លោក ឃឹម វុទ្ធី និងលោក សំអាង វឌ្ឍនៈ ពេលឡើងប្រគល់ពានដល់កីឡាករថ្នាល រិទ្ធី បូរិន កាលពីយប់ថ្ងៃអាទិត្យ។ រូបថត ទទក
ព្រឹត្តិការណ៍ប្រកួតប្រដាល់គុនខ្មែរ នៅបុណ្យទន្លេ ខេត្តតាកែវ ត្រូវបានអ្នករៀបចំរបស់សង្វៀនគ្រុឌគុនខ្មែរ នៃស្ថានីយទូរទស្សន៍ជាតិកម្ពុជា (ទទក) អះអាងថា ទទួលបានជោគជ័យលើសពីការរំពឹងទុក ដោយមានការគាំទ្រច្រើនបំផុត ជាពិសេសការប្រកួតមិត្តភាពអន្តរជាតិដណ្តើមពាន និងប្រាក់លានរបស់កីឡាករថ្នាលកម្ពុជា ជាមួយថ្នាលលំដាប់របស់ថៃ ដោយថ្នាលកម្ពុជា បានឈ្នះពានទាំង២នាក់ ធ្វើឱ្យមានការភ្ញាក់ផ្អើលខ្លាំង។
លោក ម៉ុល នី ប្រធានផ្គូផ្គងការប្រកួតប្រចាំសង្វៀនគ្រុឌគុនខ្មែរ របស់ស្ថានីយទូរទ្សន៍ទទក បានប្រាប់នៅថ្ងៃចន្ទនេះថា៖ «ការប្រកួតរបស់សង្វៀនគ្រុឌគុនខ្មែរ នៅបុណ្យទន្លេ គឺទទួលបានការគាំទ្រ និងអបអរសាទរខ្លាំងពីប្រជាពលរដ្ឋនៅខេត្តតាកែវ ដោយមានអ្នកគាំទ្រពេញតែម្តង ហើយពួកគាត់បានស្រែកហ៊ោរគាំទ្រដល់ការប្រកួត និងគុនខ្មែររបស់យើងខ្លាំងណាស់»។
លោកបន្ថែមថា៖ «អ្វីដែលអស្ចារ្យនោះ គឺការប្រកួតថ្នាលដណ្តើមពាន និងប្រាក់លានរវាងកីឡាករថ្នាលរបស់យើង រិទ្ធី បូរិន និង រិទ្ធី គីងកុង ជាមួយកីឡាករថ្នាលរបស់ថៃ។ ថ្នាលរបស់យើង បានឈ្នះទាំង២នាក់ ដោយមានការគាំទ្រច្រើនលើសលុប និងមានអ្នកទស្សនាតាមការផ្សាយផ្ទាល់ ៦៨ K គឺយើងមិនរំពឹងថា មានការគាំទ្រច្រើនដល់ថ្នាក់នេះទេ»។
ចំពោះការប្រកួតមិត្តភាពអន្តរជាតិ ចំនួន៦គូ ក្នុងចំណោមការប្រកួតសរុបចំនួន១៤គូ នៅបុណ្យទន្លេ ក្នុងស្រុកដូនកែវ ខេត្តតាកែវ កាលពីយប់ថ្ងៃសៅរ៍ និងថ្ងៃអាទិត្យ កន្លងមកនេះ គឺកីឡាករជើងខ្លាំង ឡៅ ចន្ទ្រា, ខេម ចាន់ និង អ៊ូច ធារិទ្ធ សុទ្ធតែបានផ្តួលកីឡាករបរទេសឱ្យសន្លប់ ខណៈ ធន់ ផានិត បានសម្រេចការសងសឹកលើកីឡាករមីយ៉ាន់ម៉ា Saw John តាមរយៈការយកឈ្នះដោយពិន្ទុ ប៉ុន្តែជើងខ្លាំង ពេជ្រ ប៊ុនសិទ្ធ បានចាញ់ពិន្ទុអ្នកប្រដាល់ថៃ ហើយ រឿម វណ្ណៈ បានសន្លប់ទឹកទី១ ក្រោមថ្វីដៃកីឡាករប៊ែលហ្ស៊ិក។
ការប្រកួតរវាងកីឡាករថ្នាលកម្ពុជា រិទ្ធី គីងកុង និងកីឡាករថ្នាលរបស់ថៃ Beth Senlake នៅខេត្តតាកែវ កាលពីថ្ងៃអាទិត្យ។ រូបថត ទទក
ដោយឡែក ការប្រកួតដណ្តើមពាន និងប្រាក់លានវិញ កីឡាករថ្នាលរបស់កម្ពុជា រិទ្ធី គីងកុង និង រិទ្ធី បូរិន សុទ្ធតែបានបង្ហាញពីសមត្ថភាពប្រកួតយ៉ាងល្អបំផុត ក្នុងការយកឈ្នះដោយពិន្ទុ និងផ្តួលឱ្យសន្លប់ លើកីឡាករថ្នាលលំដាប់ប្រទេសរបស់ថៃ ដើម្បីទទួលបានពាន និងប្រាក់រង្វាន់ចំនួន១លានរៀលដូចគ្នា។
តាមរយៈការប្រកួតកាលពីយប់ថ្ងៃអាទិត្យនោះ រិទ្ធី គីងកុង ពិតជាធ្វើបានល្អបំផុត ដោយបានវាយកែងផ្តួលកីឡាករថ្នាលរបស់ថៃ Beth Senlake ឱ្យសន្លប់ធំ នៅក្នុងទឹកទី២ បន្ទាប់ពីវាយឱ្យអាជ្ញាកណ្តាលរាប់១លើក នៅចុងទឹកទី១ ហើយនេះជាផ្តួលដៃគូឱ្យសន្លប់ជាលើកទី៦ ក្នុងជ័យជម្នះលើកទី១១របស់ គីងកុង គឺរូបគេមិនដែលចាញ់ឡើយ។
