លោក លាង ម៉េង និងលោក ឈុន សំណាង ពេលចុះហត្ថលេខាលើអនុស្សារណៈយោគយល់គ្នា កាលពីថ្ងៃទី២៧ ខែមេសា ដើម្បីបង្កើតព្រឹត្តិការណ៍កីឡាអេឡិចត្រូនិកអន្តរជាតិ នៅកម្ពុជា។ រូប ឈន ណន
ក្រុមហ៊ុន ខ្មែរប៊ែវើរីជីស និងក្រុមហ៊ុន T.Y Media បានឈានដល់ការចុះហត្ថលេខាលើអនុស្សារណៈយោគយល់គ្នា (MoU) ក្នុងការបង្កើតព្រឹត្តិការណ៍កីឡាអេឡិចត្រូនិក (Esports) អន្តរជាតិថ្មីមួយទៀត គឺការប្រកួត Vikingz Warrior Mekong Invitations 2025 បន្ថែមទៅលើការប្រកួត Queen Legends រដូវកាលទី១ ដែលទើបបានបញ្ចប់ដោយជោគជ័យ កាលពីថ្ងៃទី២៧ ខែមេសា។
លោក លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុនខ្មែរប៊ែវើរីជីស (Khmer Beverages) បានបង្ហាញភាពរីករាយ ដែលបានសហប្រតិបត្តិការជាមួយ T.Y Media ក្នុងការបង្កើតឱ្យមានព្រឹត្តិការណ៍ Esports អន្តរជាតិនៅកម្ពុជា ហើយលោកបានចាត់ទុកការចុះ MoU នេះថា ជាការចាប់ផ្តើមចូលរួមចំណែកមួយយ៉ាងសំខាន់ ដែលនឹងក្លាយជាមូលដ្ឋានគ្រឹះក្នុងការអភិវឌ្ឍកីឡា Esports នៅកម្ពុជា ឱ្យបោះជំហ៊ានទៅមុខកាន់តែប្រសើរឡើងមួយកម្រិតទៀត។
លោកបញ្ជាក់ថា៖ «កិច្ចសហប្រតិបត្តិការរបស់ Khmer Beverages និងT.Y Media នឹងក្លាយជាមូលដ្ឋានគ្រឹះដ៏សំខាន់ ក្នុងការអភិវឌ្ឍវិស័យកីឡាអេឡិចត្រូនិកកម្ពុជា ឱ្យកាន់តែរីកចម្រើនឥតឈប់ឈរ ព្រមទាំងបានក្លាយជាស្ពានមួយក្នុងការនាំយកព្រឹត្តិការណ៍ថ្មីៗ និងទាក់ទាញ មកកម្ពុជា ដើម្បីពង្រីកវិសាលភាពឧស្សាហកម្មកីឡាអេឡិចត្រូនិក ក្នុងស្រុកកាន់តែទូលំទូលាយទ្វេដង»។
តាមរយៈការចុះ MoU នៅមជ្ឈមណ្ឌលកីឡាអេឡិចត្រូនិក T.Y Media Esports Center (ផ្លូវ ៦០ម៉ែត្រ) កាលពីថ្ងៃទី២៧ ខែមេសានោះ លោក ឈុន សំណាង អគ្គនាយកក្រុមហ៊ុន T.Y Media បានឱ្យដឹងថា ការប្រកួតកីឡាអេឡិចត្រូនិកអន្តរជាតិ Vikingz Warrior Mekong Invitations 2025 លើវិញ្ញាសា Mobile Legends: Bang Bang នេះ មាន៤ប្រទេសចូលរួម គឺម្ចាស់ផ្ទះកម្ពុជា វៀតណាម ថៃ និងឡាវ។
លោក ឈុន សំណាង បានបញ្ជាក់ថា ព្រឹត្តិការណ៍ថ្មីនេះ ជាការបង្កើតប្រវត្តិសាស្រ្តថ្មីមួយ សម្រាប់វិស័យ Esports នៅកម្ពុជា ហើយព្រឹត្តិការណ៍នេះ នឹងផ្តល់ឱកាសដ៏សំខាន់សម្រាប់កីឡាករ បានបង្ហាញពីសមត្ថភាពរបស់ពួកគេទៅកាន់អន្តរជាតិ និងការទទួលបានបទពិសោធន៍បន្ថែម ដើម្បីជាដើមទុនក្នុងការចូលរួមប្រកួតតំណាងជាតិ នៅក្នុងការប្រកួតអន្តរជាតិនានា នាពេលខាងមុខ។
ជាមួយគ្នានេះ ក្នុងនាមជាអ្នករៀបចំព្រឹត្តិការណ៍កីឡាអេឡិចត្រូនិកអន្តរជាតិ នាពេលខាងមុខនេះ លោក ឈុន សំណាង បានបញ្ជាក់ថា៖ «ក្នុងនាមជាអគ្គនាយកក្រុមហ៊ុន T.Y Media និងអ្នករៀបចំការប្រកួត ខ្ញុំសូមសន្យាថា ក្រុមហ៊ុនយើងខ្ញុំ នឹងរៀបចំការប្រកួត Vikingz Warrior Mekong Invitations 2025 នេះឱ្យមានលក្ខណៈស្តង់ដាអន្តរជាតិ ប្រកបដោយភាពសុក្រឹត និងយុត្តិធម៌»។
ចំណែកលោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិក បានគាំទ្រពេញទំហឹងទៅដល់ក្រុមហ៊ុនខ្មែរប៊ែវើរីជីស និង T.Y Media ដែលបានរួមគ្នារៀបចំឱ្យមានព្រឹត្តិការណ៍កីឡាអេឡិចត្រូនិកអន្តរជាតិ Vikingz Warrior Mekong Invitations 2025 នេះឡើង ដែលស្របទៅតាមផែនការអភិវឌ្ឍន៍របស់សហព័ន្ធ គឺចង់ឱ្យមានការប្រកួតលក្ខណៈអន្តរជាតិ កាន់តែច្រើន ដើម្បីអភិវឌ្ឍធនធានមនុស្ស រួមមានគ្រូបង្វឹក កីឡាករ កីឡាការិនី មន្ត្រីបច្ចេកទេស និងអាជ្ញាកណ្ដាល។
លោក លន់ សាមឌី បានបន្ថែមថា៖ «២០២៥ ជាឆ្នាំស៊ីហ្គេមនៅប្រទេសថៃ អ៊ីចឹងព្រឹត្តិការណ៍នេះ បានរួមចំណែកដល់ការហ្វឹកហាត់ ក៏ដូចជាផ្លាស់ប្តូរបទពិសោធន៍ និងតេស្តសមត្ថភាពដល់អត្តពលិកយើង ព្រោះបើមានតែការហ្វឹកហាត់ អត់មានការប្រកួត ធ្វើម៉េចដឹងថា យើងខ្លាំងកម្រិតណា! ហើយបើមានការប្រកួតតែក្នុងស្រុកជាមួយកីឡាករខ្មែរគ្នាឯង ក៏អត់ដឹងថា យើងខ្លាំងកម្រិតណានោះដែរ តែ Vikingz Warrior Mekong Invitations ជាការប្រកួតអន្តរជាតិ ដែលខ្ញុំជឿថា អ្នកគាំទ្រ ក៏នឹងមកទស្សនាផ្ទាល់យ៉ាងច្រើនកុះករដែរ»៕
