ធឿន ធារ៉ា ត្រូវវិលមកកាន់សង្វៀនជាថ្មី ដើម្បីប្រកួតដណ្តើមខ្សែក្រវាត់ជាមួយអ្នកប្រដាល់របស់អាមេរិក Max Crus នៅថ្ងៃសុក្រ។ រូបថត ថោន
អ្នកប្រដាល់ទាំង៥រូបរបស់អាមេរិក រួមទាំងគ្រូបង្វឹក និងប្រតិភូ បានធ្វើដំណើរមកដល់ប្រទេសកម្ពុជាហើយ ដើម្បីត្រៀមប្រកួតដណ្តើមខ្សែក្រវាត់ និងប្រកួតមិត្តភាពអន្តរជាតិជាមួយអ្នកស្នងមរតកក្បាច់គុនបុរាណខ្មែរចំនួន៥នាក់ ដែលនឹងត្រូវធ្វើឡើង នៅផ្លូវ៦០ម៉ែត្រ ក្រុងសៀមរាប ខេត្តសៀមរាប នាយប់ថ្ងៃសុក្រ ទី២៨ ខែមីនា ខាងមុខនេះ។
សម្រាប់ការប្រកួតជាលក្ខណៈប្រទេស និងប្រទេសនេះ ជើងខ្លាំង ធឿន ធារ៉ា ដែលបានខកខានឡើងប្រកួតជាង៣ខែ ដោយសារបញ្ហារបួសនោះ ត្រូវបានដាក់ឱ្យប្រកួតដណ្តើមខ្សែក្រវាត់ ក្នុងប្រភេទទម្ងន់៧៣គីឡូក្រាមជាមួយអ្នកប្រដាល់របស់អាមេរិក Max Crus ដែលគេគឺជាជើងខ្លាំងម្នាក់ មានខ្សែក្រវាត់នៅក្នុងដៃ។
សម្រាប់ការធ្វើដំណើរមកដល់ប្រទេសកម្ពុជា កាលពីថ្ងៃចន្ទ ម្ចាស់ខ្សែក្រវាត់មកពីអាមេរិក Max Crus មិនបានបង្ហាញការខ្លាចរអាពីសមត្ថភាពរបស់ ធឿន ធារ៉ា នោះទេ គឺគេបានដាក់គោលដៅខ្ពស់បំផុត ក្នុងការដណ្តើមយកជ័យជម្នះ ដើម្បីនាំយកខ្សែក្រវាត់នេះត្រឡប់ទៅស្រុកវិញ។
«ខ្ញុំមកប្រទេសកម្ពុជាលើកនេះ ដើម្បីឈ្នះការប្រកួត គឺខ្ញុំមានសង្ឃឹមឈ្នះរហូតដល់១០០ភាគរយ»។ Max Crus បានបញ្ជាក់ប្រាប់ប្រព័ន្ធផ្សព្វផ្សាយ នៅពេលធ្វើដំណើរដល់ព្រលានយន្តហោះអន្តរជាតិភ្នំពេញ កាលពីថ្ងៃចន្ទ ហើយរូបគេក៏បានបង្ហើបពីមហិច្ឆតា ក្នុងការចង់ផ្តួល ធឿន ធារ៉ា ឱ្យសន្លប់ផងដែរ បើសិនជាមានឱកាស។
យ៉ាងណាក៏ដោយ ចំពោះ ធឿន ធារ៉ា ក៏កំពុងទន្ទឹងរង់ចាំការប្រកួតនេះផងដែរ ដើម្បីបង្ហាញការប្រកួតដ៏ទាក់ទាញមួយ បំពេញទឹកចិត្តដល់អ្នកគាំទ្រ បន្ទាប់ពីរូបគេ បានធ្វើឱ្យអ្នកគាំទ្រខកចិត្ត ចំពោះការមិនបានឡើងប្រកួតម៉ារ៉ាតុងដណ្តើមខ្សែក្រវាត់ (Kun Khmer Tournment) កាលពីថ្ងៃទី៧ ខែមករា តាមការកំណត់ ដោយកាលនោះជើងខ្លាំងរបស់ថៃ Tawanchai PK Saenchai ដែលជាដៃគូសងសឹករបស់ ធារ៉ា បានក្លាយជាម្ចាស់ខ្សែក្រវាត់ ក្រោយឈ្នះទាំង២ប្រកួត។
ធឿន ធារ៉ា បានប្រាប់ប្រព័ន្ធផ្សព្វផ្សាយថា៖ «ដៃគូរបស់ខ្ញុំ ដែលជាជនអាមរិកលើកនេះ រាងធំដែរ ហើយគាត់ហាត់នៅថៃ ប៉ុន្តែសម្រាប់ខ្ញុំវាធម្មតាទេ ព្រោះដល់ដំណាក់កាលនេះហើយ បើយើងខ្លាចគេ ក៏មិនកើតនោះដែរ»។
