គ្រូបង្វឹកក្រុមស្វាយរៀង លោក Pep Munoz ដាក់គោលដៅយកឈ្នះក្រុមណាហ្គាវើលដ៍ នៅថ្ងៃពុធ ដើម្បីលើកពានលីគកំពូលកម្ពុជា មុនពេលកំណត់។ រូបថត ស្វាយរៀង
ក្រុមព្រះខ័នរាជស្វាយរៀង ហាក់មានការអន្ទះសា ចង់ឈ្នះពានលីគកំពូលកម្ពុជា រដូវកាលឆ្នាំ២០២៤-២០២៥ ឱ្យបានលឿន តាមដែលអាចធ្វើទៅបាន ដើម្បីមានទឹកចិត្តកាន់តែខ្លាំងក្នុងការផ្តោតទៅលើការប្រកួតផ្តាច់ព្រ័ត្រ AFC Challenge League ដោយក្រុមស្វាយរៀង ត្រូវជួបក្រុម FK Arkadag នៅពហុកីឡដ្ឋានជាតិមរតកតេជោ នាថ្ងៃទី១០ ខែឧសភា។
លោក Pep Munoz គ្រូបង្គោលក្រុមព្រះខ័នរាជស្វាយរៀង បានដាក់គោលដៅដណ្តើមឱ្យបាន៣ពិន្ទុ សម្រាប់ការស្វាគមន៍ក្រុមណាហ្គាវើលដ៍ នៅកីឡដ្ឋានស្វាយរៀង នាល្ងាចម៉ោង៦ ថ្ងៃពុធស្អែកនេះ ដើម្បីឈ្នះពានលីគកំពូលកម្ពុជា ដោយស្វ័យប្រវត្តិតែម្តង ទោះនៅសល់២ប្រកួតជាបន្តទៀត ខណៈការជួបគ្នាចុងក្រោយ កាលពីថ្ងៃទី២៩ ខែមីនា ក្រុមស្វាយរៀង បានយកឈ្នះក្រុមម្ចាស់ផ្ទះណាហ្គាវើលដ៍ ៤-០។
លោក Pep បានបញ្ជាក់ថា៖ «មួយរយៈចុងក្រោយនេះ យើងបានឈ្នះការប្រកួតរហូត ហើយយើងត្រូវរក្សាលទ្ធផលរបៀបនេះទៀត។ បើយើងឈ្នះការប្រកួតនៅថ្ងៃពុធ មានន័យថា យើងឈ្នះពានកាន់តែលឿន គឺរឹតតែល្អ អ៊ីចឹងការប្រកួតនៅថ្ងៃពុធ (ជាមួយណាហ្គាវើលដ៏) យើងចង់បង្ហាញគុណភាពក្រុមលេងឱ្យបានល្អ ក៏ដូចជាដណ្តើមយក៣ពិន្ទុ»។
គ្រូបង្វឹកសញ្ជាតិអេស្ប៉ាញ លោក Pep Munoz បាននិយាយបែបនេះ បន្ទាប់ពីលោកបានដឹកនាំក្រុមស្វាយរៀង យកឈ្នះក្រុមអង្គរថាយហ្គឺរ ៦-១ កាលពីថ្ងៃអាទិត្យ ហើយការដណ្តើមបាន៣ពិន្ទុនោះ បានជួយឱ្យក្រុមឈរនៅលេខរៀងទី១ ពប្រក្ហបុរស្វាយរៀង មាន៧០ពិន្ទុ ដាញ់ឆ្ងាយពីក្រុមឈរនៅលេខ២ ភ្នំពេញក្រោន ចំនួន៧ពិន្ទុ ខណៈ ភ្នំពេញក្រោន បានចាញ់ក្រុមម្ចាស់ផ្ទះ បឹងកេត ៤-៣ ទាំងឈឺចាប់ កាលពីថ្ងៃអាទិត្យនោះ។
យោងតាមលទ្ធផល និងការប្រកួតដែលនៅសល់ចំនួន៣ដងដូចគ្នានោះ ក្រុមស្វាយរៀង នឹងឈ្នះពានលីគកំពូលកម្ពុជា ដោយស្វ័យប្រវត្តិតែម្តង បើសិនជាពួកគេ អាចដណ្តើមបាន៣ពិន្ទុពីក្រុមណាហ្គាវើលដ៍ នៅថ្ងៃពុធ ហើយលោក Pep Munoz ចង់ឃើញហេតុការណ៍ដ៏រំភើបនេះ កើតមានឡើង នៅចំពោះមុខអ្នកគាំទ្រ ក្នុងកីឡដ្ឋានស្វាយរៀង នាយប់ថ្ងៃពុធស្អែកនេះតែម្តង។
