ប្រធានសហព័៍ន្ធកីឡាប្រដាល់កម្ពុជា លោក ប៊ុយ សុភ័ណ្ឌ បានអបអរចំពោះការដាក់ប្រដាល់សកល ឱ្យមានការប្រកួតនៅអូឡាំពិកហ្គេម ឡើងវិញ។ រូបថត សហការី
ប្រធានសហព័ន្ធកីឡាប្រដាល់សកលកម្ពុជា លោក ប៊ុយ សុភ័ណ្ឌ បានចាត់ទុកការសម្រេច ដាក់ឱ្យមានការប្រកួតកីឡាប្រដាល់សកលឡើងវិញ ក្នុងព្រឹត្តិការណ៍កីឡាអូឡាំពិកថា ជាការបើកផ្លូវឱ្យសហហព័ន្ធកីឡាប្រដាល់សកលនៅគ្រប់ប្រទេស រួមទាំងកម្ពុជា មានក្តីសង្ឃឹម ក្នុងការទទួលបានការគាំទ្រពីស្ថាប័នជាតិ និងអន្តរជាតិ ក្នុងការអភិវឌ្ឍវិស័យកីឡានេះឱ្យមានការរីកចម្រើនទៅមុខទៀត។
ការលើកឡើងបែបនេះរបស់លោក ប៊ុយ សុភ័ណ្ឌ គឺដោយសារតែគណៈកម្មាធិការជាតិអូឡាំពិកអន្តរជាតិ (IOC) ទើបតែបានសម្រេចជាថ្មី ក្នុងការដាក់បញ្ចូលប្រភេទកីឡា «ប្រដាល់សកល» ឱ្យមានការប្រកួតនៅអូឡាពិកវិញ នៅក្នុងមហសន្និបាតរបស់ IOC នៅប្រទេសក្រិក កាលពីថ្ងៃទី២០ ខែមីនា។
តាមការសម្រេចនេះ ប្រដាល់សកល នឹងត្រូវដាក់ឱ្យមានការប្រកួត ឡើងជាផ្លូវការ ក្នុងព្រឹត្តិការណ៍អូឡាំពិករដូវក្ដៅ ឆ្នាំ២០២៨ នៅទីក្រុង Los Angeles សហរដ្ឋអាមេរិក។
ការសម្រេចនេះ ក៏ដោយសារតែ IOC ទើបបានទទួលស្គាល់ស្ថាប័នប្រដាល់សកលពិភពលោក «World Boxing» ជំនួសសមាគមកីឡាប្រដាល់សកលអន្តរជាតិ (IBA) ដែលត្រូវបាន ដកបេក្ខភាពជាសមាជិកចេញពី IOC កាលពីឆ្នាំ២០២៤ បន្ទាប់ពីបានរកឃើញភាពមិនប្រក្រតីមួយចំនួន ជុំវិញការគ្រប់គ្រងទាំងទៅលើគណនេយ្យភាព និងការរៀបចំប្រកួតរបស់ IBA ក្នុងការប្រកួតកីឡាអូឡាពិក តាំងពីឆ្នាំ២០១៦មក។
ជាមួយគ្នានេះ សហព័ន្ធកីឡាប្រដាល់សកលកម្ពុជា ដែលជាសមាជិកពេញសិទ្ធិរបស់World Boxing បានសម្តែងការសាទរ ចំពោះការសម្រេចជាថ្មីរបស់ IOC នេះ ហើយបានចាត់ទុកលទ្ធផលនេះ ថាជាការបើកផ្លូវ ក៏ដូចជាផ្តល់ឱកាសឱ្យគ្រប់សហព័ន្ធកីឡាប្រដាល់សកល នៅគ្រប់ប្រទេស មានសង្ឃឹមឡើងវិញ ក្នុងការជំរុញឱ្យប្រភេទកីឡានេះមានសម្ទុះឡើងវិញ ដើម្បីចូលរួមប្រកួតប្រជែង នៅអូឡាំពិកហ្គេម ដែលជាព្រឹត្តិការណ៍បំផុតរបស់ពិភពលោក។
