ការប្រកួតកីឡាយុទ្ធគុនចម្រុះជើងឯកអាស៊ី លើកទី២ ឆ្នាំ២០២៤ នៅវិមានពហុកីឡដ្ឋានជាតិ ដែលកម្ពុជា ធ្វើជាម្ចាស់ផ្ទះ។ រូបថត NOCC
អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានចាត់ទុក ការសម្រេចដាក់បញ្ចូលប្រភេទកីឡាយុទ្ធគុនចម្រុះ (MMA) ទៅក្នុងការប្រកួត Aichi Nagoya Asian Games 2026 នៅប្រទេសជប៉ុន គឺជាសញ្ញាណល្អ សម្រាប់យុទ្ធគុនចម្រុះខ្មែរបុរាណ ក្នុងការពង្រឹងសក្តានុពល ឈានទៅប្រកួតប្រជែងនៅលើឆាកអន្តរជាតិ។
ការលើកឡើងបែបនេះរបស់លោក វ៉ាត់ ចំរើន គឺដោយសារតែក្រុមប្រឹក្សាអូឡាំពិកអាស៊ី (OCA) និងគណៈកម្មាធិការរៀបចំការប្រកួតកីឡាអាស៊ីហ្គេម Aichi Nagoya Asian Games Organizing Committee (NINAGOC) បានសម្រេចដាក់បញ្ចូលកីឡា MMA ទៅក្នុងការប្រកួត Aichi Nagoya Asian Games 2026 នៅប្រទេសជប៉ុន ជាផ្លូវការ តាមសេចក្តីជូនដំណឹងរបស់ខ្លួន ដែលបានផ្ញើទៅកាន់គណៈកម្មាធិការអូឡាំពិកនៃបណ្តាប្រទេសជាសមាជិករបស់ OCA នៅក្នុងតំបន់អាស៊ី កាលពីថ្ងៃទី២ ខែមីនា។
តាមសេចក្តីជូនដំណឹងដដែលនេះ បានបញ្ជាក់ថា ការប្រកួត Aichi Nagoya Asian Games នៅប្រទេសជប៉ុន ពីថ្ងៃទី១៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៦ខាងមុខ គឺមានការប្រកួត MMA ទាំងផ្នែកបុរស និងនារី ក្នុងនោះវិញ្ញាសាប្រយុទ្ធ MMA បែបទំនើប មានការប្រកួតទម្ងន់ក្រោម៦០គីឡូក្រាម ទម្ងន់ក្រោម៧១គីឡូក្រាម ផ្នែកបុរស និងទម្ងន់ក្រោម៥១គីឡូក្រាមផ្នែកនារី រីឯ MMA បែបប្រពៃណី មានការប្រកួតទម្ងន់ក្រោម៦៥គីឡូក្រាម ទម្ងន់ក្រោម៧៧គីឡូក្រាមផ្នែកបុរស និងទម្ងន់ក្រោម៦០គីឡូក្រាមផ្នែកនារី។
លោក វ៉ាត់ ចំរើន ពេលថ្លែងក្នុងសន្និសីទកាសែត នៅទីស្នាក់ការ NOCC កាលពីថ្ងៃទី២៥ ខែកុម្ភៈ ឆ្នាំ២០២៥។ រូបថត NOCC
ជាមួយគ្នានេះ លោក វ៉ាត់ ចំរើន ដែលជាប្រធានសហព័ន្ធកីឡាយុទ្ធគុនចម្រុះកម្ពុជាផងនោះ បានឱ្យដឹងថា កម្ពុជា ក្រោមគំនិតផ្តួចផ្តួមរបស់លោកនាយករដ្ឋមន្រ្តី ហ៊ុន ម៉ាណែត ក៏ទើបចាប់ផ្តើមរៀបចំការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចធិបតី លើកទី១ ឆ្នាំ២០២៤ កាលពីថ្ងៃទី១៨ ដល់ទី២០ ខែតុលា ដើម្បីអភិរក្ស និងអភិវឌ្ឍន៍យុទ្ធគុនខ្មែរបុរាណ របស់ដូនតា បានបន្សល់ទុកឱ្យកូនចៅជំនាន់ក្រោយ។
