ក្រុមព្រះខ័នរាជស្វាយរៀង បានចាញ់ក្រុមវិសាខា ២-១ នៅលើទឹកដីខ្លួនឯង ខណៈគ្រូបង្គោលលោក Pep Munuz បានទទួលស្គាល់ថា វិសាខា ពិតជាលេងបានល្អជាង ស្វាយរៀង។ រូបថត CPL
កំណត់ត្រាមិនធ្លាប់ចាញ់ នៅលើទឹកដីខ្លួនឯងតាំងពីខែធ្នូ ឆ្នាំ២០២៣ របស់ក្រុមព្រះខ័នរាជស្វាយរៀង ត្រូវបានបញ្ចប់ហើយ បន្ទាប់ពីពួកគេបានចាញ់ក្រុមវិសាខា ២-១ កាលពីថ្ងៃអាទិត្យ ហើយលទ្ធផលនេះ ក៏បានជួយឱ្យ វិសាខា កាន់តែមានឱកាសក្នុងការប្រជែងយកតំណែងជើងឯកលីគកំពូលកម្ពុជា ជាមួយក្រុមស្វាយរៀង និងភ្នំពេញក្រោន វិញផងដែរ។
ចំពោះការចាញ់ នៅកីឡដ្ឋានខេត្តស្វាយរៀង ជាទឹកដីខ្លួនឯង ជាលើកដំបូង ក្នុងរយៈពេលជាង១ឆ្នាំនេះ គ្រូបង្គោលក្រុមព្រះខ័នរាជស្វាយរៀង លោក Pep Munoz បានអះអាងថា លោកគ្មានលេសដោះសារអ្វីទេ ចំពោះការប្រកួតចាញ់ក្រុមវិសាខា ២-១ នេះ ព្រោះ្យលើទឹកដីខ្លួនយ នៅកើទឹកដីលពួកគេពិតជាលេងបានល្អជាងក្រុមស្វាយរៀង។
លោក Pep Munoz បាននិយាយក្រោយការប្រកួតថា៖ «ជាដំបូងសូមអបអរសាទរដល់ក្រុមវិសាខា គឺពួកគេពិតជាលេងបានល្អ។ យើងមិនមានលេសអ្វីទាំងអស់ ព្រោះការប្រកួតថ្ងៃនេះវិសាខា ពិតជាលេងបានល្អជាងយើងមែន»។
តាមរយៈការប្រកួតនៅកីឡដ្ឋានខេត្តស្វាយរៀង កាលពីថ្ងៃអាទិត្យនោះ ខ្សែប្រយុទ្ធប្រេស៊ីល De Andrade Souza Ramon ជាអ្នករកបានគ្រាប់បាល់បើកឆាកឱ្យក្រុមវិសាខា តាមរយៈការឈូសបាល់ធ្លាក់ចេញពីដៃរបស់អ្នកចាំទី វីរៈ ដារ៉ា បញ្ចូលទី នៅនាទីទី១៩។
ប៉ុន្តែការព្យាយាមចេញទៅសង្រ្គោះបាល់របស់អ្នកចាំទី កែវ សុខសិលា បានបង្កជាកំហុសនាំឱ្យខ្សែប្រយុទ្ធប្រេស៊ីល Matheus Moresche ដួលនៅក្នុងតំបន់គ្រោះថ្នាក់។
ខ្សែប្រយុទ្ធ Gayoso Javier Augustine បានបង្ហាញក្តីរំភើបរហូតស្រក់ទឹកភ្នែក ចំពោះការរកបានគ្រាប់ជួយឱ្យក្រុមភ្នំពេញក្រោន យកឈ្នះក្រុមណាហ្គាវើលដ៍ ១-០ នៅនាទីទី៩០+១។ រូបថត CPL
លោកអាជ្ញាកណ្តាល បានផ្តល់បាល់ពិន័យ១១ម៉ែត្រទៅឱ្យក្រុមស្វាយរៀង ហើយ Matheus ជាអ្នកស៊ុតបានសម្រេចដោយខ្លួនឯង នៅនាទីទី២៣។
តែទោះបីជាយ៉ាងណា គ្រាប់បាល់របស់ ឡេង ណូរ៉ា នៅនាទីទី៨១ បានជួយឱ្យក្រុមវិសាខា ឈ្នះក្រុមស្វាយរៀង ២-១ យ៉ាងរំភើបបំផុត។
