប៉ាគីស្ថាន)ឡើយ ព្រោះបើខាង AFC ឱ្យយើងជំនួស ច្បាស់ជាគេទាក់ទងមកយើងហើយ តែនេះស្ងាត់ជ្រាប រីឯពេលវេលាប្រកួតក៏ខ្លីហើយដែរ អ៊ីចឹងគេអាចឱ្យក្រុមដែលត្រូវជួបក្រុមប៉ាគីស្ថាន ឈ្នះដោយស្វ័យប្រវត្តិ ឬក៏អាចមានលក្ខខណ្ឌផ្សេងពីនេះទៀត ទៅតាមការកំណត់របស់ AFC ដើម្បីរកក្រុមឈ្នះឡើងទៅវគ្គបន្ត»៕
