ការប្រកួតរវាងក្រុមវិសាខា (ពណ៌ស) និងក្រុមកងយោធពលខេមរភូមិន្ទ កាលពីជើងទី១ ដោយក្រុមទាំង២បានស្មើគ្នា ២-២។ រូបថត FFC
ក្រុមវិសាខា នឹងត្រូវបើកទ្វារកីឡដ្ឋានព្រីនស៍របស់ខ្លួន ដើម្បីប្រកួតកាត់សេចក្តីជើងទី២ វគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន លើកទី១៨ ឆ្នាំ២០២៥ ជាមួយក្រុមកងយោធពលខេមរភូមិន្ទ (ទ័ព) នាល្ងាចម៉ោង៦ ថ្ងៃពុធនេះ ដើម្បីស្វែករកក្រុមឈ្នះ ត្រូវឡើងទៅប្រកួតវគ្គពាក់កណ្តាលផ្តាច់ព្រ័ត្រ ហើយក្រុមព្រះខ័នរាជស្វាយរៀង ក៏ត្រូវប្រកួតកាត់សេចក្តីជាមួយក្រុមគិរីវង់សុខសែនជ័យ នៅល្ងាចថ្ងៃនេះដូចគ្នា។
សម្រាប់ការប្រកួតជើងទី១ កាលពីថ្ងៃទី២៦ ខែកុម្ភៈ ក្រុមវិសាខា បានបរាជ័យ សម្រាប់ការការពារគ្រាប់បាល់នាំមុខ២គ្រាប់របស់ខ្លួន ព្រោះត្រូវបានក្រុមទ័ព ដែលជាម្ចាស់ផ្ទះវាយបកបាន២គ្រាប់វិញ ដើម្បីបញ្ចប់ការប្រកួត ដោយលទ្ធផលស្មើគ្នា ២-២ ហើយលទ្ធផលនេះ បានធ្វើឱ្យជំនួបកាត់សេចក្តី ក្នុងជើងទី២នៅថ្ងៃនេះ កាន់តែមានភាពតានតឹង ព្រោះក្រុមទាំង២ សុទ្ធតែបានរៀបចំផែនការរួចរាល់ ដើម្បីដណ្តើមគ្នាយកជ័យជម្នះ។
ចំពោះលោក Tunji Ayoyinka Akeeb គ្រូបង្វឹកស្តីទីរបស់ក្រុមវិសាខា បានដាក់ទិសដៅដណ្តើមឱ្យបានជ័យជម្នះ។ លោកបាននិយាយថា៖ «ការប្រកួតនេះ ពិតជាសំខាន់ខ្លាំងសម្រាប់ក្រុមរបស់យើង ដែលយើងត្រូវការជ័យជម្នះចាំបាច់មែនទែន ដើម្បីសម្រេចគោលដៅរបស់យើង ព្រោះយើងមានគោលដៅចង់ឡើងទៅវគ្គបន្ទាប់ទៀតនៃពានរង្វាន់ Hun Sen Cup រដូវកាលនេះ»។
ជាមួយគ្នានេះ លោកគ្រូ ភា សុភ័ក្ត្រា គ្រូបង្គោលក្រុមទ័ព បានដឹងរួចទៅហើយថា ក្រុមរបស់លោក អាចនឹងមានការពិបាកខ្លាំង ក្នុងការរកបានគ្រាប់ ចំពោះការប្រកួតកាត់សេចក្តីនៅលើទឹកដីក្រុមវិសាខា នៅថ្ងៃពុធនេះ ព្រោះលោកបានមើលឃើញថា វិសាខា ពេលនេះ ធ្វើបានកាន់តែល្អខ្លាំង។
លោក សុភ័ត្ត្រា បានគូសបង្ហាញពីចំណុចខ្លាំងរបស់វិសាខា គឺជាក្រុមសម្បូរទៅដោយកីឡាករកម្រិត A អាចលេងបានល្អគ្រប់ស្ថានភាព ពិសេស វិសាខា មានកីឡាករបរទេសដល់ទី៥នាក់ ខណៈក្រុមទ័ព មានបរទេសត្រឹម៣នាក់ទេ។ បន្ថែមលើចំណុចអំណោយផលនេះ លោក សុភ័ត្រ្តា បានចាត់ទុក លោក Tunji Ayoyinka Akeeb ជាគ្រូបង្វឹកមានគុណភាពខ្ពស់ ក្នុងការដឹកនាំក្រុមវិសាខា ធ្វើឱ្យក្រុមនេះ មានភាពខ្លាំង។
