ក្រុមបញ្ជាការដ្ឋានអង្គរក្ស បាននាំគ្នាស្រែកអបអរ ក្នុងពេលពួកគេលើកពាន «តេជោលីគ» ជាលើកទី២ កាលពីថ្ងៃអាទិត្យ។ រូបថត ឈន ណន
ក្រុមចម្រុះដោយកីឡាករជម្រើសជាតិ វិសាខា បានបន្តចាញ់ក្រុមបញ្ជាការដ្ឋានអង្គរក្សជាថ្មីម្តងទៀត ក្នុងការប្រកួតផ្តាច់ព្រ័ត្រ ក្នុងព្រឹត្តិការណ៍បាល់ទះ «តេជោលីគ» រដូវកាលទី២ ឆ្នាំ២០២៥ កាលពីយប់ថ្ងៃអាទិត្យ ដែលធ្វើឱ្យពួកគេ ទទួលបានត្រឹមជើងឯករងជាលើកទី២ ខណៈក្រុមក្រសួងមហាផ្ទៃ ទទួលបានចំណាត់ថ្នាក់លេខ៣។
យ៉ាងណាក៏ដោយ ស្មាត់ធំ ជាប្រធានក្រុមវិសាខា គួន មុំ មិនបានបង្ហាញការខកចិត្តអ្វីនោះទេ ព្រោះរូបគេបានដឹងរួចទៅហើយពីគុណភាពលេងរបស់ក្រុមខ្លួន ជាពិសេសកីឡាករក្មេងៗមួយចំនួន ដែលពួកគេនៅមានរម្មណ៍មិនទាន់នឹងនរ សម្រាប់ការប្រកួតប្រជែងក្នុងព្រឹត្តិការណ៍ធំៗបែបនេះ។
គួន មុំ បាននិយាយក្រោយការប្រកួតថា៖ «យើងមិនគិតថា បានឡើងមកដល់វគ្គផ្តាច់ព្រ័ត្រផង ហើយយើងក៏មិនរំពឹងខ្ពស់ នឹងបានលើកពាននោះដែរ ព្រោះកីឡាកររបស់យើងមួយចំនួន នៅក្មេង អ៊ីចឹងគាត់កាន់តែមានអារម្មណ៍ភ័យ នៅក្នុងការប្រកួត ដែលមានអ្នកគាំទ្រផ្ទាល់ច្រើនបែបនេះ»។
ជាមួយគ្នានេះ គួន មុំ បានសរសើរទៅដល់ចង្វាក់លេងរបស់ក្រុមបញ្ជាការដ្ឋានអង្គរក្សថា ពិតជាធ្វើបានល្អ ដោយមានការរួមចំណែកយ៉ាងសំខាន់របស់កីឡាករឥណ្ឌូនេស៊ីទាំង៤នាក់ ជាពិសេសកីឡាករវាយប្រយុទ្ធ Nugraha Luvi Febrian ក្រោមការលើកបាល់យ៉ាងល្អរបស់មិត្តរួមជាតិរបស់គេ Aditya Viko Zulfan ហើយគ្រូបង្វឹកឥណ្ឌូនេស៊ី លោក Indro Wahyudi Harahap ក៏មានជំនាញខ្ពស់ ក្នុងការដឹកនាំក្រុមបញ្ជាការដ្ឋានអង្គរក្ស ដើម្បីឱ្យបន្តឈ្នះពាន «តេជោលីគ» ជាលើកទី២នេះ។
ការប្រកួតផ្តាច់ព្រ័ត្ររវាងក្រុមបញ្ជាការដ្ឋានអង្គរក្ស និងវិសាខា នៅវិមានពហុកីឡដ្ឋានជាតិអូឡាំពិក កាលពីថ្ងៃអាទិត្យ។ រូបថត សហការី
