ការប្រកួតរវាងក្រុមភ្នំពេញក្រោន (ក្រហម) និងក្រុមព្រះខ័នរាជស្វាយរៀង កាលពីថ្ងៃទី២៦ ខែមករា។ រូបថត ភ្នំពេញក្រោន
ក្រុមភ្នំពេញក្រោន និងព្រះខ័នរាជស្វាយរៀង នឹងត្រូវវិលមកជួបគ្នា នៅកីឡដ្ឋានស្មាតអអេសអ៊ិន នាល្ងាចថ្ងៃសៅរ៍នេះ ខណៈក្រុមទាំង២ សុទ្ធតែបានបង្ហាញការតាំងចិត្តដណ្តើមគ្នាយក៣ពិន្ទុ នៅក្នុងជំនួបដ៏ធំនេះ ដើម្បីបង្កើតឱកាសឈានទៅរកការឈ្នះពានលីគកំពូលកម្ពុជា នារដូវកាលឆ្នាំ២០២៤-២០២៥នេះ។
តាមរយៈការប្រកួត២៤លើកដូចគ្នា កន្លងមកនេះ ក្រុមព្រះខ័នរាជស្វាយរៀង កំពុងឈរនៅកំពូលតារាង ដោយមាន៦១ពិន្ទុ លើសក្រុមលេខ២ ភ្នំពេញក្រោន តែ១ពិន្ទុទេ ហេតុនេះការវិលមកជួបគ្នារបស់ក្រុមទាំង២នេះ វាជាការប្រកួតដ៏ធំ និងមានភាពទាក់ទាញបំផុត ដើម្បីប្រជែងគ្នាប្រជែងគ្នាយកតំបន់កំពូលតារាង។
លោក Pep Munoz គ្រូបង្គោលក្រុមស្វាយរៀង បាននិយាយក្នុងសន្និសីទកាសែត នៅថ្ងៃសុក្រនេះថា៖ «ការប្រកួតនៅថ្ងៃស្អែក ជាការប្រកួតដ៏សំខាន់សម្រាប់យើង ហើយយើងនឹងព្យាយាមលេងឱ្យបានល្អ ដើម្បីដណ្តើមយក៣ពិន្ទុ ដោយយើងបានត្រៀមល្អហើយ អ៊ីចឹងនឹងព្យាយាមដណ្តើមយក៣ពិន្ទុមកវិញ»។
ចំណែកលោក Oleg Starynskyi គ្រូបង្គោលក្រុមភ្នំពេញក្រោន មិនបានគិតថា ការវិលមកជួបក្រុមព្រះខ័នរាជស្វាយរៀង នៅថ្ងៃសៅរ៍នេះ ជាការប្រកួត ដែលនឹងកំណត់ជាក់លាក់ពីក្រុម ដែលត្រូវឈ្នះតំណែងជើងឯកនោះទេ ព្រោះបន្ទាប់ពីការប្រកួតនេះទៅ គឺការប្រកួតប្រជែងរវាងក្រុម Top6 នេះ នៅមានការប្រកួតចំនួន៥ដងទៀត ហេតុអ្វីៗក៏នឹងអាចប្រែប្រួលទៅតាមហ្នឹងដែរ។
ប៉ុន្តែលោកយល់ថា ការដណ្តើមយក៣ពិន្ទុពិតជាសំខាន់។ លោក Oleg បានបញ្ជាក់ក្នុងសន្និសីទកាសែតថា៖ «លទ្ធផលការប្រកួតនៅថ្ងៃស្អែក វាមិនទាន់អាចបញ្ជាក់បានថា ក្រុមណា នឹងក្លាយជាម្ចាស់ជើងឯកនៅឡើយទេ ព្រោះយើងនៅសល់៥ប្រកួតទៀត គឺយើងគ្រាន់តែអាចដឹងពីក្រុមដែលអាចមានអាទិភាពខ្ពស់ អ៊ីចឹងយើងនឹងប្រឹងប្រែងឱ្យអស់ពីលទ្ធភាព ដើម្បីដណ្តើមយក៣ពិន្ទុដ៏សំខាន់នេះ»។
