លោក អាំង សិរីពិសិដ្ឋ និងលោក លាង ម៉េង បានទះដៃស្វាគមន៍ការបង្ហាញវត្តមានរបស់កីឡាករបារាំង និងអាល្លឺម៉ង់ ទាំង៤នាក់ នៅក្នុងសន្និសីទកាសែត កាលពីថ្ងៃអង្គារ។ រូបថត សហព័ន្ធ
ក្លិបបាល់ទះវិសាខា បាននាំយកកីឡាករកម្រិតអាជីពរបស់បារាំង៣នាក់ និងអាល្លឺម៉ង់១នាក់ មកចូលរួមជាមួយកីឡាករក្នុងស្រុកចំនួន១០នាក់ផ្សេងទៀត សម្រាប់ដំណើរឆ្ពោះទៅការពារតំណែងជើងឯកការប្រកួតពានរង្វាន់បាល់ទះ Win+Streak Volleyball Invitational (WSVI) Tournament, Taichung 2025 នៅតៃវ៉ាន់ ដែលនឹងប្រកួតពីថ្ងៃទី៣០ ខែមេសា ដល់ថ្ងៃទី៤ ខែឧសភា។
ចំពោះកីឡាករបរទេសទាំង៤នាក់នេះ រួមមានកីឡាករបារាំង Francois Rebeyrol និង Titouan Halle ដែលអ្នកទាំង២នេះ ជាអ្នកវាយប្រយុទ្ធស្តាំ រីឯកីឡាករបារាំង Thomas Gill គឺជាអ្នកលើកបាល់ ចំណែកកីឡាករអាល្លឺម៉ង់ Sebastian Rosler ជាអ្នកធ្វើរនាំងកណ្តាល ហើយអ្នកទាំង៤នេះ បានបង្ហាញវត្តមាន នៅក្នុងសន្និសីទកាសែត កាលពីថ្ងៃអង្គារ។
លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានអះអាងថា អត្តពលិកបរទេសទាំង៤នាក់ ដែលវិសាខា បាននាំមកជួយក្លិប សម្រាប់ការប្រកួតនៅតៃវ៉ាន់នេះ សុទ្ធតែជាប្រភេទកីឡាករអាជីព គឺភាគច្រើនលេងនៅលីគAរបស់បារាំង និងអាល្លឺម៉ង់ ហើយកីឡាករប្រភេទអាជីពនេះ គឺទាំងវិន័យ ការហ្វឹកហាត់ និងការហូបចុក សុទ្ធតែមានរៀបរបបទាំងអស់។
ជាមួយគ្នានេះ លោកបានដាស់តឿនអត្តពលិករបស់កម្ពុជាទាំងអស់ ត្រូវរៀនយកទម្លាប់ល្អៗ ពីកីឡាករប្រភេទអាជីពទាំង៤នាក់នេះ ដើម្បីអាចអភិវឌ្ឍខ្លួនឯងទៅជាកីឡាករអាជីពដែរ ទាំងវិន័យនៃការហ្វឹកហាត់ ការដើរហើរ និងវិន័យនៃការហូបចុក ព្រោះនេះជាពេលវេលាដ៏លំបំផុត ដែលកម្រនឹងកើតមានណាស់។
លោក សិរីពិសិដ្ឋ បានបញ្ជាក់ថា៖ «កម្រិតរបស់យើង មិនងាយមានឱកាសបានហ្វឹកហាត់ជាមួយកីឡាករអាជីពទេ! បើសិនជាថ្នាក់ដឹកនាំក្លិបវិសាខា មិននាំចូលកីឡាករអាជីពទាំង៤នាក់នេះមកទេ យើងអាចប្រើភាសាថា មួយជីវិតរបស់យើង មិនអាចចាប់ដៃគូជាមួយប្រភេទកីឡាករអាជីព លេងនៅលីគបារាំង និងលីគអាល្លឺម៉ង់ បែបនេះឡើយ អ៊ីចឹងយើងត្រូវរៀនយកអ្វីដែលល្អៗពីពួកគាត់ ដើម្បីអាចអភិវឌ្ឍសមត្ថភាពរបស់យើង ក្លាយទៅជាប្រភេទកីឡាអាជីពទៅថ្ងៃអនាគត»។
សមាសភាពកីឡាករវិសាខា ទាំង១៤នាក់ រួមទាំងគ្រូបង្វឹក ដែលត្រូវចេញទៅប្រកួតពានរង្វាន់បាល់ទះ WSVI Tournament 2025 នៅតៃវ៉ាន់ បានថតជាមួយថ្នាក់ដឹកនាំ និងម្ចាស់ឧបត្ថម្ភ ក្នុងសន្និសីទកាសែត។ រូប សហព័ន្ធ