លោក ប៊ុយ សុភ័ណ្ឌ បានថ្លែងថា៖ «ការសម្រេចដាក់ឱ្យមានការប្រកួតប្រដាល់សកល នៅអូឡាំពិកឡើងវិញនេះ ពិតជារឿងដ៏សំខាន់ណាស់ សម្រាប់សហព័ន្ធកីឡាប្រដាល់សកល នៅគ្រប់ប្រទេសទាំងអស់ ព្រោះការប្រកួតនៅអូឡាំពិក គឺជាក្ដីស្រមៃសំខាន់របស់ កីឡាករ កីឡាការិនីទាំងអស់ នៅទូទាំងពិភពលោក ក្នុងការចូលរួម ក៏ដូចជាដណ្ដើមមេដាយក្នុងព្រឹត្តិការណ៍ដែលជាការប្រកួតកម្រិតកំពូលរបស់ពិភពលោកនេះ»។
បន្ថែមលើនេះ ការសម្រេចដាក់បញ្ចូលប្រដាល់សកល ទៅក្នុងការប្រកួតអូឡាំពិក ឆ្នាំ២០២៨វិញនេះ ក៏បានផ្តល់ផលចំណេញដល់សហព័ន្ធកីឡាប្រដាល់សកល នៅគ្រប់ប្រទេសទាំងអស់ ឱ្យទទួលបានការគាំទ្រ និងជំរុញការផ្សព្វផ្សាយពីអាជ្ញាធរកីឡា នៅតាមប្រទេសនីមួយៗ ក៏ដូចជាទទួលបានការជួយគាំទ្រពីស្ថាប័នអន្តរជាតិ សម្រាប់ទ្រទ្រង់ដល់ការអភិវឌ្ឍកីឡាប្រដាល់សកផងដែរ។
នៅត្រង់ចំណុចនេះ លោក ប៊ុយ សុភ័ណ្ឌ បានលើកយកស្ថានភាពជាក់ស្តែងពីការគ្រប់គ្រងសហព័ន្ធកីឡាប្រដាល់សកលកម្ពុជា មកបញ្ជាក់បែបនេះថា៖ «ជាក់ស្ដែងនៅកម្ពុជា ពេលយើងកំណត់ក្របខណ្ឌជាសហព័ន្ធកីឡាអូឡាំពិក គឺយើងទទួលបានការគាំទ្រ ក៏ដូចជាផ្ដោតយកចិត្តទុកដាក់ជាអាទិភាព សម្រាប់ប្រភេទកីឡាអូឡាំពិកពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា»។
លោកបានបន្ថែមថា៖ «ចំណែកសហព័ន្ធអន្តរជាតិ ក៏មានការគាំទ្រច្រើនពាក់ព័ន្ធទៅនឹងសហព័ន្ធកីឡាជាតិផ្ទាល់ ហើយសហព័ន្ធកីឡាជាតិទាំងនោះ នឹងទទួលបានថវិកាជាគម្រោងគាំទ្រឧបត្ថម្ភពីគណៈកម្មាធិការអូឡាំពិកអន្តរជាតិ ទៅលើការគាំទ្រប្រភេទកីឡាប្រដាល់សកល លើពិភពលោក ហើយនេះក៏ជាយុទ្ធសាស្ត្រសំខាន់របស់សហព័ន្ធ ក្នុងការផ្ដោតក៏ដូចជាលើកកម្ពស់ប្រភេទកីឡាអូឡាំពិក ដែលនៅទូទាំងពិភពលោកមានការផ្តោតសំខាន់»។
ប្រធានសហព័ន្ធកីឡាប្រដាល់សកលកម្ពុជា លោក សុភ័ណ្ឌ បញ្ជាក់ថា៖ «អ៊ីចឹងនេះជារឿងសំខាន់របស់សហព័ន្ធកីឡាជាតិរបស់ប្រទេសនីមួយៗ ក្នុងការលើកកម្ពស់ និងអភិវឌ្ឍវិស័យកីឡាប្រដាល់សកល នៅតាមប្រទេសរបស់ពួកគាត់ ក៏ដូចជាទាក់ទាញកីឡាករ កីឡាការិនីទាំងសកលអាជីព និងសកលស្ម័គ្រចិត្ត ដើម្បីចូលរួមលើកកម្ពស់ការអភិវឌ្ឍនូវគុណផល និងគុណវុឌ្ឍិរបស់ពួកគេផងដែរ»៕
