កីឡាករកម្ពុជា ចំរើន គុនខ្មែរ នឹងត្រូវប្រកួតដណ្តើមខ្សែក្រវាត់ ទម្ងន់៦១គីឡូក្រាម ជាមួយជើងខ្លាំងរបស់ជប៉ុន តៃម៉ូ ហ៊ីសៃ នៅយប់នេះ។ រូបថត ថោន
កីឡាករកម្ពុជា ចំរើន គុនខ្មែរ នឹងត្រូវប្រកួតដណ្តើមខ្សែក្រវាត់ ជាមួយជើងខ្លាំងរបស់ជប៉ុនតៃម៉ូ ហ៊ីសៃ (Daimu Hishi) ដែលរៀបចំដោយសង្វៀនថោន នៅក្បែរដីឡូតិ៍វត្តស្ងូនពេជ្រ ខណ្ឌកំពូល នាយប់ថ្ងៃព្រហស្បតិ៍នេះ ហើយកីឡាករ កីឡាការិនីរបស់កម្ពុជា៤នាក់ទៀត ក៏ត្រូវដាក់ឱ្យប្រកួតជាមួយអ្នកប្រដាល់មកពីជប៉ុនផងដែរ។
សម្រាប់ការវិលត្រឡប់មកប្រកួតដណ្តើមខ្សែក្រវាត់ជាលើកទី២ នៅកម្ពុជានេះ តៃម៉ូ ហ៊ីសៃ បានបង្ហាញការជឿជាក់ខ្លាំង ក្នុងការយកឈ្នះលើ ចំរើន គុនខ្មែរ ហើយនៅក្នុងសន្និសីទកាសែត កាលពីថ្ងៃពុធ តៃម៉ូ បានអះអាងថា រូបគេបានដឹងពីបច្ចេកទេស និងក្បាច់ប្រកួតរបស់ ចំរើន រួចទៅហើយ។
កីឡាករជើងខ្លាំងរបស់ជប៉ុន ដែលធ្លាប់ផ្តួល ពេជ្រ សម្បត្តិ និង ឈុត សេរីវ៉ាន់ថង ឱ្យសន្លប់ តៃម៉ូ ហ៊ីសៃ បាននិយាយថា៖ «ខ្ញុំមានសង្ឃឹម១០០ភាគរយថា ត្រូវតែឈ្នះការប្រកួតនេះ។ ខ្ញុំបានមើលពីការប្រកួតរបស់ ចំរើន រួចហើយ ហេតុនេះខ្ញុំអាចស្រមើស្រមៃដឹងពីរបៀបប្រកួត និងក្បាច់ប្រកួតរបស់គាត់បាន»។
ជាមួយការបញ្ជាក់ពីទំនុកចិត្តរបស់កីឡាករ តៃម៉ូ នេះ ចំរើន គុនខ្មែរ បានឆ្លើយតបទៅវិញបែបនេះថា៖ «នៅពេលគេរំពឹងខ្ពស់បែបនេះ ខ្ញុំកាន់តែសប្បាយចិត្ត ព្រោះជួបកីឡាករល្អហើយ គេរំពឹងខ្ពស់លើយើងបែបនេះ អ៊ីចឹងខ្ញុំក៏មានសង្ឃឹម៨០ភាគរយ ក្នុងការយកខ្សែក្រវាត់នេះផងដែរ»។
បើទោះបីជា ចំរើន គុនខ្មែរ បានបង្ហាញការតាំងចិត្តប្រកួតដណ្តើមខ្សែក្រវាត់ជាមួយ តៃម៉ូ ដោយភាពជឿជាក់យ៉ាងនេះក្តី ប៉ុន្តែ អ្នកគាំទ្រ និងគ្រូប្រដាល់មួយចំនួន បានបង្ហាញការព្រួយបារម្ភចំពោះ ចំរើន ព្រោះស្ថានភាពរបួសបែក នៅលើផ្ទៃមុខរបស់គេ កាលប្រកួតនៅប្រទេសអូស្រ្តាលី កាលពីថ្ងៃទី២២ ខែមីនា នៅមិនទាន់ជាសះស្បើយ១០០ភាគរយទេ ហើយការហ្វឹកហាត់ក៏មិនបានពេញនោះដែរ។