យ៉ាងណាក៏ដោយ ការខកខានឡើងប្រកួតជាង៣ខែមកនេះ ធឿន ធារ៉ា គិតថា អាចនឹងធ្វើឱ្យការប្រកួតរបស់គេ មិនលះល្អដូចមុនទេ។ «ខាងឡើងប្រកួតយូរ ពេលឡើងទៅអាចនៅគាំងតិចតួច ប៉ុន្តែខ្ញុំដាក់ចិត្តថា ទោះចាញ់ ឬឈ្នះ ខ្ញុំត្រូវខំប្រឹងប្រកួតឱ្យអស់ពីលទ្ធភាព មិនឱ្យបងប្អូនខកបំណងទៀតនោះទេ»។
កីឡាករមានរហស្សនាម «អ្នកលេងពូថៅដៃ» ធឿន ធារ៉ា បានបន្ថែមថា៖ «ខ្ញុំបានខកខានការប្រកួតមួយហើយ អ៊ីចឹងខ្ញុំមិនឱ្យអ្នកគាំទ្របារម្ភទៀតនោះទេ គឺខ្ញុំនឹងប្រឹងឱ្យអស់ពីលទ្ធភាព។ ខ្ញុំក៏បានទន្ទឹងរង់ចាំការបង្ហាញខ្លួនឡើងវិញនេះដូចគ្នា ព្រោះពេលឃើញគេប្រកួតទាំងក្នុងស្រុក និងក្រៅប្រទេស ធ្វើឱ្យខ្ញុំមានអារម្មណ៍នឹកការប្រកួតកាន់តែខ្លាំង គឺពេលខ្លះដេកមិនចង់លក់ផង»។
ដោយឡែកកីឡាកររបស់កម្ពុជា៤នាក់ទៀត នឹងត្រូវដាក់ឱ្យប្រកួតមិត្តភាពអន្តរជាតិជាមួយអ្នកប្រដាល់របស់អាមេរិក ដោយក្នុងនោះ ផល សោភ័ណ្ឌ ត្រូវប្រកួតទម្ងន់៦៥គីឡូក្រាមជាមួយកីឡាករ Wilson Ha រីឯ សោម វិច្ឆ័យ ត្រូវជួប Boulton Even ក្នុងទម្ងន់៦៥គីឡូក្រាមដូចគ្នា ចំណែក មាស ប៊ុនថេន ត្រូវប៉ះកីឡាករ Joke Ramirez ក្នុងទម្ងន់៦០គីឡូក្រាម ហើយ ចក់សាវិន គុនខ្មែរ ត្រូវប្រកួតទម្ងន់៦១,៥គីឡូក្រាមជាមួយអ្នកប្រដាល់ Souleya Duangsay។
ចំពោះបេក្ខភាពកីឡាករមកពីអាមេរិកទាំង៤នាក់នេះ សុទ្ធតែជាម្ចាស់ខ្សែក្រវាត់ ជាពិសេសកីឡាករ Joke Ramirez ដែលមានខ្សែក្រវាត់ចំនួន៨ស្ថាប័ន ហើយអ្នកទាំងអស់នេះ ត្រូវបានជ្រើសរើសដោយផ្ទាល់ពីស្ថាប័នពិភពលោក WCK សម្រាប់ការមកប្រកួតនៅកម្ពុជា លើកនេះ។
បន្ថែមលើនេះ WCK ក៏បាននាំយកពិធីករលំដាប់ពិភពលោក Chris Cregory មកធ្វើជាអ្នកអត្ថាធិប្បាយ សម្រាប់ការប្រកួតរវាងក្រុមកីឡាករប្រដាល់អាមេរិក និងក្រុមប្រដាល់គុនខ្មែរលើកនេះដែរ។
លោក Tommy Kim ទីប្រឹក្សាស្ថានីយទូរទស្សន៍ថោន និងជាប្រធានស្ថាប័ន IPCC ប្រចាំនៅកម្ពុជា បានបង្ហាញសារបែបនេះថា៖ «មេធំ WCK (លោក Dennis Paul Warner) ដឹកនាំកងទ័ពរបស់គាត់មកដោយផ្ទាល់ ហើយក៏មានពិធីករប្រចាំកម្មវិធីរបស់គាត់មកដែរ រួមទាំងក្រុមបច្ចេកទេសរបស់ WCK ចុះមកធ្វើការផ្សាយបន្តផ្ទាល់កម្មវិធីប្រកួតនេះ ទៅកាន់សហរដ្ឋអាមេរិក»។
លោក Tommy បានបន្ថែមថា៖ «ក្នុងនាមរូបខ្ញុំ ជាអ្នករៀបចំមួយរូប សង្ឃឹមថា បងប្អូននឹងចូលរួមជាមួយស្ថានីយទូរទស្សន៍ Town ជួយផ្សព្វផ្សាយពីប្រទេសកម្ពុជា ក្បាច់គុនរបស់យើង និងទេសចរណ៍របស់យើង ទៅកាន់ពិភពលោកទាំងអស់គ្នា»៕
