សកម្មភាព អ៊ន ចាន់ប៉ូលីន ទៅប៉ះ សៀង ចន្ធា បណ្តាលឱ្យដួល នាំឱ្យអាជ្ញាកណ្តាលផ្តល់បាល់ហ្រ្វីឃីក ទៅឱ្យក្រុមបឹងកេត ហើយនេះជាការសម្រេចមួយ ដែលលោក Oleg យល់ថា ជារឿងមិនសមហេតុផល។ រូបថត CPL
ក្រុមភ្នំពេញក្រោន បានបន្តយកឈ្នះលើក្រុមបឹងកេត ៣-២ ទាំងលំបាក ដើម្បីតាមប្រជែងជាមួយក្រុមកំពូលតារាង ព្រះខ័នរាជស្វាយរៀង ដែលឈ្នះបាន៣ពិន្ទុបន្ថែមដែរ ចំណែកក្រុមវិសាខា ក៏ដណ្តើមបាន៣ពិន្ទុពីក្រុមណាហ្គាវើលដ៍ដូចគ្នា សម្រាប់ការប្រកួតគ្នារវាងក្រុមកំពូលតារាងទាំង៦ (Top6) នៃលីគកំពូលកម្ពុជា កាលពីថ្ងៃសៅរ៍ និងថ្ងៃអាទិត្យ កន្លងមកនេះ។
យ៉ាងណាក៏ដោយ គ្រូបង្គោលក្រុមភ្នំពេញក្រោន លោក Oleg Starynskyi មិនពេញចិត្តនឹងការកាត់សេចក្តីរបស់លោកអាជ្ញាកណ្តាល ជី សាមឌី នោះទេ។
លោកបានចាត់ទុកការពិន័យរបស់លោកអាជ្ញាកណ្តាលទៅលើប្រធានក្រុមភ្នំពេញក្រោន អ៊ន ចាន់ប៉ូលីន ដែលបានប៉ះទង្គិចគ្នាជាមួយ សៀង ចន្ទា ថា ជារឿងមិនសមហេតុផល ធ្វើឱ្យក្រុមបឹងកេត អាចរកបានគ្រាប់បាល់ តាមរយៈការផ្តល់បាល់ហ្រ្វីឃីកនោះ។
លោក Oleg បាននិយាយក្រោយការប្រកួតថា៖ «យើងមានការចាប់ផ្តើមល្អ ប៉ុន្តែ បឹងកេតអាចរកគ្រាប់បាល់ត្រឡប់មកវិញបាន។ គ្រាប់បាល់ខ្លះកើតឡើងលើសពីការរំពឹងទុក ព្រោះខ្ញុំមិនយល់ថា ហេតុអ្វីផ្តល់បាល់ហ្វី្រឃីកនោះទេ»។
គ្រូបង្វឹកសញ្ជាតិអ៊ុយក្រែនរូបនេះ បានបន្ថែមថា៖ «វាជាការប៉ះទង្គិចគ្នាធម្មតាសម្រាប់កីឡាករ ហើយការប៉ះទង្គិចគ្នាបែបនោះ វាកើតឡើងជិត១០ដងក្នុងការប្រកួត ប៉ុន្តែនៅក្នុងស្ថានភាពខ្លះអាជ្ញាកណ្តាលផ្តល់ការពិន័យ រីឯស្ថានភាពខ្លះបែរជាអត់ពិន័យទៅវិញ»។
ការប្រកួតរវាងក្រុមព្រះខ័នរាជស្វាយរៀង និងក្រុមអង្គរថាយហ្គឺរ ដោយក្រុមស្វាយរៀង បានយកឈ្នះ ៥-២។ រូបថត CPL
សម្រាប់ការប្រកួត កាលពីថ្ងៃអាទិត្យនោះ ក្រុមភ្នំពេញក្រោន អាចរកបានគ្រាប់បាល់នាំមុខក្រុមបឹងកេត ២-០ យ៉ាងលឿនបំផុត គឺខ្សែបម្រើប្រយុទ្ធ Nieto Rondon បានស៊ុតបញ្ចូលទីគ្រាប់បាល់ដំបូង ត្រឹមរយៈពេល៤៥វិនាទី ហើយខ្សែប្រយុទ្ធ Nnamdi Ofufu Ibeh បានបន្ថែម១គ្រាប់ទៀត នៅនាទីទី៦។
យ៉ាងណាក៏ដោយ ការជ្រុលជើងទាត់ខ្សែប្រយុទ្ធ សៀង ចន្ធា ពីក្រោយបណ្តាលឱ្យដួល ពីសំណាក់ប្រធានក្រុម អ៊ន ចាន់ប៉ូលីន នាំឱ្យលោកអាជ្ញាកណ្តាល ជី សាមឌី សម្រេចផ្តល់បាល់ហ្រ្វីឃីកទៅឱ្យក្រុមបឹងកេត ហើយកីឡាករ Scott Charlie Thomas ជាអ្នកស៊ុតបាល់នេះបានសម្រេចនៅនាទីទី៣៥ ហើយ សៀង ចន្ធា រកបាន១គ្រាប់ទៀត តាមស្មើ ២-២ នៅនាទីទី៤៥+១។
