សកម្មភាពប្រកួតរវាងក្រុមក្រសួងការពារជាតិ និងក្រុមក្រសួងអប់រំ យុវជន និងកីឡា នៅកីឡដ្ឋានស្តាតចាស់ កាលពីថ្ងៃទី១ ខែមីនា។ រូបថត ក្រសួងការពារជាតិ
ការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ឆ្នាំ២០២៥ បានចាប់ផ្តើមបើកការប្រកួតជាផ្លូវការហើយ ដើម្បីស្វែងរកក្រុមម្ចាស់ជើងឯក ក្នុងខួប១០ឆ្នាំរបស់ខ្លួន។ ចំណែកលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលជាអ្នកផ្តួចផ្តើមបង្កើតឱ្យមានពានរង្វាន់នេះឡើង បានអះអាងថា ការប្រកួតឆ្នាំនេះ នឹងតាងតឹងខ្លាំងជាងឆ្នាំមុនៗ ព្រោះគ្រប់ក្រុម សុទ្ធតែត្រៀមខ្លួនបានល្អ គឺគ្មានក្រុមណាត្រៀមខ្លួនប្រកួត ដើម្បីចាញ់នោះទេ។
លោក ហ៊ុន ម៉ានី បានចាត់ទុកការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន»នេះ ជាការផ្តល់ឱកាសដល់មន្រ្តីរាជការ បានចេញពីការិយាល័យ ដើម្បីមកជួបជុំគ្នា នៅលើទីលាន ហើយប្រកួតបាល់ទាត់ជាមួយគ្នា ដើម្បីរឹតចំណងមិត្តភាព សាមគ្គីភាព និងការពង្រីកកិច្ចសហប្រតិបត្តិការរវាងយុវជនតាមក្រសួង-ស្ថាប័នរដ្ឋ ក៏ដូចជាការលើកកម្ពស់សុខុមាលភាពរបស់មន្ដ្រីរាជការ។
យ៉ាងណាក៏ដោយ រដ្ឋមន្ត្រីក្រសួងមុខងារសាធារណៈរូបនេះ មិនបានគិតថា ពានរង្វាន់មិត្តភាពនេះ ជាការប្រកួតបែបធម្មតាៗ និងសប្បាយៗ ដើម្បីតែសុខភាពនោះទេ។
លោកថ្លែងថា៖ «ការប្រកួតពានរង្វាន់មិត្តភាពយុវជនអន្ដរក្រសួង-ស្ថាប័ន ឆ្នាំនេះ មិនត្រឹមតែមានចំនួនក្រុមចូលរួមច្រើនជាងមុនៗប៉ុណ្ណោះទេ តែតាមដឹងក្រុមនីមួយៗ ក៏បានរកគ្រូបង្វឹកបន្ថែមដែរ អ៊ីចឹងឆ្នាំនេះ ប្រហែលជាលើសពីឆ្នាំមុនៗ គឺជាការប្រកួតប្រជែងមិនធម្មតាពេកនោះទេ»។
ជាមួយគ្នានេះ លោក ហ៊ុន ម៉ានី បានអះអាងថា ក្រុមក្រសួងមុខងារសាធារណៈ របស់លោក ក៏បានរកគ្រូបង្វឹកមកជួយបង្ហាត់បន្ថែមដូចគ្នា ដើម្បីត្រៀមការប្រកួតបាល់ទាត់ពានរង្វាន់ មិត្តភាពយុវជនអន្ដរក្រសួង-ស្ថាប័ន ឆ្នាំ២០២៥នេះ ព្រោះលោកយល់ថា ក្រុមទាំងអស់ ដែលបានចូលរួមលើកនេះ សុទ្ធតែមានមហិច្ឆតាចង់ឈ្នះ ដណ្តើមយកពានដូចគ្នា។
«ពិតណាស់ កីឡាលេងដើម្បីមិត្តភាព ប៉ុន្តែគ្មានក្រុមណាត្រៀមចូលរួមប្រកួតដើម្បីចាញ់នោះទេ គឺត្រូវការត្រៀមខ្លួនឱ្យបានល្អដូចគ្នា»។ លោក ហ៊ុន ម៉ានី បានបញ្ជាក់។
តែទោះបីជាយ៉ាងណា លោកបានលើកទឹកចិត្តឱ្យគ្រប់ក្រុមទាំងអស់ ប្រកួតគ្នាដោយ Fair play ដើម្បីធ្វើឱ្យព្រឹត្តិការណ៍នេះ ដំណើរទៅបានល្អ និងបញ្ចប់ដោយជោគជ័យ។
លោក ហ៊ុន ម៉ានី បានលើកឡើងបែបនេះ នៅក្នុងពិធីបើកការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ឆ្នាំ២០២៥ នៅកីឡដ្ឋានស្តាតចាស់ កាលពីថ្ងៃទី១ ខែមីនា ហើយក៏ជាពេលដែលក្រុមម្ចាស់ជើងឯកឆ្នាំ២០២៤ ក្រសួងអប់រំ យុវជន និងកីឡា បានចាញ់ក្រុមក្រសួងការពារជាតិ ១-០ នាការប្រកួតបើកឆាកប្រចាំពូលA ផងដែរ រីឯក្រុមក្រសួងវប្បធម៌ និងវិចិត្រសិល្បៈ ក៏បានចាញ់ក្រុមគណៈមេធាវីនៃព្រះរាជាណាចក្រកម្ពុជា ៣-២ កាលពីយប់ថ្ងៃសៅរ៍នោះផងដែរ។
តាមរបាយការណ៍របស់លោក សុខ សប្បាយណា ប្រធានគណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន បានឱ្យដឹងថា ការប្រកួតពាន «មិត្តភាពយុវជនអន្ដរក្រសួង-ស្ថាប័ន» លើកទី១០នេះ មានក្រុមចូលរួមចំនួន៣៥ គឺបានបំបែកកំណត់ត្រា សម្រាប់ការប្រកួតកាលពីឆ្នាំ២០២៤ ដែលមាន៣៤ក្រុម។
ក្រុមទាំង៣៥នេះ ចែកជា៨ពូល ដោយចាប់ផ្តើមប្រកួតពីថ្ងៃទី១ ខែមីនា រហូតដល់ថ្ងៃទី២៤ ខែឧសភា។
សម្រាប់ការប្រកួតចំនួន៩លើកកន្លងមក ក្រុមក្រសួងសុខាភិបាល និងក្រុមក្រសួងការងារ និងបណ្តុះបណ្តាលវិជ្ជាជីវៈ បានឈ្នះពានចំនួន៣លើកដូចគ្នា ចំណែកក្រុមក្រសួងបរិស្ថាន ក្រុមក្រសួងសាធារណការ និងដឹកជញ្ជួន និងក្រុមក្រសួងអប់រំ យុវជន និងកីឡា បានឈ្នះពានចំនួន១លើកដូចគ្នា៕
