ក្រុមព្រះខ័នរាជស្វាយរៀង បានអបអរសាទរ ចំពោះការទទួលបានឱកាសឡើងទៅប្រកួតវគ្គពាក់កណ្តាលផ្តាច់ព្រ័ត្រ ក្រោយចាញ់ Shan Unites ២-១ សម្រាប់ការប្រកួតជើងទី២ នៅក្រៅទឹកដី ពីយប់មិញ។ រូប ស្វាយរៀង
ក្រុមព្រះខ័នរាជស្វាយរៀងរបស់កម្ពុជា ត្រូវជួបគូសត្រូវចាស់ Madura United របស់ឥណ្ឌូនេស៊ី នៅក្នុងវគ្គពាក់កណ្តាលផ្តាច់ព្រ័ត្រពានរង្វាន់ AFC Challenge League 2024-2025។
ក្រុមព្រះខ័នរាជស្វាយរៀងមិនអាចរក្សាភាពខ្លាំងរបស់ខ្លួន ក្នុងការប្រកួតជើងទី២ នៅលើទឹកដីក្រុម Shan United បាននោះទេ ដោយពួកគេបានចាញ់ ២-១ វិញ ប៉ុន្តែការឈ្នះ ៦-២ នៅជើងទី១ វានៅតែជួយឱ្យស្វាយរៀង អាចបង្កើតប្រវត្តិសាស្រ្តរបស់ក្លិបដដែល ដោយឈានដល់វគ្គ១/២ផ្តាច់ព្រ័ត្រ។
សម្រាប់ការប្រកួតជើងទី២ នៅ Thuwunna Stadium ទីក្រុង Yangond ប្រទេសមីយ៉ាន់ម៉ា កាលពីព្រលប់ថ្ងៃព្រហស្បតិ៍ម្សិលមិញនេះ លោក Pep Munoz បានផ្លាស់ប្តូរសមាសភាពកីឡាករនៅក្នុងជម្រើស១១នាក់ដំបូងមួយចំនួន។ លោកមិនបានដាក់កីឡាករសំខាន់ Gabriel Silva និង Cristian Roque ឱ្យចូលលេងក្នុងជម្រើស១១នាក់ដំបូងទេ ហើយខ្សែការពារជាប្រធានក្រុម សឿយ វិសាល ក៏បានអង្គុយក្នុងកៅអីបម្រុងដែរ គឺដាក់ជំនួសវិញដោយខ្សែការពារ Hikaru Mizuno។
ប៉ុន្តែក្បួនថ្មីនេះ បែរជាធ្វើឱ្យក្រុមព្រះខ័នរាជស្វាយរៀង ធ្លាក់ទៅក្នុងក្តីកង្វល់ បន្ទាប់ពីក្រុមម្ចាស់ផ្ទះ Shan United រកបាន២គ្រាប់ ត្រឹមរយៈពេល២៦នាទី ដើម្បីកាត់បន្ថយគ្រាប់បាល់នាំមុខរបស់ក្រុមស្វាយរៀង ពីលទ្ធផលឈ្នះ ៦-២ នៅជើងទី១ មកនៅត្រឹម ៦-៤ ជាបណ្តោះអាសន្ននោះ។
ការរកបានគ្រាប់បាល់យ៉ាងលឿនរបស់កីឡាករ Khun Kyan Zin Hein នៅត្រឹមនាទីទី១ និងការបន្ថែម១គ្រាប់ទៀតរបស់ Ye Yint Aung នៅនាទីទី២៦ បានធ្វើឱ្យក្រុម Shan United កាន់តែមានសម្ទុះខ្លាំង ក្នុងរកគ្រាប់បាល់បន្ថែម។
សកម្មភាពនេះបានបង្ខំឱ្យ លោក Pep Munoz សម្រេចដក Hikaru Mizuno និង គឹម សុខយុទ្ធ ចេញនៅនាទីទី៣០ ហើយដាក់ សឿយ វិសាល និង Cristian Roque ឱ្យចូលលេងវិញ។ រីឯខ្សែប្រយុទ្ធ Gabriel Silva ក៏ត្រូវដាក់ឱ្យលេងជំនួស ថេឡរ ឌឿន នីកូឡាស នៅនាទីទី៤៦ផងដែរ។
ជាមួយការផ្លាស់ប្តូរនេះ បានធ្វើឱ្យគុណភាពលេងរបស់ក្រុមស្វាយរៀង មានភាពប្រសើរឡើងវិញ ហើយការបង្កើតកំហុសរបស់ក្រុម Shan United ដែលបុកឱ្យខ្សែប្រយុទ្ធ Bounphachan Kounkong ដួលនៅតំបន់គ្រោះថ្នាក់នោះ នាំឱ្យលោកអាជ្ញាកណ្តាល ផ្តល់បាល់ពិន័យ១១ម៉ែត្រឱ្យក្រុមស្វាយរៀង ហើយខ្សែប្រយុទ្ធ ប្រេស៊ីល Matheus Moresche ជាអ្នកស៊ុតបានសម្រេច នៅនាទីទី៥៦។