ជ័យជម្នះនេះ ក៏ជាការបញ្ចប់កំណត់ត្រា មិនធ្លាប់ចាញ់នៅលើទឹកដីខ្លួនឯង ក្នុងរយៈពេល១ឆ្នាំ និង៣ខែរបស់ក្រុមស្វាយរៀងផងដែរ បន្ទាប់ពីពួកគេបានចាញ់ក្រុម ISI ដង្កោសែនជ័យ ២-១ ចុងក្រោយបង្អស់ នៅលើទឹកដី កាលពីថ្ងៃទី៩ ខែធ្នូ ឆ្នាំ២០២៣។
យ៉ាងណាក៏ដោយ លោក Pep បានមើលឃើញថា ការដាក់ចិត្តរបស់ក្រុមវិសាខា សមនឹងទទួលបានជ័យជម្នះនេះហើយ។ គ្រូបង្វឹកក្រុមស្វាយរៀងរូបនេះ បានបញ្ជាក់ថា៖ «យើងបានឈ្នះច្រើនសប្តាហ៍មកហើយ តែសប្តាហ៍នេះ យើងមិនទទួលបានជ័យជម្នះទេ ហើយយើងមិនមានលេសអ្វីឡើយ ព្រោះការប្រកួតនេះ វិសាខា ចាប់ផ្តើមបានល្អជាង និងមានមហិច្ឆតាខ្លាំងជាងយើង ហើយចុងក្រោយពួកគេ ទទួលបានជោគជ័យ»។
លោក Pep បានបន្ថែមថា៖ «វិសាខា មានទំនុកចិត្តក្នុងការលេង ជាមួយកីឡាកររបស់គាត់ ដែលមានគុណភាពទាំងអ្នកលេងនៅក្នុងជម្រើស១១នាក់ដំបូង និងកីឡាករបម្រុង ហើយវាស័ក្តិសមហើយ ដែលវិសាខា ពេលនេះកំពុងមានលទ្ធភាពប្រកួតប្រជែងយកពានជាមួយពួកយើង»។
តាមរយៈការដណ្តើមបាន៣ពិន្ទុដ៏មានន័យពីក្រុមស្វាយរៀង កាលពីថ្ងៃអាទិត្យនោះ បានជួយឱ្យក្រុមវិសាខា មានភាគរយកាន់តែខ្ពស់ ក្នុងការដណ្តើមយកពានជាមួយក្រុមស្វាយរៀង និងក្រុមភ្នំពេញក្រោន ដែលបានយកឈ្នះក្រុមណាហ្គាវើលដ៍ ១-០ ទាំងលំបាកបំផុត។
ខ្សែប្រយុទ្ធ Gayoso Javier Augustine របស់ភ្នំពេញក្រោន បានសម្រក់ទឹកភ្នែកបង្ហាញក្តីរំភើបជាមួយមិត្តរួមក្រុម បន្ទាប់ពីរូបគេ បានផ្សព្វគ្រោះថ្នាក់ទៅទាត់បាល់បញ្ចូលទី នៅនាទីទី ៩០+១។
ចំណែកក្រុមបឹងកេត បានវាយបកយកឈ្នះក្រុមអង្គរថាយហ្គឺរ ២-១ កាលពីថ្ងៃអាទិត្យនោះដែរ ហើយតាមលទ្ធផលប្រកួតប្រជែងរវាងក្រុមកំពូលតារាងទាំង៦ (Top6) នេះ គឺក្រុមស្វាយរៀង បន្តឈរនៅកំពូលតារាង ដោយមាន៥៨ពិន្ទុ តាមពីក្រោយដោយក្រុមភ្នំពេញក្រោន មាន៥៧ពិន្ទុ និងក្រុមវិសាខា មាន៥៣ពិន្ទុ។
ក្រុមទាំង៣នេះ បានក្លាយជាគូប្រជែងយ៉ាងស្វិតស្វាញ ក្នុងការដណ្តើមគ្នាយកពានលីគកំពូលកម្ពុជា រដូវកាលនេះ ខណៈក្រុមអង្គរថាយហ្គឺរ ឈរនៅលេខ៤ មាន៤០ពិន្ទុ ក្រុមណាហ្គាវើលដ៍ ឈរនៅលេខ៥ មាន៣៦ពិន្ទុ និងក្រុមបឹងកេត ឈរនៅលេខ៦ក្រោយគេក្នុង Top6 នេះ ដោយមាន៣៣ពិន្ទុ៕