លោក ភា សុភ័ក្ត្រា បាននិយាយក្នុងសន្និសីទកាសែត កាលពីថ្ងៃអង្គារថា៖ «ខ្ញុំមើលទៅលើ២ចំណុចនេះ ដែលធ្វើឱ្យវិសាខា ធ្វើបានល្អមែនទែន នៅក្នុងការប្រកួតលីគកំពូលកម្ពុជា ដែលចាត់ទុកថា ជាក្រុមលំដាប់កំពូលទាំង៣ រួមមាន ព្រះខ័នរាជស្វាយរៀង ភ្នំពេញក្រោន និងវិសាខា នេះឯង»។
ការប្រកួតរវាងក្រុមម្ចាស់ផ្ទះគិរីវង់សុខសែនជ័យ (ពណ៌បៃតង) និងក្រុមព្រះខ័នរាជស្វាយរៀង កាលជើងទី១។ រូបថត FFC
ជាមួយការមើលឃើញពីចំណុចខ្លាំងរបស់ក្រុមវិសាខា នេះ លោក ភា សុភ័ក្រ្តា បានកំណត់ផែនការលេងរួចហើយ គឺត្រូវលេងបិទ៩០នាទីពេញ ព្រោះនេះជាជម្រើសតែមួយគត់ ដែលអាចជួយឱ្យក្រុមទ័ព មានសង្ឃឹមខ្លះ ក្នុងការយកឈ្នះលើក្រុមវិសាខា តាមរយៈការទាត់បាល់ប៉េណាល់ទីកាត់សេចក្តី នៅពេលណាការប្រកួតនេះ គ្មានគ្រាប់បាល់កើតឡើង ធ្វើឱ្យក្រុមទាំង២ ស្មើគ្នាម្តងទៀតនោះ។
លោកបញ្ជាក់ថា៖ «ការប្រកួតនេះក្រុមរបស់យើង នឹងលេងបិទ៩០នាទីពេញ ដោយសារខ្ញុំមិនរំពឹងថា ការវាយបករបស់ក្រុមយើង មានប្រសិទ្ធភាពនោះទេ។ យើងមើលឃើញថា វិសាខា តែងតែមានខ្សែការពារយ៉ាងហោច២នាក់ ចាំទប់ស្កាត់ការវាយបក ហេតុនេះទោះបីជាយើងវាយបក យើងប្រហែលជាពិបាកទៅដល់មុខទីរបស់វិសាខា»។
«អ៊ីចឹងផែនការលេងរបស់យើង គឺត្រូវការពារ១២០ភាគរយតែម្តង បើសិនជាយើងអាចទប់ជាប់រហូតដល់បាល់ប៉េណាល់ទីកាត់សេចក្តី»។ លោក ភា សុភ័ត្រ្តា បានបញ្ជាក់បន្ថែម។
ចំណែកអ្នកចាំទី អ៊ុំ សេរីរ័ត្ន ក៏បានបង្ហាញការតាំងចិត្តខ្ពស់ ក្នុងការជួយដល់ក្រុម សម្រាប់ការវិលមកកាន់ទីលានជាថ្មីនេះ ដោយរូបគេរំពឹងថា នឹងអាចបានចូលលេង ក្នុងជម្រើស១១នាក់ដំបូង ជំនួសអ្នកចាំទី ម៉ាត់ ឡានី ដែលបានទទួលកាតក្រហម សម្រាប់ការប្រកួតកន្លងមក ហើយត្រូវជាប់ពិន័យ មិនបានចូលលេងក្នុងជំនួបថ្ងៃនេះ។
អ៊ុំ សេរី បាននិយាយ ក្នុងសន្និសីទកាសែតថា៖ «ការប្រកួតនេះ ក្រុមរបស់ខ្ញុំ នឹងខំប្រឹងឱ្យខ្លាំង ព្រោះជំនួបនេះ វាដូចជាការប្រកួតផ្តាច់ព្រ័ត្រអ៊ីចឹង។ យើងប៉ះគេខ្លាំង យើងត្រូវតែខ្លាំងដែរ។ ខ្ញុំសង្ឃឹមថា ពួកគាត់នឹងធ្វើបានល្អ ហើយបើសិនជាខ្ញុំមានឱកាសបានចូលលេង ខ្ញុំនឹងព្យាយាមធ្វើឱ្យបានល្អ ដើម្បីក្រុម»។
ចំណែកក្រុមព្រះខ័នរាជស្វាយរៀង ក៏ត្រូវបើកទ្វារកីឡដ្ឋានស្វាយរៀង ដើម្បីប្រកួតកាត់សេចក្តីជើងទី២ ជាមួយក្រុមគិរីវង់សុខសែនជ័យ នៅល្ងាចម៉ោង៦ថ្ងៃពុធនេះដូចគ្នា តែគេមិនរំពឹងថា ក្រុមគិរីវង់ អាចវាយបកយកឈ្នះក្រុមម្ចាស់ផ្ទះ ស្វាយរៀង បានវិញ ដើម្បីលុបចោលការចាញ់ក្រុមស្វាយរៀង ២-០ នាជំនួបជើងទី១ នៅលើទឹកដីខ្លួនឯង កាលពីថ្ងៃទី២៦ ខែកុម្ភៈ នោះទេ៕
