ធឿន ធារ៉ា vs លូកាស ខាឡូ ដា ស៊ីលវ៉ា ។ ថោន
គ្រូបង្វឹកដែលមានស្នាដៃល្អ ក្នុងការបណ្តុះធនធានកីឡាករ លោក អេ ភូថង បានអះអាងថា ការឡើងប្រកួតការពារខ្សែក្រវាត់រវាងជើងខ្លាំង ធឿន ធារ៉ា និង អេ អាំម៉ារីនភូថង ពីការមកដណ្តើមរបស់អ្នកប្រដាល់ព័រទុយហ្គាល់ ដែលរៀបចំឡើងដោយសង្វៀនថោន នៅទីរួមខេត្តព្រៃវែង នាព្រលប់ថ្ងៃទី១៤ ខែមេសា ខាងមុខនេះ នឹងក្លាយជាការប្រកួតដ៏ជក់ចិត្ត មិនធ្វើឱ្យអ្នកខេត្តព្រៃវែងខកបំណងឡើយ។
លោកគ្រូ អេ ភូថង បានទទួលស្គាល់ថា ប្រទេសព័រទុយហ្គាល់ ពិតជាខ្លាំងលើវិស័យកីឡាបាល់ទាត់ ជាពិសេសវីរភាពដ៏ល្បីល្បាញរបស់ខ្សែប្រយុទ្ធ Cristian Ronaldo ប៉ុន្តែចំពោះការប្រកួតប្រដាល់ រវាងក្រុមប្រដាល់គុនខ្មែរ និងក្រុមអ្នកប្រដាល់ព័រទុយហ្គាល់ ចំនួន៥គូ នៅខេត្តព្រៃវែង ថ្ងៃទី១៤ ខែមេសានេះ លោក អេ ជឿថា ក្រុមគុនខ្មែរ នឹងធ្វើបានល្អជាង ដើម្បីដណ្តើមយកជ័យជម្នះ។
ជាមួយគ្នានេះ លោក អេ ភូថង បានផ្តោតខ្លាំងទៅលើការប្រកួតការពារខ្សែក្រវាត់សិស្សរបស់លោក ធឿន ធារ៉ា និងកូនប្រុសបង្កើតរបស់លោក អេ អាំម៉ារីនភូថង ដោយលោកជឿជាក់ថា ពួកគេ នឹងធ្វើបានល្អ។ លោកនិយាយថា ៖ «ខ្ញុំទទួលបានដំណឹង ពីការប្រកួតការពារខ្សែក្រវាត់នេះជាង១ខែហើយ អ៊ីចឹងយើងត្រៀមខ្លួនរួចស្រេចហើយ ហើយទម្រាំដល់ថ្ងៃប្រកួត ដឹងតែពេញសាច់តែម្តង»។
យ៉ាងណាក៏ដោយ តាមរយៈការប្រកួតដណ្តើមខ្សែក្រវាត់ ត្រឹម៣ទឹក ជាមួយអ្នកប្រដាល់អាមេរិក Max Crus នៅក្រុងសៀមរាប ខេត្តសៀមរាប កាលពីយប់ថ្ងៃទី២៨ ខែមីនា គឺ ធឿន ធារ៉ា ឆាប់អស់ម្លាំងសុហ្វ និងបានយកឈ្នះ Max Crus ដោយពិន្ទុទាំងវេទនា បន្ទាប់ពីរូបគេខកខានប្រកួតប្រមាណ៤ខែ។
ចំពោះចំណុចខ្វះខាតនេះរបស់ ធឿន ធារ៉ា នេះ លោក អេ ភូថង បញ្ជាក់ថា៖ «យើងបានដឹងហើយថា ធឿន ធារ៉ា ខានវ៉ៃយូរ កម្លាំងសុហ្វមិនទាន់មានគ្រាប់វិញទេ គឺក្បាច់គុននៅមាន តែលើកដៃលើកជើងអត់ចង់រួច ប៉ុន្តែក្រោមការហ្វឹកហ្វឺនរបស់ខ្ញុំ គឺការខ្វះខាតនេះ យើងដឹងតែពេញវិញហើយ»។