នៅក្នុងន័យនេះ លោក វ៉ាត់ ចំរើន យល់ថា ការដាក់ MMA ទៅក្នុងការប្រកួតកីឡាអាស៊ី ជាលើកដំបូង នៅប្រទេសជប៉ុន ឆ្នាំ២០២៦ខាងមុខនេះ នឹងក្លាយជាផ្នែកមួយយ៉ាងសំខាន់ ក្នុងការជួយជំរុញដល់ការអភិវឌ្ឍន៍យុទ្ធគុនចម្រុះខ្មែរបុរាណ ក៏ដូចជាអ្នកហាត់គុន នៅលើប្រភេទកីឡាប្រយុទ្ធផ្សេងៗនៅកម្ពុជា ឱ្យកាន់តែខិតខំពង្រឹងសមត្ថភាព ឈានទៅកាន់ការប្រកួតនៅលើឆាកអន្តរជាតិ។
លោក ចំរើន បានប្រាប់ភ្នំពេញប៉ុស្តិ៍ នៅថ្ងៃអង្គារនេះថា៖ «ការដាក់ MMA ទៅក្នុងការប្រកួតកីឡាអាស៊ីនេះ វាជាសញ្ញាណល្អមួយ សម្រាប់កីឡាយុទ្ធគុនចម្រុះរបស់យើង និងជួយដល់កីឡាប្រពៃណីអត្តសញ្ញាណជាតិរបស់យើង ដូចជាអ្នកហាត់គុនខ្មែរ គុនល្បុក្កតោ ចំបាប់ យុទ្ធក្រមខម និងក្បាច់គុនប្រយុទ្ធផ្សេងៗទៀត ឱ្យមានឱកាសឈានទៅប្រកួតនៅលើឆាកអន្តរជាតិ តាមរយៈការដាក់បញ្ចូល MMA ក្នុងការប្រកួតកីឡាអាស៊ីនេះ»។
លោកបានបន្ថែមថា៖ «បើនៅថ្ងៃក្រោយប្រភេទកីឡា MMA ត្រូវបានដាក់បញ្ចូលទៅដល់ការប្រកួតកីឡាអូឡាំពិកហ្គេមទៀតនោះ វាកាន់តែមានផ្លូវច្រើនសម្រាប់យើង ព្រោះកម្ពុជាមានសក្តានុពល និងធនធានច្រើននៃកីឡាប្រយុទ្ធ ហើយយើងអាចកសាងសមត្ថភាពលេចធ្លោបាន នៅថ្ងៃក្រោយ»។
យ៉ាងណាក៏ដោយ លោក វ៉ាត់ ចំរើន បានជំរុញឱ្យក្រុមអត្តពលិកយុទ្ធគុនចម្រុះកម្ពុជា ត្រូវពង្រឹងសមត្ថភាពឱ្យបានល្អថែមទៀត ដើម្បីមានឱកាសបានចូលរួមការប្រកួតកីឡាអាស៊ី ដោយលោកជឿថា កីឡាករ កីឡាការិនីកម្ពុជា អាចមានលទ្ធភាពប្រជែងជាមួយគេបាន ព្រោះពួកគេ ក៏ទើបដណ្តើមបានមេដាយមាស១ ប្រាក់៥ និងសំរឹទ្ធ៩ ពីការប្រកួតកីឡាយុទ្ធគុនចម្រុះជើងឯកអាស៊ី លើកទី២ (2nd Asian Mixed Martial Arts Championship) ឆ្នាំ២០២៤ ក្នុងនាមជាម្ចាស់ផ្ទះផងដែរ ដើម្បីបានចំណាត់ថ្នាក់លេខ៥ ក្នុងចំណោមប្រទេសចូលរួមទាំង១៥។
លោក វ៉ាត់ ចំរើន បញ្ជាក់ថា៖ «ក្រុមអត្តពលិកយុទ្ធគុនចម្រុះរបស់យើង ធ្លាប់ដណ្តើមបានមេដាយមាស ប្រាក់ និងសំរឹទ្ធ ពីការប្រកួតកីឡាយុទ្ធគុនចម្រុះជើងឯកអាស៊ី ដែលកម្ពុជាធ្វើជាម្ចាស់ផ្ទះ អ៊ីចឹងយើងត្រូវពង្រឹងសក្តានុពល និងរក្សាការងារបច្ចេកទេសនេះ ឱ្យឈានទៅដល់ការប្រកួតកីឡាអាស៊ីហ្គេមនេះ»៕