គួរបញ្ជាក់ថា សម្រាប់ការប្រកួតជួបគ្នា២លើក នៅជុំទី១ កន្លងមក ក្រុមភ្នំពេញក្រោន បានយកឈ្នះលើក្រុមស្វាយរៀង ៤-៣ ក្នុងការប្រកួតជើងទី១ នៅលើទឹកដីខ្លួន កាលពីថ្ងៃទី២០ ខែតុលា ឆ្នាំ២០២៤ តែពួកគេ បានចាញ់ក្រុមស្វាយរៀង ៣-១ វិញ សម្រាប់ការប្រកួតជើងទី២ នៅក្រៅទឹកដី កាលពីថ្ងៃទី២៦ ខែមករា ឆ្នាំ២០២៥។
រំឭកទៅដល់ការប្រកួតចាញ់ក្រុមភ្នំពេញក្រោន ៤-៣ នៅកីឡដ្ឋានស្មាតអអេសអ៊ិន កាលពីថ្ងៃទី២០ ខែតុលានោះ លោក Pep បានអះអាងថា៖ «ភ្នំពេញក្រោន កាលនោះមានកំណត់ត្រាមិនទាន់ចាញ់ទេ ហើយយើងក៏មានសម្ពាធដែរ ព្រោះយើងចាញ់ ភ្នំពេញក្រោន ៤ពិន្ទុ ប៉ុន្តែការជួបគ្នាលើកនេះ យើងលើសភ្នំពេញក្រោន១ពិន្ទុវិញ»។
លោកបន្ថែមថា៖ «ក្នុងរយៈពេលជាង១ឆ្នាំមកនេះ ខ្ញុំនៅមិនទាន់អាចយកឈ្នះក្រុមភ្នំពេញក្រោន នៅក្នុងទឹកដីរបស់ពួកគេទេ អ៊ីចឹងខ្ញុំចង់ឈ្នះភ្នំពេញក្រោន ហើយការមកលើកនេះ មិនមែនត្រឹមតែឈ្នះការប្រកួតទេ ប៉ុន្តែយើងចង់ផ្តល់ការប្រកួតមួយដ៏ល្អ បង្ហាញពីឆន្ទៈ ក៏ដូចជាមហិច្ឆតារបស់យើង ជាពិសេសលេងឱ្យបានល្អនៅទីនេះ»។
យ៉ាងណាក៏ដោយ លោក Pep បានមើលឃើញថា ការលេងជាលក្ខណៈបុគ្គលរបស់កីឡាករក្រុមភ្នំពេញក្រោន ទាំងកីឡាករខ្មែរ និងបរទេស គឺមានគុណភាពល្អ ហើយការលេងជាក្រុមវិញ ភ្នំពេញក្រោន បានផ្លាស់ប្តូរប្រព័ន្ធលេងមួយចំនួនស្រដៀងទៅនឹងពីការលេងពីឆ្នាំមុន ដែលក៏ជាក្តីបារម្ភសម្រាប់លោកផងដែរ។
គ្រូបង្វឹកសញ្ជាតិអេស្ប៉ាញរូបនេះ បានបន្ថែមថា៖ «ពេលនេះវាចុងរដូវកាលទៅទៀត អ៊ីចឹងកីឡាករម្នាក់ៗ មានគោលដៅរៀងៗខ្លួន ហេតុនេះអ្នកដែលចូលលេងនៅថ្ងៃស្អែក ទាំងកីឡាករស្វាយរៀង និងកីឡាករភ្នំពេញក្រោន នឹងផ្តល់អ្វីគ្រប់យ៉ាង នៅលើទីលាន ហេតុនេះយើងត្រូវរៀបចំក្រុមឱ្យបានល្អ ដើម្បីដណ្តើមយក៣ពិន្ទុ»៕
