អ្នកចាំទី វីរៈ ដារ៉ា បានទទួលភាពស្អាតស្អំត្រឡប់មកវិញ ជុំវិញករណីសង្ស័យលើការរៀបចំកំណត់លទ្ធផលទុកជាមុន ពេលក្រុមជម្រើសជាតិកម្ពុជា ប្រកួតចាញ់ក្រុមជម្រើសជាតិសិង្ហបុរី កាលពីខែធ្នូ ឆ្នាំ២០២៤។ រូបថត FFC
សហព័ន្ធកីឡាបាល់ទាត់កម្ពុជា (FFC) បានបង្ហាញពីលទ្ធផលនៃការស៊ើបអង្កេត អំពីករណីសង្ស័យលើការប្រព្រឹត្តនូវទង្វើរៀបចំកំណត់លទ្ធផលទុកជាមុនរបស់អ្នកចាំទីក្រុមជម្រើសជាតិកម្ពុជា វីរៈ ដារ៉ា ដោយ FFC បានបញ្ជាក់តាមសេចក្តីប្រកាសរបស់ខ្លួនថា វីរៈ ដារ៉ា មិនបានជាប់ពាក់ព័ន្ធនឹងការសង្ស័យនេះទេ។
ការមន្ទិលសង្ស័យទៅលើអ្នកចាំទី វីរ់ ដារ៉ា នេះ បានកើតមានឡើង ក្នុងការប្រកួតផ្លូវការរវាងក្រុមជម្រើសជាតិកម្ពុជា និងក្រុមជម្រើសជាតិសិង្ហបុរី ក្នុងព្រឹត្តិការណ៍ ASEAN Championship Mitsubishi Electric Cup នៅកីឡដ្ឋានជាតិសិង្ហបុរី កាលពីថ្ងៃទី១១ ខែធ្នូ ឆ្នាំ២០២៤ ដោយកាលនោះ វីរៈ ដារ៉ា បានភ្លាត់ស្នៀតនៅមុខទី ធ្វើឱ្យរបូតគ្រាប់បាល់២គ្រាប់ជាប់ៗគ្នា នាំឱ្យក្រុមកម្ពុជា ចាញ់ក្រុមម្ចាស់ផ្ទះសិង្ហបុរី ២-១ ទាំងសោកស្តាយបំផុត។
FFC បានបញ្ជាក់កាលពីព្រលប់ថ្ងៃពុធថា៖ «ក្រោយពីអាជ្ញាធរមានសមត្ថកិច្ច បានធ្វើការតាមដាន និងស៊ើបអង្កេតតាមសមត្ថកិច្ចជំនាញរួចរាល់ និងរួមផ្សំដោយការស្រាវជ្រាវរបស់គណៈកម្មការសុចរិតភាពរបស់សហព័ន្ធកីឡាបាល់ទាត់កម្ពុជា ទៅតាមនីតិវិធីជាក់លាក់ និងដោយការយកចិត្តទុកដាក់ ជាមួយនឹងអង្គភាពជំនាញក្រៅប្រទេសមួយចំនួនកន្លងមក បានបង្ហាញលទ្ធផលជាអវិជ្ជមានរួមគ្នាថា កីឡាករជម្រើសជាតិ វីរៈ ដារ៉ា ពុំមានអ្វីពាក់ព័ន្ធទៅនឹងការសង្ស័យទាំងអស់នោះទេ»។
«ផ្ទុយទៅវិញ កំហុសដែលកើតឡើងនាពេលនោះ គឺជាកំហុសបច្ចេកទេសនៃការលេង ដោយអចេតនាប៉ុណ្ណោះ»។ FFC បានបញ្ជាក់បន្ថែម ហើយ FFC ក៏បានប្រកាន់គោលជំហរ ក្នុងការបន្តធ្វើការស៊ើបអង្កេតស្រាវជ្រាវនូវរាល់ករណីមន្ទិលសង្ស័យទាំងឡាយណា ដែលកើតមានអំឡុងពេលដំណើរការនៃការប្រកួត ដើម្បីរក្សាបាននូវសុចរិតភាព នៅក្នុងវិស័យបាល់ទាត់នៅកម្ពុជា។