ម្ចាស់អាវលេខ១៥ គួន មុំ បានបញ្ជាក់ថា៖ «ក្រុមបញ្ជាការដ្ឋានអង្គរក្ស នៅតែល្អ ព្រោះយើងដឹងស្រាប់ហើយបាល់ទះនៅអាស៊ាន ឥណ្ឌូនេស៊ីពេលលេងជាមួយយើង គឺគេហើយ។ ក្បាច់របស់គេល្អ និងលេងលឿនមែនទែន ហើយកម្រិតកីឡាករឥណ្ឌូនេស៊ីប៉ុន្មាននាក់នេះ មិនមែនជាជម្រើសជាតិផង! ទម្រាំមានជម្រើសជាតិទៀត គេលេងល្អជាងហ្នឹងឆ្ងាយ ហេតុនេះក្រុមយើងលេងទប់ទល់ជាមួយគេបានប៉ុណ្ណឹង ខ្ញុំយល់ថា ល្អហើយ»។
តាមរយៈការប្រកួតផ្តាច់ព្រ័ត្រ នៅក្នុងវិមានពហុកីឡដ្ឋានជាតិអូឡាំពិក ដែលណែនតាន់តាប់ដោយអ្នកទស្សនា កាលពីព្រលប់ថ្ងៃអាទិត្យនោះ ក្រុមបញ្ជាការដ្ឋានអង្គររក្ស បានយកឈ្នះក្រុមវិសាខា ៣-០ ជាមួយគ្រាប់បាល់ ២៥-២០ ២៥-២០ និង ២៥-១៨ ដើម្បីក្លាយជាម្ចាស់ជើងឯក អមដោយប្រាក់រង្វាន់៦០លានរៀល រីឯក្រុមលេខ២ វិសាខា បាន១២លានរៀល ហើយក្រុមក្រសួងមហាផ្ទៃ បានយកឈ្នះក្រុមស្នងការនគរបាលខេត្តស្វាយរៀង ៣-១ ដើម្បីបានលេខ៣ និងប្រាក់រង្វាន់១០លានរៀល។
បន្ថែមលើចំណាត់ថ្នាក់ជាក្រុមនេះ ស្មាត់ធំ Nugraha Luvi Febrian ទទួលបានពានឯកត្តជនចំនួន២តែម្នាក់ឯង គឺពានកីឡាករឆ្នើមប្រចាំព្រឹត្តិការណ៍ និងពានកីឡាករវាយប្រយុទ្ធស្តាំល្អជាងគេ រីឯមិត្តរួមជាតិរបស់គេ Aditya Viko Zulfan ទទួលបានពានជាកីឡាករលើកបាល់ល្អជាងគេ។
ចំណែកកីឡាករ មឿន ម៉េងឡាយ របស់ក្រសួងមហាផ្ទៃ ក៏បានពានជាកីឡាករវាយប្រយុទ្ធស្តាំល្អជាងគេផងដែរ ហើយមិត្តរួមក្រុមរបស់ ធី ម៉េងហួង បានពានជាកីឡាករវាយប្រយុទ្ធឆ្វេងល្អជាងគេ ខណៈពានកីឡាករការពារល្អជាងគេ បានទៅលើ សេង គីមហាប់ របស់ក្រុមវិសាខា ហើយកីឡាករឥណ្ឌា Sherigar Praful របស់ក្រុមស្វាយរៀង និងកីឡាករ ឈាង ជីវែង របស់បញ្ជាការដ្ឋានអង្គរក្ស បានពានជាកីឡាករធ្វើរនាំងល្អជាងគេដូចគ្នា។
ជុំវិញការប្រកួត «តេជោលីគ» លើកទី២ ឆ្នាំ២០២៥នេះ ស្មាតិធំ Nugraha Luvi Febrian បាននិយាយថា៖ «ការប្រកួតតេជោលីគ លើកនេះ មានការប្រកួតប្រជែងគ្នាខ្លាំង ដោយខ្ញុំអាចនិយាយបានថា ក្រុមទាំង៦ ដែលឡើងមកដល់ជុំទី២ សុទ្ធតែមានសមត្ថភាព អាចទទួលបានពានដូចគ្នា គ្រាន់តែថា ពួកគាត់នៅមានចំណុចខ្វះខាតបន្តិចបន្តួចប៉ុណ្ណោះ ទើបធ្វើឱ្យក្រុមរបស់យើងទទួលបានពាន»៕
