ខ្សែប្រយុទ្ធ ញាណ សុស៊ីដាន និង Bounphachan Bounkong បានអបអរការរកបានគ្រាប់ ជាមួយមិត្តរួមក្រុម។ រូបថត ស្វាយរៀង
គ្រូបង្វឹកក្រុមភ្នំពេញក្រោន លោក Oleg Starynskyi បានប្រាប់ក្រុមរបស់លោក ឱ្យឈប់គិតពីភាពហ្មងសៅ ចំពោះការចាញ់ក្រុមព្រះខ័នរាជស្វាយរៀង ដោយត្រូវយកចិត្តទុកដាក់ឱ្យបានកាន់តែខ្លាំង សម្រាប់ការប្រកួត៥លើកចុងក្រោយ នៅក្នុងលីគកំពូលកម្ពុជា ដើម្បីអាចស្រោចស្រង់ឱកាសបានមកវិញ ក្នុងការឈានទៅរកការឈ្នះពាន ទោះមានការពិបាក។
ការជំរុញបែបនេះ ព្រោះលោក Oleg បានមើលឃើញថា ការបរាជ័យក្រោមស្នាដៃក្រុមព្រះខ័នរាជស្វាយរៀង ២-០ នៅលើទឹកដីខ្លួនឯង កាលពីយប់ថ្ងៃសៅរ៍កន្លងមកនេះ បានធ្វើឱ្យអ្នកគាំទ្រមានការខកចិត្តខ្លាំង ហើយវាក៏ជាលទ្ធផល ដែលធ្វើឱ្យ ភ្នំពេញក្រោន កាន់តែបាត់បង់ភាគរយ ក្នុងការប្រជែងយកពានពីក្រុមស្វាយរៀង ហើយទីតាំងលេខ២របស់ពួកគេ ក៏បានធ្លាក់ទៅក្នុងក្តីបារម្ភពីការតាមប្រជែងរបស់ក្រុមវិសាខា ផងដែរ។
លោក Oleg បាននិយាយក្នុងសន្និសីទកាសែត ក្រោយការប្រកួត កាលពីយប់ថ្ងៃសៅរ៍នោះថា៖ «អ្នកគាំទ្រ ខកចិត្តចំពោះយើង។ យើង ត្រូវតែប្រឹងប្រែងឱ្យខ្លាំងជាងនេះ ដើម្បីធ្វើឱ្យពួកគាត់សប្បាយចិត្ត និងមកគាំទ្រយើងបន្ដទៀត នៅក្នុងការប្រកួតបន្ទាប់ ហើយយើងក៏ត្រូវប្រឹងយក ៣ពិន្ទុ ដើម្បីធ្វើឱ្យពួកយើងសប្បាយចិត្តផងដែរ»។
គ្រូបង្វឹកសញ្ជាតិអ៊ុយក្រែនរូបនេះ ក៏បានប្រាប់កូនក្រុមឱ្យបំភ្លេចចោលភាពឈឺចាប់ ចំពោះការចាញ់ក្រុមស្វាយរៀង នៅលើទឹកដីខ្លួនឯងលើកនេះ ដើម្បីអាចប្រមូលអារម្មណ៍បានល្អ ត្រៀមការប្រកួត ដែលនៅសល់។ លោក Oleg បញ្ជាក់ថា៖ «យើង មិនចាំបាច់គិតច្រើនទេ យើងគ្រាន់តែផ្ដោតលើការប្រកួត ដែលនៅសល់៥ប្រកួតចុងក្រោយទៅបានហើយ។ យើង គ្រាន់តែផ្ដោតទៅលើការប្រកួតទៀត»។
សម្រាប់ការប្រកួតរវាងក្រុមម្ចាស់ផ្ទះ ភ្នំពេញក្រោន និងក្រុមព្រះខ័នរាជស្វាយរៀង នៅកីឡដ្ឋានស្មាតអអេសអ៊ិន កាលពីយប់ថ្ងៃសៅរ៍នោះ ពិតជាមានភាពស្វិតស្វាញ និងតានតឹងខ្លាំង ដោយលោកអាជ្ញាកណ្តាល វីរៈ ដារ៉ា បានចំណាយកាតក្រហម១ និងកាតលឿងចំនួន១០ ទៅឱ្យក្រុមទាំង២ គឺខាងភ្នំពេញក្រោន បានកាតក្រហម១ និងកាតលឿង៤ ចំណែកស្វាយរៀង បានកាតលឿងចំនួន៦។