ជាមួយការរកឃើញនូវយុត្តិធម៌វិញនេះ វីរៈ ដារ៉ា បានបង្ហោះសារអរគុណជាពិសេសដល់ថ្នាក់ដឹកនាំ និងក្រុមការងារនៃក្លិបបាល់ទាត់ព្រះខ័នរាជស្វាយរៀង និងសហព័ន្ធកីឡាបាល់ទាត់កម្ពុជា ដែលបានខិតខំជួយស្វែងរកនូវភាពស្អាតស្អំមកជូនដល់រូបគេវិញ លើករណីសង្ស័យរៀបចំកំណត់លទ្ធផលទុកជាមុននេះ។
អ្នកចាំទីដៃទី១របស់ក្រុមព្រះខ័នរាជស្វាយរៀង វីរៈ ដារ៉ា បានបញ្ជាក់ថា៖ «ខ្ញុំពិតជាមានសេចក្ដីរីករាយជាពន់ពេក ពេលដែលឃើញនូវសេចក្ដីច្បាស់ការណ៍មួយនេះ។ ខ្ញុំបាទមានតែម្រាមដៃដប់ សូមអរគុណទៅដល់ថ្នាក់ដឹកនាំ ដែលតែងតែយកចិត្តទុកដាក់មកកាន់ខ្ញុំបាទ»។
ទន្ទឹមនឹងនេះ វីរៈ ដារ៉ា ក៏បានសម្តែងការអរគុណ និងដឹងគុណ ដល់ពុកម៉ែបងប្អូនជាអ្នកគាំទ្រ ដែលតែងតែគាំទ្រ និងលើកទឹកចិត្តដល់រូបគេ ជាពិសេសគឺក្រុមគ្រួសាររបស់គេ ដែលតែងតែនៅពីក្រោយ ក្នុងអំឡុងពេលដែល វីរៈ ដារ៉ា បានជួបហេតុការណ៍ដ៏អាក្រក់ ធ្វើឱ្យរូបគេមានការបាក់ទឹកចិត្តយ៉ាងខ្លាំងនេះ។
តែទោះបីជាយ៉ាងណា វីរៈ ដារ៉ា នៅតែទទួលកំហុសលើករណីភ្លាត់ស្នៀតធ្វើឱ្យរបូតគ្រាប់បាល់នាការប្រកួតពេលនោះ។ ដារ៉ា បានបញ្ជាក់តាមសារស័ព្ទរបស់ខ្លួនថា៖ «ខ្ញុំបាទ វីរៈ ដារ៉ា សុំទោសទៅដល់អ្នកគាំទ្រទាំងអស់ នៅក្នុងវិស័យបាល់ទាត់កម្ពុជា ដោយខ្ញុំបានបង្កើតឡើងនូវកំហុសយ៉ាងធំដោយអចេតនាមួយនេះ។ ខ្ញុំបាទក៏បានទទួលស្គាល់នូវកំហុសដែលបានកើតឡើង»។
យ៉ាងណាមិញ ដើម្បីទប់ស្កាត់លើករណីរៀបចំកំណត់លទ្ធផលទុកជាមុន ក្នុងក្រុមជម្រើសជាតិកម្ពុជានេះ FFC បានដាក់ចេញនូវវិធានការ ដែលបានប្រកាសនៅក្នុងមហាសន្និបាត លើកទី១៩ របស់ខ្លួន កាលពីថ្ងៃទី១ ខែកុម្ភៈ ឆ្នាំ២០២៥ លើការបែងចែកភាគលាភ ដែលបានមកពីការលក់សំបុត្រនៃការរៀបចំប្រកួតរបស់ក្រុមជម្រើសជាតិ បន្ទាប់ពីដកចំណាយលើប្រតិបត្តិការណ៍ និងពន្ធរួចរាល់។
ចំពោះភាគលាភ ដែលនៅសល់ នឹងត្រូវផ្តល់ជូនដល់ផ្នែកពាក់ព័ន្ធចំនួន៤ គឺទី១ FFCផ្ទាល់ ដែលនឹងទទួលបាន២៥ភាគរយ ទី២ សមាគម/ក្លិប ដែលមានកីឡាករជាប់ក្នុងក្រុមជម្រើសជាតិ នឹងទទួលបាន២៥ភាគរយ ហើយទី៣ និងទី៤ គឺក្រុមជម្រើសជាតិ និងសុខុមាលភាព ដែលនឹងទទួលបានភាគលាភចំនួន២៥ភាគរយដូចគ្នា៕
