ក្រុមជម្រើសជាតិនារីកម្ពុជា ពេលប្រកួតពានរង្វាន់ AFF Women’s Cup 2024។ រូបថត FFC
កម្ពុជាទទួលបានសិទ្ធិធ្វើជាម្ចាស់ផ្ទះរៀបចំការប្រកួតវគ្គជម្រុះក្នុងពូលនៃពានរង្វាន់ AFC Women’s Asian Cup Australia 2026 ជាលើកដំបូង ដែលនឹងប្រព្រឹត្តទៅចាប់ពីថ្ងៃទី២៣ ខែមិថុនា ដល់ថ្ងៃទី៥ ខែកក្កដា ឆ្នាំ២០២៥។ នេះបើតាមសេចក្តីប្រកាសរបស់សហព័ន្ធកីឡាបាល់ទាត់កម្ពុជា កាលពីថ្ងៃព្រហស្បតិ៍។
សហព័ន្ធកីឡាបាល់ទាត់កម្ពុជា បានឱ្យដឹងទៀតថា ការប្រកួតជម្រុះពានរង្វាន់បាល់ទាត់នារី AFC Women’s Asian Cup Australia 2026នេះ មានក្រុមជម្រើសជាតិនារីតាមប្រទេស នៅក្នុងតំបន់អាស៊ីចូលរួមទាំងអស់ ហើយការប្រកួតនឹងត្រូវបែងចែកជា៨ពូល ចំណែកការចាប់ឆ្នោតចែកពូល នឹងធ្វើឡើងនៅថ្ងៃទី២៧ ខែមីនា ឆ្នាំ២០២៥ នៅទីស្នាក់ការរបស់ AFC នៅប្រទេសម៉ាឡេស៊ី។
ហេតុនេះនៅមិនទាន់ដឹងថា ក្រុមជម្រើសជាតិនារីកម្ពុជា នឹងត្រូវស្វាគមន៍ក្រុមមកពីប្រទេសណាខ្លះ សម្រាប់មកប្រកួតនៅកម្ពុជានោះទេ ហើយវាក៏ជាលើកដំបូងផងដែរ ដែលកម្ពុជា ទទួលបានឱកាសធ្វើជាម្ចាស់ផ្ទះការប្រកួតបាល់ទាត់នារីកម្រិតអាស៊ីបែបនេះ បន្ទាប់ពីកម្ពុជា ទទួលបានជោគជ័យ ចំពោះការស្នើសុំទៅកាន់សហព័ន្ធបាល់ទាត់អាស៊ី (AFC) កាលពីពេលថ្មីៗនេះ ជាមួយប្រទេសចំនួន៧ទៀត។
សកម្មភាពក្រុមជម្រើសជាតិនារីកម្ពុជា ពេលប្រកួតចាញ់ក្រុមជម្រើសជាតិនារីឥណ្ឌូនេស៊ី ៣-១ ក្នុងវគ្គផ្តាច់ព្រ័ត្រ ពានរង្វាន់ AFF Women’s Cup 2024។ រូបថត FFC
ជុំវិញការងារនេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់ភ្នំពេញប៉ុស្តិ៍ថា៖ «កម្ពុជា ជាប្រទេសមួយក្នុងចំណោមប្រទេសចំនួន៨ ដែលបានស្នើសុំធ្វើជាម្ចាស់ផ្ទះការប្រកួតវគ្គជម្រុះពានរង្វាន់ AFC Women’s Asian Cup Australia 2026នេះ ហើយយើងទើបទទួលបានការបញ្ជាក់ពី AFC កាលពីថ្ងៃទី២៦ ខែកុម្ភៈ ចំពោះការទទួលបានសិទ្ធិធ្វើជាម្ចាស់ផ្ទះនេះ»។
បើទោះបីជា នៅមិនទាន់ដឹងថា ក្រុមនារីកម្ពុជា នឹងត្រូវជួបក្រុមជម្រើសជាតិនារីមកពីប្រទេសណាខ្លះ ចំពោះការធ្វើម្ចាស់ផ្ទះការប្រកួតពានរង្វាន់ AFC Women’s Asian Cup Australia 2026 ជាលើកដំបូងនេះ ប៉ុន្តែលោក កែវ សារ៉េត បានចាត់ទុកការប្រកួតនេះ ជាការផ្តល់ឱកាសថ្មីមួយទៀត សម្រាប់ក្រុមជម្រើសជាតិនារីកម្ពុជា បានប្រកួតប្រជែងជាមួយក្រុមខ្លាំងៗ នៅក្នុងតំបន់អាស៊ី ដើម្បីពង្រឹងសមត្ថភាពលេងរបស់ខ្លួនឱ្យបានកាន់តែប្រសើរថែមទៀត។
ជាមួយគ្នានេះក្រុមជម្រើសជាតិបាល់ទាត់នារីកម្ពុជា ក៏ទើបបង្កើតបានសមិទ្ធផលថ្មីមួយទៀត គឺការទទួលបានចំណាត់ថ្នាក់លេខ២ ក្នុងការប្រកួតពានរង្វាន់ AFF Women’s Cup 2024 បន្ទាប់ពីពួកគេ បានចាញ់ក្រុមជម្រើសជាតិនារីឥណ្ឌូនេស៊ី ៣-១ នៅវគ្គផ្តាច់ព្រ័ត្រ កាលពីថ្ងៃទី៥ ខែធ្នូ។
សហព័ន្ធកីឡាបាល់ទាត់កម្ពុជា បានចាត់ទុកការដណ្តើមបានតំណែងជើងឯករង ពីការពានរង្វាន់ AFF Women’s Cup 2024 នេះថា ជាការបង្កើតប្រវត្តិសាស្រ្តថ្មីមួយទៀត របស់ក្រុមជម្រើសជាតិនារីកម្ពុជា បន្ថែមទៅលើការបង្កើតប្រវត្តិក្នុងការប្រកួតស៊ីហ្គេម លើកទី៣២ ឆ្នាំ២០២៣ ដែលក្រុមនារីកម្ពុជា ដណ្តើមបានកៅអីឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាលើកដំបូង ក្នុងនាមជាម្ចាស់ផ្ទះ។
លោក កែវ សារ៉េត បានបញ្ជាក់ថា៖ «គោលបំណងនៃការសុំសិទ្ធិធ្វើជាម្ចាស់ផ្ទះការប្រកួតជម្រុះពានរង្វាន់ AFC Women’s Asian Cup Australia 2026នេះ គឺយើងចង់លើកទឹកចិត្ត ក៏ដូចជាផ្សព្វផ្សាយពីវិស័យបាល់ទាត់នារីនៅក្នុងប្រទេសយើងឱ្យបានកាន់តែខ្លាំង ព្រោះតាមរយៈការប្រកួតប្រជែងកន្លងមក យើងឃើញថា ក្រុមជម្រើសជាតិនារីរបស់យើង ក៏មានសក្តានុពលល្អដែរ ហេតុនេះយើងត្រូវជំរុញបន្ថែមទៀត»៕