នៅក្នុងការចំណាយកាតដ៏ច្រើននេះ កីឡាករពាក់ស្លាកជាប្រធានក្រុម Yudai Ogawa របស់ភ្នំពេញក្រោន ទទួលបានកាតលឿង២ ស្មើកាតក្រហម នៅនាទីទី៧៨ បន្ទាប់ពីក្រុមស្វាយរៀង រកបានគ្រាប់បាល់នាមុខ ២-០ ដែលគ្រាប់បាល់ទី១រកបានដោយ ញាណ សុស៊ីដាន នៅនាទីទី ៤៥+២ និងគ្រាប់បាល់ទី២រកបានដោយខ្សែប្រយុទ្ធរបស់ឡាវ Bounphachan Bounkong នៅនាទីទី៥៩ ហើយវាក៏ជាលទ្ធផលផ្លូវការ សម្រាប់ជំនួនដ៏ធំនេះផងដែរ។
ការប្រកួតរវាងក្រុមវិសាខា (ខៀវ) និងក្រុមអង្គរថាយហ្គឺរ កាលពីថ្ងៃអាទិត្យ ដោយ វិសាខា យកឈ្នះ ៣-២។ រូបថត CPL
លោក Pep Munoz គ្រូបង្គោលក្រុមស្វាយរៀង បានទទួលស្គាល់ថា ការប្រកួតនេះ ពិតជាមានតានតឹងខ្លាំង។ លោកនិយាយ ក្រោយការប្រកួតថា៖ «តាំងពីចាប់ផ្តើមដំបូងមក គឺការប្រកួតនេះមានអាំងតង់ស៊ីតេកម្រិតខ្ពស់ និងក្តៅមែនទែននៅលើទីលាន ជាពិសេសចរន្តបាល់ មានការលេងរហូត ឥតមានឈប់ទេ ហើយមិនថា នៅក្នុងទីលានទេ សូម្បីនៅក្នុងតំបន់បច្ចេកទេសគ្រូបង្វឹក ក៏ក្តៅដូចគ្នា»។
លោក Pep បានទទួលស្គាល់ថា ក្រុមភ្នំពេញក្រោន ធ្វើបានល្អ នៅក្នុងតង់ទី១ ដោយបានបង្កើតឱកាសច្រើន ប៉ុន្តែ ស្វាយរៀង រកបានគ្រាប់បាល់មុន នៅចង់តង់ទី១ និងបានបន្ថែម១គ្រាប់ទៀត នៅតង់ទី២ ធ្វើឱ្យគ្រប់យ៉ាង កាន់តែមានភាពប្រសើរ។
តែទោះបីជាយ៉ាងណា លោក Pep បានបង្ហើបថា លោកនឹងកែប្រែចំណុចខ្វះខាត ដើម្បីអភិវឌ្ឍការលេងរបស់ក្រុមទាំងមូលឱ្យកាន់តែប្រសើរថែមទៀត។
សម្រាប់ការដណ្តើមបាន៣ពិន្ទុដ៏មានន័យ ពីក្រុមភ្នំពេញក្រោន នេះ បានជួយឱ្យក្រុមព្រះខ័នរាជស្វាយរៀង បានបន្តឈរនៅកំពូលតារាង ដោយមាន៦៤ពិន្ទុ ខណៈភ្នំពេញក្រោន បន្តឈរនៅលេខ២ ដោយមាន៦០ពិន្ទុដដែល ហើយតាមពីក្រោយដោយក្រុមវិសាខា ដែលមាន៥៩ពិន្ទុ បន្ទាប់ពីពួកគេ បានយកឈ្នះក្រុមម្ចាស់ផ្ទះ អង្គរថាយហ្គឺរ ៣-២ កាលពីថ្ងៃអាទិត្យ រីឯក្រុមបឹងកេត បានស្មើ ០-០ ជាមួយក្រុមណាហ្គាវើលដ៍។
យោងតាមលទ្ធផលនេះ បានបង្ហាញថា ការប្រកួតប្រជែងដណ្តើមយកពានលីគកំពូលកម្ពុជា រវាងក្រុមទាំង៣នេះ គឺក្រុមស្វាយរៀង មានឱកាសខ្ពស់ជាងគេ ប៉ុន្តែនៅតែមិនអាចមើលរំលងលើក្រុមភ្នំពេញក្រោន និង វិសាខា ដដែល ព្រោះការប្រកួតក្នុងតំបន់ Top6 នេះ នៅសល់៥លើកទៀត ហេតុនេះអ្វីៗនឹងមានការប្រែប្រួលវិញ បើសិនជា ស្វាយរៀង មិនអាចរក្សាភាពខ្លាំងរបស់ខ្លួន រហូតដល់ចប់រដូវកាលទេនោះ៕