ងាកមកចាប់អារម្មណ៍សមាសភាពក្រុម ដែលត្រូវបានអញ្ជើញឱ្យចូលរួមការប្រកួតពានរង្វាន់បាល់ទះ WSVI Tournament, Taichung 2025នេះ លោក អាំង សិរីពិសិដ្ឋ បានទម្លាយថា សុទ្ធតែជាក្រុមខ្លាំង ដែលនឹងមានប្រកួតប្រជែងតានតឹងខ្លាំងជាងជាការប្រកួត កាលពីឆ្នាំមុន ដោយក្នុងនោះ ក្រុមវិសាខា ឈរនៅពូល A ជាមួយក្រុម Hyundai Capital Skywalkers របស់កូរ៉េខាងត្បូង ក្រុម MBSA Pelican របស់ម៉ាឡេស៊ី និងក្រុម Taichung Bank របស់តៃវ៉ាន់។
ចំណែកពូល B មានក្រុម Win+Streak របស់តៃវ៉ាន់ ក្រុម Jakarta Garuda របស់ឥណ្ឌូណេស៊ី ក្រុម Nakhon Ratchasima របស់ថៃ និងក្រុម Armed Forces របស់កូរ៉េខាងត្បូង។ ការប្រកួតតាមពូលទាំង២នេះ ចាប់ផ្តើមពីថ្ងៃទី៣០ ខែមេសា ដល់ថ្ងៃទី២ ខែឧសភា ដើម្បីយកក្រុមលេខ១ និងលេខ២នៃពូលទាំង២ ទៅប្រកួតខ្វែង ឬវគ្គពាក់កណ្តាលផ្តាច់ព្រ័ត្រ នៅថ្ងៃទី៣ ឧសភា រួចយកក្រុមឈ្នះឡើងទៅប្រកួតផ្តាច់ព្រ័ត្រ នៅថ្ងៃទី៤ ខែឧសភា។
យ៉ាងណាក៏ដោយ តាមសមាសភាពកីឡាករទាំង១៤នាក់ ជាពិសេសអត្តពលិកបរទេសទាំង៤នាក់ ដែលក្លិបវិសាខា បាននាំយកមកជួយក្រុមលើកនេះ គឺនៅតែធ្វើឱ្យ វិសាខា មានអាទិភាពច្រើន ក្នុងការបន្តឈ្នះជើងឯក។ លោក អាំង សិរីពិសិដ្ឋ បានបញ្ជាក់ថា៖ «យើងអាចរំពឹងគិតថា ពួកយើងក្បែរ នឹងប្រភេទកីឡាករអាជីពទៅហើយ ដែលនឹងទទួលយកតំណែងជើងឯក នៅកោះតៃវ៉ាន់បាន»។
លោកបន្ថែមថា៖ «កីឡាករ១៤នាក់ ដែលយើងបញ្ជូនទៅនេះ សុទ្ធតែមានគុណសម្បត្តិស្មើៗគ្នា នៅពេលដែលយើងទទួលបានជយលាភីជាម្ចាស់ជើងឯក ព្រោះបើពួកយើងលេងមិនកើត ក៏អត្តពលិកបរទេស៤នាក់នេះ ទៅលេងមិនឈ្នះគេនោះដែរ អ៊ីចឹងវាត្រូវតែមានការរួមបញ្ជូនគ្នា បូករួមទាំងគណៈគ្រូបង្វឹកនៅទីនេះ ដែលសុទ្ធតែអ្នកមានចំណែក សម្រាប់ការឆ្ពោះទៅការពារតំណែងជើងឯក នៅកោះតៃវ៉ាន់ លើកនេះ»។
ជាមួយគ្នានេះ លោក លាង ម៉េង សហស្ថាបនិក និងជាប្រធានអគ្គនាយកក្រុមហ៊ុន ខ្មែរប៊ែវើរីជីស ដែលជាអ្នកឧបត្ថម្ភធំ ដល់ក្រុមវិសាខា សម្រាប់ដំណើរឆ្ពោះទៅការពារតំណែងជើងឯកពានរង្វាន់បាល់ទះ WSVI Tournament, Taichung 2025 នៅតៃវ៉ាន់នេះ បានបង្ហាញសុទិដ្ឋិនិយមខ្ពស់ថា ក្រុមវិសាខា នឹងអាចឈ្នះតំណែងជើងឯកម្តងទៀត ហើយលោកក៏ត្រៀមរៀបចំពិធីជប់លៀង និងកាដូពិសេស សម្រាប់ការនាំយកជ័យជម្នះត្រឡប់មកវិញ របស់ក្រុមតំណាងឱ្យកម្ពុជាមួយនេះដែរ។
លោក លាង ម៉េង បានថ្លែងថា៖ «សហព័ន្ធ លោកបានមើលឃើញច្បាស់ហើយថា កីឡាករ ដែលត្រូវបានជ្រើសរើសយកទៅប្រកួតនេះ សុទ្ធតែមានសមត្ថភាព អាចការពារតំណែងជើងឯកនេះបាន ហើយក្នុងនាមខ្ញុំជាអ្នកដឹកនាំកំពូលមួយរូបរបស់ក្រុមហ៊ុនខ្មែរប៊ែវើរីជីស បានខិតខំចូលរួមចំណែកឱ្យបានខ្លាំង និងគាំទ្រពេញទំហឹង គឺធ្វើម៉េចឱ្យកីឡារបស់យើងកាន់តែខ្លាំង ដើម្បីធ្វើឱ្យប្រទេសផ្សេងៗ ក៏ដូចជាពិភពលោក មានការជឿជាក់លើក្រុមបាល់ទះរបស់កម្ពុជាយើង»៕
