ការប្រកួតរវាងកីឡាករកម្ពុជា ឡៅ ចន្ទ្រា (ក្រហម) និងអ្នកប្រដាល់ថៃ សៃយុគ នៅលើទឹកដីខេត្តតាកែវ កាលពីថ្ងៃអាទិត្យ ដោយ ចន្ទ្រា បានយកឈ្នះដោយពិន្ទុ ដើម្បីក្លាយជាម្ចាស់ខ្សែក្រវាត់។រូបថត ទទក
ក្រុមប្រដាល់គុនខ្មែរ ប្រដាល់មួយថៃ និងក្រុមតារាតំណាងឱ្យប្រទេសកម្ពុជា និងថៃ នឹងត្រូវធ្វើការប្រកួតបាល់ទាត់មិត្តភាព ក្នុងពានរង្វាន់ «សតវត្សរ៍នៃព្រះធម៌» នៅពហុកីឡដ្ឋានជាតិអូឡាំពិក នាថ្ងៃទី៨ ខែមីនា ខាងមុខនេះ ដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរវាង កម្ពុជា និងថៃ ក៏ដូចជាពង្រឹងទំនាក់ទំនងការទូតរបស់ប្រទេសទាំង២បន្ថែមទៀត។
តាមខ្លឹមសារ ដែលបានប្រកាសនៅក្នុងសន្និសីទកាសែត កាលពីថ្ងៃចន្ទ បានឱ្យដឹងថា ក្រុមប្រដាល់គុនខ្មែរ នឹងត្រូវធ្វើការប្រកួតបាល់ទាត់ជាមួយក្រុមប្រដាល់មួយថៃ ចំណែកក្រុមតារាងបាល់ទាត់កម្ពុជា នឹងត្រូវប្រកួតជាមួយក្រុមតារាបាល់ទាត់ថៃ ដែលមានការចូលរួមទាំងតារាសម្តែង តារាចម្រៀង តារាម៉ូដែល YouTuber, Vlogger, តារា TikTok របស់ប្រទេសទាំង២។
លោកបណ្ឌិត ស៊ុផាឆៃ វីរៈភូជុង អគ្គនាយកទូរទស្សន៍ប៉ុស្តិ៍លេខ៥ និងជាអ្នកសម្របសម្រួលបង្កើតឱ្យមានការប្រកួតពានរង្វាន់ «សតវត្សរ៍នៃព្រះធម៌»នេះ បានឱ្យដឹង ព្រឹត្តិការណ៍នេះ ត្រូវបានរៀបចំឱ្យមានឡើង ជាលើកដំបូង ដើម្បីផ្សារភ្ជាប់នូវវប្បធម៌សន្តិភាព ដែលជាការបន្ថែមនូវចំពោះការរឹតចំណងមិត្តភាព និងសាមគ្គីភាព រវាងប្រទេសកម្ពុជា និងថៃ ក៏ដូចជាប្រទេសនៅជាប់ដងទន្លេមេគង្គផ្សេងទៀត ដែលសុទ្ធតែអ្នកកាន់ព្រះពុទ្ធសាសនា។
ភាគីតំណាងឱ្យប្រទេសកម្ពុជា និងថៃ បាននាំគ្នាលើកដៃសំពះសូត្រព្រះធម៌ពុទ្ធសាសនា នៅក្នុងសន្និសីទកាសែត កាលពីថ្ងៃចន្ទ។ រូបថត ឈន ណន
លោក ស៊ុផាឆៃ បានបញ្ជាក់ថា៖ «យើងទាំងអស់គ្នាមានកម្ពុជា ថៃ ឡាវ វៀតណាម និងមីយ៉ាន់ម៉ា មានប្រជាជនកាន់ព្រះពុទ្ធសាសនាប្រមាណ៨៥ភាគរយ គឺមានន័យថា យើងមានឪពុកតែមួយ ហើយយើងក៏មានម្តាយតែមួយ ព្រោះជាប្រទេសនៅតាមដងទន្លេមេគង្គជាមួយគ្នា អ៊ីចឹងដើម្បីឱ្យមានទឹកដីសុវណ្ណភូមិពិតប្រាកដ យើងត្រូវដាក់បញ្ចូលនូវព្រះធម៌ ទៅក្នុងជំនឿរបស់សិស្សនិស្សិតទាំង៥ប្រទេស សម្រាប់ធ្វើជាមាគ៌ាក្នុងការអប់រំស្មារតីស្រឡាញ់រាប់អានគ្នា ក្នុងនាមជាប្រទេសនៅក្នុងសហគមន៍ជាមួយគ្នា»។
ចំណែកលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានចាត់ទុកការប្រកួតបាល់ទាត់មិត្តភាពនេះថា ជាឱកាសឱ្យយើងទាំងអស់គ្នា បានស្វែងយល់ពីវប្បធម៌នៃការរស់នៅប្រកបដោយសុខសន្តិភាពរវាងប្រទេសកម្ពុជា និងថៃ ក៏ដូចជាប្រទេសនៅក្នុងអនុតំបន់ទន្លេមេគង្គទាំងអស់ ដែលគួរតែមានទំនាក់ទំនងល្អជាមួយគ្នា ដើម្បីបង្កើតបានវប្បធម៌រស់នៅដោយសន្តិភាព ចៀសវាងធ្វើអ្វីដែលប៉ះពាល់ដល់សេចក្តីសុខ និងសុភមង្គមនៃសង្គមគ្រួសាររបស់ប្រទេសនីមួយៗ។
ជាមួយគ្នានេះ លោក ខូវ ឆាយ បានស្នើឱ្យក្រុមប្រដាល់គុនខ្មែរ ក្រុមប្រដាល់មួយថៃ ព្រមទាំងក្រុមតារាបាល់ទាត់តំណាងឱ្យប្រទេសកម្ពុជា-ថៃ គួរប្រើការប្រកួតបាល់ទាត់មិត្តភាពនេះបង្ហាញពីភាពគំរូល្អ ដើម្បីលុបបំបាត់ចោលនូវបញ្ហា និងការវិវាទមួយចំនួន ដែលបង្កើតឱ្យមានឡើងដោយការយល់ខុសរបស់ក្រុមយុវជនមួយចំនួនតូច សម្រាប់បម្រើតែផលប្រយោជន៍ផ្ទាល់ខ្លួន ធ្វើឱ្យប៉ះពាល់ដល់ប្រទេសជាតិ។
លោកបញ្ជាក់ថា៖ «ក្នុងនាមយើងជាតារា និងជាកីឡាករ ដែលមានអ្នកគាំទ្ររាប់សែននាក់ សូមប្រើការប្រកួតបាល់ទាត់មិត្តភាពនេះ ដើម្បីបង្ហាញពីភាពគំរូល្អដល់យុវជនជំនាន់ក្រោយ។ ទោះកន្លងមកមានព័ត៌មានប៉ះអង្គិចគ្នាមួយចំនួន ប៉ុន្តែយើងចង់ប្រាប់ទៅយុវជនរបស់យើងថា យើងនៅតែអាចងាកមកចាប់ដៃគ្នា ធ្វើការជាមួយគ្នា និងប្រកួតបាល់ទាត់ជាមួយគ្នា នៅលើវាលស្មៅប្រកបដោយស្នាមញញឹម មិត្តភាព និងសាមគ្គីភាព ក្នុងនាមជាអ្នកភូមិផងរបងជាប់គ្នា»។
ជាមួយគ្នានេះ អ្នកតំណាងឱ្យក្រុមប្រដាល់គុនខ្មែរ ប្រដាល់មួយថៃ ក្រុមតារាបាល់ទាត់ថៃ និងក្រុមតារាបាល់ទាត់កម្ពុជា សុទ្ធតែបានបង្ហាញភាពរីករាយ សម្រាប់ការត្រៀមប្រកួតគ្នាក្នុងពានរង្វាន់ «សតវត្សរ៍នៃព្រះធម៌» ខាងមុខនេះ ព្រោះជាការប្រកួតដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរបស់ប្រទេសទាំង២ ក៏ដូចជាការរឹតចំណងមិត្តភាព សាមគ្គីភាពរវាងកម្ពុជា និងថៃ ឱ្យបានកាន់តែល្អថែមទៀត។
តារាចម្រៀង ខេម ជាប្រធានក្រុមតារាបាល់ទាត់កម្ពុជា បាននិយាយថា៖ «បើទោះបីជាយើងឃើញថា នៅតាមបណ្តាញសង្គម ប្រទេសយើង និងប្រទេសថៃ មានបញ្ហាបន្តិចបន្តួចមែន ប៉ុន្តែក្នុងនាមយើងជាតារា យើងមិនគួរបង្កើតព័ត៌មានញុះញុង ឬព័ត៌មានអ្វីផ្សេងនោះទេ គឺយើងគប្បីចូលរួមបង្ហាញពីក្តីស្រឡាញ់ និងបង្កើតទំនាក់ទំនងល្អជាមួយគ្នា ក្នុងនាមយើងជាប្រទេសជិតខាង»៕