បន្ថែមលើនេះ ក្រុមស្វាយរៀង ក៏បានបង្កើតឱកាសល្អ ២ទៅ៣ដងទៀតផងដែរ ប៉ុន្តែស៊ុតមិនបានសម្រេច នាំឱ្យពួកគេចាញ់ក្រុម Shan United ២-១ នៅជើងទី២នេះ។
តែទោះយ៉ាងណា បើគិតពីលទ្ធផលការប្រកួតទាំង២ជើង គឺក្រុមស្វាយរៀង នៅតែឈ្នះក្រុម Shan United ៧-៤ ដើម្បីបន្តដំណើរឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ជាប្រវត្តិសាស្រ្តលើកដំបូងរបស់ក្លិបមួយនេះ ហើយពួកគេ ក៏ទទួលបានប្រាក់រង្វាន់បន្ថែមចំនួន១២ម៉ឺនដុល្លារ ចំពោះការឡើងទៅវគ្គបន្តនេះដែរ។
ក្រុមស្វាយរៀង ត្រូវឡើងទៅជួបក្រុម Madura United បន្ទាប់ពីក្រុមមកពីលីគកំពូលឥណ្ឌូនេស៊ី មួយនេះ បានយកឈ្នះក្រុម Tainan City របស់ឆាយនីសតៃប៉ិ ៣-០ ក្នុងការប្រកួតជើងទី២ កាលពីថ្ងៃព្រហស្បតិ៍នោះដែរ ដើម្បីលុបចោលការស្មើគ្នា ០-០ សម្រាប់ការប្រកួតជើងទី១ នៅលើទឹកដីក្រុម Tainan City កាលពីថ្ងៃទី៦ ខែមីនា។
រំឭកទៅដល់ក្រុម Madura United នេះគឺពួកគេធ្លាប់បានយកឈ្នះក្រុមព្រះខ័នរាជស្វាយរៀង ២-១ សម្រាប់ការជួបគ្នា ក្នុងវគ្គចែកពូល ចំណែកការជួបគ្នាជាថ្មី ក្នុងវគ្គ១/២ផ្តាច់ព្រ័ត្រនេះ ក្រុមទាំង២ ត្រូវប្រកួតគ្នា២ជើង គឺជើងទី១ ថ្ងៃទី១០ ខែមេសា ត្រូវធ្វើនៅលើទឹកដីកម្ពុជា និងជើងទី២ ថ្ងៃទី១៧ មេសា ធ្វើនៅទឹកដីឥណ្ឌូនេស៊ី ហើយក្រុមឈ្នះ នឹងត្រូវឡើងទៅវគ្គផ្តាច់ព្រ័ត្រ ដែលអាចជួបក្រុម Al-Arabi របស់កូវ៉ែត ឬ ក្រុម Arkadag របស់ប្រទេសតួកមេនីស្ថាន។
សម្រាប់ការឡើងមកជួបក្រុម Madura United របស់ឥណ្ឌូនេស៊ី នៅវគ្គ១/២ផ្តាច់ព្រ័ត្រនេះ លោក Pep Munoz បានគិតទុកមុនរួចមកហើយ បន្ទាប់ពីក្រុមស្វាយរៀង បានយកឈ្នះក្រុម Shan United ៦-២ នៅពហុកីឡដ្ឋានជាតិមរតកតេជោ កាលពីថ្ងៃទី៦ ខែមីនា ហើយនេះជាអ្វីដែលលោកបានជំរុញកូនក្រុមរបស់លោក ត្រូវធ្វើការឱ្យបានខ្លាំងថែមទៀត ទើបអាចឈានទៅដល់ការប្រកួតវគ្គផ្តាច់ព្រ័ត្របាន។
«បើយើងចង់លេងដល់វគ្គផ្តាច់ព្រ័ត្រ គឺយើងត្រូវធ្វើម៉េចឱ្យការប្រកួតប្រជែងរបស់យើងខ្លាំងជាងនេះទៀត»។ លោក Pep បានបញ្ជាក់បែបនេះ ក្រោយយកឈ្នះក្រុម Shan United ៦-២ ហើយការចាញ់ Shan United ២-១ វិញ នៅជើងទី២នេះ វាបានក្លាយជាបទពិសោធន៍មួយទៀត សម្រាប់លោក Pep ក្នុងការពង្រឹងចំណុចខ្វះខាតរបស់ក្រុមស្វាយរៀង មុនជួបក្រុម Madura United នៅវគ្គពាក់កណ្តាលផ្តាច់ព្រ័ត្រ៕
