លោក ហ៊ុន ម៉ាណែត ពេលថ្លែងក្នុងការជួបសម្ដែងការគួរសម និងពិភាក្សាការងារជាមួយក្រុមគណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ នៅវិមានសន្ដិភាព កាលពីព្រឹកថ្ងៃទី៤ ខែកុម្ភ:។ រូបថត STPM
លោកនាយករដ្ឋមន្រ្តី ហ៊ុន ម៉ាណែត បានជំរុញឱ្យគណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ ត្រូវធ្វើការសិក្សាស្រាវជ្រាវ និងចងក្រងអត្តសញ្ញាណនៃប្រភេទយុទ្ធគុនដូនតាខ្មែរនីមួយៗឱ្យបានច្បាស់លាស់ ដោយផ្អែកលើតឹកតាងជាប្រវត្តិសាស្រ្តជាសំខាន់ ដើម្បីសង្គ្រោះយុទ្ធគុនដូនតាខ្មែរ ដែលបានបាត់បង់ ជិតនឹងបាត់បង់ ក៏ដូចជាអភិរក្សយុទ្ធគុនដូនតាខ្មែរ ដែលកំពុងមានការរីកចម្រើននាពេលបច្ចុប្បន្ន។
លោក ហ៊ុន ម៉ាណែត បានលើកឡើងបែបនេះ ក្នុងពេលលោកអនុញ្ញាតឱ្យលោក ថោង ខុន ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានគណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព កាលពីព្រឹកថ្ងៃទី៤ ខែកុម្ភ:។
នៅក្នុងឱកាសនោះ លោក ថោង ខុន បានរាយការណ៍ជូនលោកនាយករដ្ឋមន្រ្តី ហ៊ុន ម៉ាណែត អំពីវឌ្ឍនភាពស្តីពីការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ គឺគណៈកម្មការដែលប្រមូលផ្តុំដោយថ្នាក់ដឹកនាំកំពូលៗមួយនេះ បានសម្រេចការងារសំខាន់ៗមួយចំនួន និងបានបែងចែកភារកិច្ចដល់ក្រុមជំនាញស្រាវជ្រាវ ទៅតាមប្រភេទនីមួយៗនៃក្បាច់គុនដូនតាខ្មែរ។
លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជាផងនោះ បានឱ្យដឹងទៀតថា ការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ គឺពឹងផ្អែកលើប្រភពអរូបី ដែលរួមមានមរតកមនុស្សរស់ សម្រាប់ជាមូលដ្ឋាននៃការស្រាវជ្រាវ និងប្រភពរូបី ដែលមានសាស្ត្រាស្លឹករឹត វត្ថុបុរាណ សិលាចារឹកដែលមានឆ្លាក់នៅតាមប្រាសាទបុរាណនានា ព្រមទាំងប្រភពកម្លាំងធម្មជាតិ ដូចជាការស្រាវជ្រាវលើយ័ន្ត និងមន្តអាគមជាដើម។
ជាការឆ្លើយតប លោក ហ៊ុន ម៉ាណែត បានកោតសរសើរ និងវាយតម្លៃខ្ពស់ចំពោះលទ្ធផលសម្រេចបានរបស់គណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ ដែលបានខិតខំនាពេលកន្លងមក ហើយលោកបានគូសបញ្ជាក់ថា យុទ្ធគុនដូនតាខ្មែរ ដែលបានរក្សាទុក សម្រាប់កូនខ្មែរជំនាន់ក្រោយ មានភាពសម្បូរបែប និងមានតម្លៃមិនអាចកាត់ថ្លៃបាន ដូច្នេះយើងត្រូវខិតខំស្រាវជ្រាវ ចងក្រង ផ្សព្វផ្សាយ និងអនុវត្ត ដើម្បីអភិរក្សមរតកយុទ្ធគុនដូនតាខ្មែរ ឱ្យមាននិរន្តរភាព និងបន្តតជំនាន់។
ប្រមុខដឹកនាំប្រទេសវ័យក្មេង លោក ម៉ាណែត បានបញ្ជាក់ថា៖ «ការសិក្សាស្រាវជ្រាវនេះ គឺត្រូវធ្វើយ៉ាងណាឱ្យមានភាពសុក្រឹត និងច្បាស់លាស់ ដោយផ្អែកលើតឹកតាងប្រវត្តិសាស្ត្រ ព្រោះនេះជាឯកសារផ្លូវការដ៏មានសារៈសំខាន់បំផុត ដែលចងក្រងអំពីយុទ្ធគុនដូនតាខ្មែរ»។
ជាមួយគ្នានេះលោកនាយករដ្ឋមន្រ្តី បានជំរុញឱ្យគណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ «ត្រូវសិក្សាស្រាវជ្រាវ និងកំណត់អត្តសញ្ញាណឱ្យច្បាស់នូវប្រភេទយុទ្ធគុននីមួយៗ ដើម្បីសង្គ្រោះយុទ្ធគុនដូនតាខ្មែរ ដែលបានបាត់បង់ ជិតនឹងបាត់បង់ ក៏ដូចជាអភិរក្សយុទ្ធគុនដូនតាខ្មែរ ដែលកំពុងមានការរីកចម្រើននាពេលបច្ចុប្បន្ន»។
លោកបានលើកទឹកចិត្តដល់គណៈកម្មការ ឱ្យបង្កើនការផ្សព្វផ្សាយឱ្យបានទូលំទូលាយនូវប្រភេទយុទ្ធគុនដូនតាខ្មែរ ដ៏សម្បូណ៌បែប។
នៅក្នុងជំនួបនោះដែរ លោក ថោង ខុន ក៏បានជម្រាបជូនលោក ហ៊ុន ម៉ាណែត អំពីការត្រៀមរៀបចំការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចធិបតី» លើកទី២ ដែលគ្រោងរៀបចំនៅចុងឆ្នាំ២០២៥ ហើយចំពោះរឿងនេះ លោកនាយករដ្ឋមន្រ្តី បានលើកទឹកចិត្តឱ្យគណៈកម្មការ រៀបចំនីតិវិធីនៃការប្រកួតឱ្យកាន់តែល្អប្រសើរ និងជំរុញការចូលរួមឱ្យបានទូលំទូលាយពីគ្រប់ប្រភេទយុទ្ធគុនខ្មែរ ដើម្បីឱ្យប្រជាពលរដ្ឋខ្មែរបានយល់ដឹងកាន់តែច្រើន អំពីមរតកយុទ្ធគុនដូនតាខ្មែរយើង៕