ចំណែកការត្រៀមខ្លួនរបស់ អេ អាំម៉ារីនភូថង វិញ លោក អេ ភូថង បានបញ្ជាក់ថា ពិតជាល្អខ្លាំង។ «អេ អាំម៉ារីន ហាត់ពេញតែម្តង គ្មានទាស់កន្លែងណានោះទេ ហើយនឹងបន្តហ្វឹកហាត់ទៀត ដើម្បីវ៉ៃនៅខេត្តព្រៃវែងឱ្យល្អមើល»។
អេ អាំម៉ារីនភូថង vs ភូឡូ មីឡូ ។ ថោន
ចំណែកកីឡាករ អេ អាំម៉ារីនភូថង ដែលបានខកខានការប្រកួតដណ្តើមខ្សែក្រវាត់ នៅប្រទេសជប៉ុនោះ បានអះអាងថា រូបគេពិតជាហ្វឹកហាត់ត្រៀមបានល្អ ដើម្បីការពារខ្សែក្រវាត់ Dragon Kun Khmer ដែលរូបគេដណ្តើមបានជាង២ឆ្នាំមកនេះ ឱ្យបាន។
អាំម៉ារីន បានបញ្ជាក់ថា៖ «ខ្ញុំបានហ្វឹកហាត់រហូត ត្រៀមទៅប្រកួតនៅជប៉ុន ប៉ុន្តែដោយសារការប្រកួតនោះ ត្រូវបានលុបចោលវិញ ខ្ញុំបានផ្តោតមកការត្រៀមខ្លួន ប្រកួតការពារខ្សែ នៅខេត្តព្រៃវែងនេះវិញ គឺខ្ញុំបានត្រៀមពេញតែម្តង។ ខ្ញុំនឹងប្រឹងប្រែងវ៉ៃឱ្យអស់ពីសមត្ថភាព ហើយនឹងដកស្រង់យកក្បាច់ពិសេសៗទៅប្រកួត មិនឱ្យខ្សែក្រវាត់ហ្នឹងបានទៅគេទេ គឺខ្សែក្រវាត់នេះនឹងស្ថិតនៅកម្ពុជារហូត»។
ចំណែក លោក អេ ភូថង បានបញ្ជាក់ជារួមថា៖ «ចំពោះការប្រកួតការពារខ្សែក្រវាត់របស់ ធឿន ធារ៉ា និង អេ អាំម៉ារីន នៅខេត្តព្រៃវែងនេះ ខ្ញុំប្តេជ្ញាថា មិនធ្វើឱ្យអ្នកខេត្តព្រៃវែងខកបំណងនោះទេ ហើយសង្ឃឹមថា ការប្រកួតនេះ នឹងមានអ្នកទស្សនិកជនទៅគាំទ្រច្រើនកុះករ ដើម្បីផ្សព្វផ្សាយគុនខ្មែរទៅកាន់ពិភពលោក»។
ចំពោះការប្រកួតរវាងក្រុមគុនខ្មែរ និងក្រុមអ្នកប្រដាល់ព័រទុយហ្គាល់ នៅទីរួមខេត្តព្រៃវែងនេះ ជើងខ្លាំង ធឿន ធារ៉ា ត្រូវប្រកួតការពារខ្សែក្រវាត់ Dragon Kun Khmer ទម្ងន់៧៣គីឡូក្រាម ជាមួយកីឡាករព័រទុយហ្គាល់ Lucas Carlos Da Silva រីឯ អេ អាំម៉ារីនភូថង ត្រូវការពារខ្សែក្រវាត់ទម្ងន់៦៦គីឡូក្រាមជាមួយអ្នកដាល់ Paulo Melo ចំណែកកីឡាករកម្ពុជា ឯម ឡេងលី, ឡុង អាឆើត និង រិទ្ធ វិបុល ត្រូវបានដាក់ឱ្យប្រកួតមិត្តភាពអន្តរជាតិជាមួយកីឡាករព័រទុយហ្គាល់ នៅយប់ថ្ងៃទី១៤ មេសានោះដូចគ្នា៕
