កីឡាករ ហុងសុវណ្ណ ចាន់សុធី បានវាយទៅលើ Ncedo Gomba សម្រាប់ការប្រកួតដណ្តើមខ្សែក្រវាត់ នៅលើទឹកដីខេត្តស្វាយរៀង កាលពីយប់ថ្ងៃអាទិត្យ។ រូបថត ទទក
កីឡាករជើងខ្លាំងរបស់អាហ្រ្វិកខាងត្បូង Ncedo Gomba បានរបូតខ្សែក្រវាត់ Krud Kun Khmer ដែលរូបគេដណ្តើមបានពី ពេជ្រ សម្បត្តិ ហើយ បន្ទាប់ពីរូបគេ បានបរាជ័យក្នុងការប្រកួតការពារ ពីការដណ្តើមរបស់កីឡាករកំពុងឡើងជើង និងទទួលបានជោគជ័យក្នុងអាជីព ហុងសុវណ្ណ ចាន់សុធី នោះ។
មុនការប្រកួតគ្នា នៅលើសង្វៀនគ្រុឌគុនខ្មែរ លើទីតាំងដីឡូត៍ ភូមិតាត្រាវ ឃុំកំពង់ត្រាច ស្រុករមាសហែក ខេត្តស្វាយរៀង កាលពីយប់ថ្ងៃអាទិត្យ កន្លងមកនេះ អ្នកគាំទ្រភាគច្រើន មិនរំពឹងថា ហុងសុវណ្ណ ចាន់សុធី អាចទប់ Gomba ដល់៥ទឹកនោះទេ ព្រោះជើងខ្លាំងរូបនេះ មានសមត្ថភាពខ្លាំង ដោយធ្លាប់ដណ្តើមបានខ្សែក្រវាត់ពីម្ចាស់មេដាយមាស ឃីម ឌីម៉ា និងធ្លាប់ឈ្នះ១ និងចាញ់១ ជាមួយ ពេជ្រ សម្បត្តិ បន្ទាប់ពីរូបគេបានចាញ់ដោយសន្លប់ ក្រោមទម្ងន់ជើង លន បញ្ញា សម្រាប់ការមកប្រកួតជាលើកដំបូង នៅប្រទេសកម្ពុជា។
ប៉ុន្តែតាមរយៈការប្រកួតជាក់ស្តែង៥ទឹកពេញនោះ ហុងសុវណ្ណ ចាន់សុធី ពិតជាធ្វើបានយ៉ាងល្អ ដោយរូបគេបានវាយចូលគោដៅពេញៗ និងមានប្រៀបខ្លាំង នៅពេលចូលចាប់ឱប ព្រោះរូបគេអាចប្រើជង្គង់ និងវាយកែងទៅលើ Gomba បណ្តាលឱ្យកីឡាកររបស់អាហ្វ្រិកខាងត្បូងម្នាក់នេះ មានស្នាមបែកនៅទឹកទី៥ មុនពេលប្រកាសឱ្យចាញ់ដោយពិន្ទុដាច់ ៥-០។
Gomba បានទទួលស្គាល់ថា ពិតជាបានចាញ់ ហុងសុវណ្ណ ចាន់សុធី ហើយរូបគេបានសរសើរថា ចាន់សុធី ពិតជាមានភាពវៃឆ្លាតក្នុងការប្រកួត ហើយថែមទាំងមានបច្ចេកទេសវាយកែងបានល្អទៀត។ «ការប្រកួតនេះ ពិតជាល្អមែនទែន គ្រាន់តែដៃគូរបស់ខ្ញុំ ខ្ពស់ជាង ងាយស្រួលក្នុងការចូលចាប់ខ្ញុំ ហើយគាត់មានភាពឆ្លាតវៃក្នុងការវាយចេញ ជាពិសេសវាយកែងតែម្តង»។
កីឡាករមកពីអាហ្រ្វិកខាងត្បូងរូបនេះ បានបន្ថែមថា៖ «ខ្ញុំពិបាកដេញតាមវ៉ៃគាត់ ព្រោះខ្ញុំទាបជាង ហើយគាត់មានភាពឆ្លាតវៃ ក្នុងការរំដោះខ្លួន និងវាយស្កាត់មកលើខ្ញុំវិញ តាមរយៈការទាត់ និងបោះជង្គង់ ហើយខ្ញុំមានការប្រយ័ត្នបំផុតទៅលើការប្រើកែងរបស់គាត់ ដោយសារគាត់មានកែងល្អ និងអាចផ្លាស់ប្តូរចលនាវាយបានលឿនរហ័សទៀត»។
ជាមួយគ្នានេះ Gomba បានទម្លាយថា រូបគេបានដឹងរួចទៅហើយថា ការជួប ហុងសុវណ្ណ ចាន់សុធី នឹងមានការពិបាក។ «ពេលមើលវីដេអូនៃការប្រកួត ខ្ញុំឃើញគាត់វែងជាងខ្ញុំ ហើយគាត់ពិតជាល្អមែនទែន។ ខ្ញុំប្រយ័ត្នបំផុតនោះ គឺកែងរបស់គាត់ ប៉ុន្តែមិនអ្វីទេ គាត់ស្វាគមន៍ខ្ញុំ ដូច ពេជ្រ សម្បត្តិ ដែរ ដោយគាត់មានភាពឆ្លាតវៃ ប៉ុន្តែខ្ញុំចូលចិត្តរបៀបវាយរបស់ ពេជ្រ សម្បត្តិ ជាង គឺព្យាយាមបុក និងមានកម្លាំងខ្លាំងជាង»។
ចំណែកកីឡាករ ហុងសុវណ្ណ ចាន់សុធី ក៏បានសារភាពថា មានការពិបាក ក្នុងការយកឈ្នះ Gomba។ គេបាននិយាយថា៖ «ការប្រកួត៥ទឹកនេះ ពិតជាតឹង ព្រោះគាត់ល្អ ហើយកម្លាំងរបស់គាត់ពេញល្អ តែគាត់ខ្លីជាងយើង អ៊ីចឹងគាត់រាងពិបាកក្នុងការចូលវាយមកលើយើង ព្រោះវាយអត់សូវដល់គោលដៅ។
ហុងសុវណ្ណ ចាន់សុធី ដែលទើបបានឈ្នះឡានថ្មី ពីការប្រកួត កាលពីកញ្ញា និងឈ្នះបានខ្សែក្រវាត់ ការប្រកួតម៉ាតុង កាលពីខែតុលា ឆ្នាំ២០២៤នោះ បានបន្ថែមថា៖ «ខ្ញុំត្រៀមខ្លួនបានល្អ ហើយខ្ញុំចាប់ក្បាច់ Gomba បាន បន្ទាប់ពីការធ្វើតេស្តរកចំណុចសំខាន់ នៅក្នុងទឹកទី១។ ខ្ញុំវាយកែងចូលគាត់ច្រើន តែគាត់ពិតជាស្វិត និងធន់ ហើយគាត់ក៏បានម៉ាត់ចូលខ្ញុំច្រើនដែរ គឺទម្ងន់ដៃរបស់គាត់ធ្ងន់»៕