ប៉ុន្តែនៅនាទីទី ៤៥+៦ ក្រុមភ្នំពេញក្រោន បានទទួលបាល់ហ្រ្វីឃីកវិញ ហើយកីឡាករ Yudai Ogawa ជាអ្នកស៊ុតបានសម្រេច ហើយក៏ជាគ្រាប់បាល់ចុងក្រោយ ជួយឱ្យក្រុមភ្នំពេញក្រោន យកឈ្នះក្រុមបឹងកេត ៣-២ ទាំងលំបាក សម្រាប់ជំនួបលើកនេះផងដែរ។
តាមរយៈការដណ្តើមបាន៣ពិន្ទុនេះ បានជួយឱ្យក្រុមភ្នំពេញក្រោន នៅតែមានភាគរយខ្ពស់ ក្នុងការតាមប្រជែងជាមួយក្រុមព្រះខ័នរាជស្វាយរៀង ដែលបានយកឈ្នះក្រុមម្ចាស់ផ្ទះអង្គរថាយហ្គឺរ ៥-២ កាលពីថ្ងៃសៅរ៍ ធ្វើឱ្យគម្លាតពិន្ទុនាំមុខរវាងក្រុមខ្លាំងទាំង២នេះ ខុសគ្នា៤ពិន្ទុដដែល គឺ៥៨ទល់នឹង៥៤ពិន្ទុ។
ក្រុមវិសាខា បានអបអរការរកបានត្រឹម១គ្រាប់ ដើម្បីយកឈ្នះលើក្រុមវិសាខា ១-០ នៅលើទឹកដីខ្លួនឯង កាលពីថ្ងៃអាទិត្យ។ រូបថត CPL
ចំណែកក្រុមម្ចាស់ផ្ទះ វិសាខា បានយកឈ្នះក្រុមណាហ្គាវើលដ៍ ១-០ ទាំងលំបាក កាលពីថ្ងៃអាទិត្យនោះដែរ ដើម្បីបន្តឈរនៅលេខ៣ មាន៥០ពិន្ទុ ខណៈក្រុមអង្គរថាយហ្គឺរ មាន៤០ពិន្ទុ និងណាហ្គាវើលដ៍ មាន៣៦ពិន្ទុ រីឯក្រុមបឹងកេត ឈរនៅលេខរៀងទី៦ក្រោយគេ ដោយមានត្រឹម៣០ពិន្ទុ ហើយក៏ជាក្រុមដំបូងគេ ដែលអស់ឱកាសក្នុងការប្រជែងយកពាន នៅក្នុង Top6 នេះផងដែរ។
យ៉ាងណាក៏ដោយ លោក Conor Nestor គ្រូបង្គោលក្រុមបឹងកេត មិនបានបង្ហាញការសោកស្តាយទៅនឹងការបាត់បង់ឱកាសប្រជែងយកពាននេះទេ ប៉ុន្តែអ្វីដែលលោកខកចិត្តនោះ គឺក្រុមបឹងកេត មិនអាចនាំយកទម្រង់លេងដ៏ល្អ ដូចពេលប្រកួតចាញ់ក្រុមស្វាយរៀង ១-០ កាលពីថ្ងៃទី២៣ ខែកុម្ភៈ ដើម្បីមកដណ្តើមយកលទ្ធផលល្អ ចំពោះការប្រកួតជាមួយក្រុមភ្នំពេញក្រោន លើកនេះ។
លោកបានបញ្ជាក់ថា៖ «ខ្ញុំគិតថា យើងមិនមានឱកាសប្រជែងពានតាំងពី៣ខែមុនម្ល៉េះ ប៉ុន្តែអ្វីដែលខ្ញុំខកចិត្តនោះ គឺយើងមិនអាចរក្សាការលេងដ៏ល្អរបស់យើង កាលពីសប្ដាហ៍មុន ទល់នឹងក្រុមស្វាយរៀង ឱ្យមកបន្តលេងល្អ និងទទួលលទ្ធផលល្អនៅថ្ងៃនេះ»។
«ថ្ងៃនេះយើងលេងបានល្អតែពាក់កណ្ដាល ហើយការលេងជាមួយក្រុមកំពូល មានគ្រូល្អដូច្នេះ អ្នកមិនអាចឈ្នះជាមួយការលេងល្អតែពាក់កណ្ដាលបាននោះទេ»។ លោក Conor Nestor បានបន្ថែម ខណៈការប្រកួត Top6 ដើម្បីប្រជែងគ្នាយកពាននេះ នៅសល់ការប្រកួតចំនួន៨ដងទៀត នឹងបញ្ចប់ហើយ៕