ការផ្តួល Beth Senlake ឱ្យសន្លប់ក្នុងទឹកទី២ នៅលើទឹកដីកំណើតក្នុងខេត្តតាកែវនេះ បានធ្វើឱ្យកីឡាករទម្ងន់២៤គីឡូក្រាម រិទ្ធី គីងកុង កាន់តែមានឈ្មោះបោះសំឡេងខ្លាំង។
ចំណែកកីឡាករថ្នាលទម្ងន់៣៦គីឡូក្រាម រិទ្ធី បូរិន បានយកឈ្នះកីឡាករថ្នាលលំដាប់ប្រទេសរបស់ថៃ Kongpychit K.Kolka ដោយពិន្ទុ។
យ៉ាងណាក៏ដោយ ជ័យជម្នះ និងការឈ្នះពានរបស់ រិទ្ធី បូរិន គឺទទួលបានទាំងលំបាក ព្រោះនៅក្នុងការប្រកួត៥ទឹកពេញនោះ បូរិន ត្រូវបាន Kongpychit វាយកែងបណ្តាលឱ្យមានរបួសក្តោងច្រមុះ មានឈាមហូរស្រក់មិនដាច់តាំងពីទឹកទី៣ ប៉ុន្តែ បូរិន ពិតជាបានស៊ូទ្រាំខ្លាំង ដើម្បីទទួលបានជ័យជម្នះដោយពិន្ទុ ហើយនេះក៏ជាការសងសឹកទៅឱ្យមិត្តរួមជាតិ រិទ្ធី ហុងបញ្ញា ដែលធ្លាប់ចាញ់ Kongpychit កន្លងមកផងដែរ។
ការប្រកួតរវាងកីឡាករថ្នាល រិទ្ធី បូរិន និងអ្នកប្រដាល់ថ្នាលរបស់ថៃ Kongpychit K.Kolka។ រូបថត ទទក
ជាមួយការដាក់ឱ្យមានការប្រកួតថ្នាលដណ្តើមពាន និងប្រាក់លាននេះ លោក ម៉ុល នី បានអះអាងថា វាជាការបណ្តុះថ្នាល ឬទំពាំងស្នងឫស្សី ជាមួយគោលដៅ និងទស្សនវិស័យឆ្ងាយដ៏ត្រឹមត្រូវមួយ ក្រោមការជំរុញរបស់លោក ឃឹម វុទ្ធី អគ្គនាយកស្ថានីយទូរទស្សន៍ជាតិកម្ពុជា និងលោក សំអាង វឌ្ឍនៈ ដែលជាអ្នកឧបត្ថម្ភធំប្រចាំសង្វៀនគ្រុឌគុនខ្មែរ នេះ ហើយតែងតែរៀបចំឱ្យមានការប្រកួតផ្នែកនារីជាប្រចាំផងដែរ។
លោកបានបញ្ជាក់ថា៖ «សង្វៀនគ្រុឌគុនខ្មែរ តែងតែផ្តល់ឱកាសឱ្យមានការប្រកួតថ្នាល និងប្រកួតផ្នែកនារី ព្រោះយើងមើលឃើញជ្រៅក្នុងការបណ្តុះបណ្តាល។ បើយើងមិនមានការបណ្តុះថ្នាលទេ យើងនឹងមិនមានអ្នកបន្តវេនគុនខ្មែររបស់យើងឡើយ!»។
លោក ម៉ុល នី បន្ថែមថា៖ «យើងមិនអាចពឹងផ្អែកតែលើកីឡាករលំដាប់ A ជួរមុខរបស់យើងប៉ុន្មាននាក់ហ្នឹងបានទេ ហេតុនេះអ្នកឧកញ៉ា សំអាង វឌ្ឍនៈ និងឯកឧត្តម ឃឹម វុទ្ធី អគ្គនាយកស្ថានីយទូរទស្សន៍ជាតិកម្ពុជា តែងតែប្រាប់ និងចង្អុលបង្ហាញដល់ក្រុមការងាររបស់យើង ឱ្យផ្តោតខ្លាំងទៅលើការបណ្តុះថ្នាល ដែលជាទំពាំងស្នងឫស្សី។ យើងបានធ្វើការងារនេះយ៉ាងសកម្មបំផុត ដែលមហាជនទទួលស្គាល់ថា ពិតជាការបណ្តុះបណ្តាលចំគោលដៅ»។
«មិនតែប៉ុណ្ណោះយើងបានដាក់កីឡាករគីឡូស្រាលជាថ្នាលរបស់យើង បានប្រកួតមិត្តភាពអន្តរជាតិ ពិសេសប្រកួតពានរង្វាន់ដណ្តើមប្រាក់លាន ដើម្បីរុញច្រានដល់ថ្នាលផ្សេងៗទៀត បានមើលឃើញពីភាពអស្ចារ្យហ្នឹង រួចចាប់ផ្តើមស្រឡាញ់ និងចូលរួមហាត់គុនខ្មែរឱ្យបានកាន់តែច្រើន ហើយនេះទើបជាទស្សនវិស័យវែងឆ្ងាយក្នុងការលើកកម្ពស់ និងផ្សព្វផ្សាយគុនខ្មែររបស់យើងដ៏ពិតប្រាកដ»។ លោក ម៉ុល នី បានបញ្ជាក់បន្ថែម៕