ការប្រកួតរវាងក្រុមព្រះខ័នរាជស្វាយរៀង (ពណ៌ស) និងក្រុមណាហ្គាវើលដ៏ កាលពីថ្ងៃទី២៩ ខែមីនា ដោយស្វាយរៀង បានយកឈ្នះ ៤-០។ រូបថត ស្វាយរៀង
បើសិនជាគ្រប់យ៉ាងបានកើតមានឡើង ទៅតាមការចង់បានរបស់លោក Pep មែននោះ គឺក្រុមស្វាយរៀង នឹងមានកម្លាំងចិត្តកាន់តែខ្លាំង ក្នុងការផ្តោតអារម្មណ៍ទៅលើការប្រកួតផ្តាច់ព្រ័ត្រពានរង្វាន់ AFC Challenge League ជាមួយក្រុម FK Arkadag នៅពហុកីឡដ្ឋានជាតិមរតកតេជោ នាថ្ងៃទី១០ ខែឧសភា ហើយនេះជាការប្រកួតបាល់ទាត់អន្តរជាតិដ៏ធំ មិនធ្លាប់មាននៅកម្ពុជា។
មហាគ្រួសារបាល់ទាត់នៅកម្ពុជា ជាពិសេសអ្នកគាំទ្រ បានកំពុងផ្តោតអារម្មណ៍ខ្លាំងទៅលើការប្រកួតនេះ ដោយពួកគេរំពឹងថា ក្រុមស្វាយរៀង នឹងអាចយកឈ្នះក្រុម FK Arkadag របស់ប្រទេសតួកមេនីស្ថានមួយនេះ ដើម្បីក្លាយជាក្លិបតំណាងឱ្យកម្ពុជាដំបូងគេ ដែលបានលើកពាន AFC Challenge League នេះ។
ជាមួយគ្នានេះ ប្រព័ន្ធផ្សព្វផ្សាយជាតិ និងអន្តរជាតិជាច្រើន បានត្រៀមរួចរាល់ ក្នុងការទៅផ្តិតយករូបភាព និងយកព័ត៌មាននៃការប្រកួតផ្តាច់ព្រ័ត្ររវាងក្រុមស្វាយរៀង និងក្រុម FK Arkadag ហើយជាមួយគ្នានេះ លោក ឌី វិជ្ជា ប្រធានក្លិបព្រះខ័នរាជស្វាយរៀង បានប្រាប់ឱ្យគ្រប់ប្រព័ន្ធផ្សព្វផ្សាយ ទៅចុះឈ្មោះជាមួយក្រុមការងារផ្សព្វផ្សាយរបស់ក្លិប ដើម្បីទទួលបានសំបុត្រទស្សនា និងវត្ថុអនុស្សាវរីយ៍។
លោក ឌី វិជ្ជា បានបង្ហោះសារបញ្ជាក់ នៅលើផេចហ្វេសប៊ុករបស់លោក កាលពីថ្ងៃចន្ទថា៖ «សូមជម្រាបជូនដល់បងប្អូនសារព័ត៌មានកីឡាទាំងអស់ ខ្ញុំនឹងផ្តល់ជូនសំបុត្រទស្សនាការប្រកួតវគ្គផ្តាច់ព្រ័ត្រ AFC Challenge League ក្នុងម្នាក់ចំនួន២សំបុត្រ រួមទាំងកន្សែងក្លិបបាល់ទាត់ព្រះខ័នរាជស្វាយរៀង សម្រាប់ចូលរួមទស្សនា និងផ្សព្វផ្សាយពីសកម្មភាពនានា ក្នុងការប្រកួតវគ្គផ្តាច់ព្រ័ត្រ ថ្ងៃទី១០ ខែឧសភា ឆ្នាំ២០២៥ ខាងមុខនេះ»៕