នៅក្នុងបទសម្ភាសជាមួយប្រព័ន្ធផ្សាយកាលពីអង្គារ ចំរើន គុនខ្មែរ បាននិយាយថា៖ «ខ្ញុំសប្បាយចិត្ត ដែលបានជួបអ្នកខ្លាំង គ្រាន់តែថា យើងមកពីអូស្រ្តាលីវិញ ហ្វឹកហាត់អត់បានដិតដល់ល្អ ហើយរបួសរបស់ខ្ញុំ បានជា៧០ភាគរយហើយ។ ចំណែក តៃម៉ូ ពីមួយប្រកួតទៅមួយប្រកួត កាន់តែល្អ និងមានការហ្វឹកហាត់កាន់តែខ្លាំង»។
ចំរើន គុនខ្មែរ បានបន្ថែមថា៖ «ចំណុចពិសេសរបស់ តៃម៉ូ គឺគាត់ចូលបុកវ៉ៃ អត់សូវអស់សុហ្វ ហើយគាត់វាយចេញធ្ងន់ៗ អ៊ីចឹងខ្ញុំមានតែតាំងចិត្តថា ពេលឡើងទៅ វ៉ៃឱ្យអស់ពីសមត្ថភាព គឺចាញ់ ឬឈ្នះ ត្រូវធ្វើឱ្យអស់ ទៅតាមអ្វីដែលអ្នកគាំទ្រ និងប្រជាជនខ្មែរយើង បានផ្តល់ទំនុកចិត្តមកលើយើង»។
ដោយឡែកកីឡាករកម្ពុជា ម៉ឺន មេឃា, សូត្រ វាសនា, គោរមៈ ច័ន្ទរាជ្យ និងកីឡាការិនី ទូច ចាន់វត្តី ក៏ត្រូវបានដាក់ឱ្យប្រកួតមិត្តភាពអន្តរជាតិជាមួយកីឡាករ កីឡាការិនីរបស់ជប៉ុន នាយប់ម៉ោង៨ ថ្ងៃព្រហស្បតិ៍នេះដូចគ្នា ខណៈលោក Tommy Kim ប្រធាន IPCC ប្រចាំប្រទេសកម្ពុជា និងអ្នកស្រី Asakura Chisa ប្រធាន IPCC ប្រចាំប្រទេសជប៉ុន បានអះអាងថា ការប្រកួតនេះ នឹងមានភាពស្វិតស្វាញ ហើយនឹងក្លាយជាការប្រកួតដ៏ល្អមួយ ក្នុងការផ្សព្វផ្សាយ «គុនខ្មែរ» ដែលកំពុងទទួលបានការគាំទ្រច្រើននៅប្រទេសជប៉ុន។
លោក Tommy Kim ដែលជាទីបឹក្សាស្ថានីយទូរទស្សន៍ថោន ផងនោះ បានឱ្យដឹងថា កីឡាករ កីឡាការិនីជប៉ុនទាំង៥នាក់នេះ សុទ្ធតែជាជើងខ្លាំង ហេតុនេះលោកបានជំរុញឱ្យកីឡាករ កីឡាការិនីគុនខ្មែរទាំង៥នាក់នេះ ត្រូវប្រឹងប្រែងប្រកួតឱ្យអស់ពីលទ្ធភាព ដោយយកប្រទេសជាតិ ដាក់ក្នុងបេះដូង។
លោកបញ្ជាក់ថា៖ «ជប៉ុនមកលើកនេះ តាងតឹងបន្តិចហើយ ព្រោះ៥នាក់ដែលគាត់បញ្ជូនមក សុទ្ធតែជាជើងឯក និងម្ចាស់ខ្សែក្រវាត់ តែកីឡាករ កីឡាការិនីគុនខ្មែរទាំង៥នាក់របស់យើង ក៏សុទ្ធតែសម្រិតសម្រាំងផងដែរ ហេតុនេះសូមឱ្យប្អូនៗប្រកួតដោយយកចិត្តទុកដាក់ យកបេះដូងជាតិ មកដាក់ក្នុងបេះដូងខ្លួនឯង។ នៅលើសង្វៀន ត្រូវប្រកួតឱ្យអស់ពីលទ្ធភាព ដោយគិតថា យើងធ្វើដើម្បីមុខមាត់ជាតិ និងបង្ហាញគុនខ្មែររបស់យើងទៅកាន់ប្រទេសគេ ថាពិតជាខ្លាំង និងអស្ចារ្យប៉ុនណា»៕
