ការប្រកួតកីឡាចំបាប់យុវជន ប្រចាំឆ្នាំ២០២៥ ដែលទទួលបានការឧបត្ថម្ភទាំងស្រុងដោយលោក Casey Barnett។ រូបថត សហការី
លោក Casey Barnett អនុប្រធានសហព័ន្ធកីឡាចំបាប់កម្ពុជា បានអះអាងថា ការបង្កើតឱ្យមានយុទ្ធនាការប្រកួតកីឡាចំបាប់យុវជន ឆ្នាំ២០២៥ ដែលធ្វើនៅសាលដំបូលទូកប៊ូយ៉ុង ក្នុងពហុកីឡដ្ឋានជាតិ កាលពីថ្ងៃអាទិត្យ វាជាចំណុចដ៏សំខាន់ ក្នុងការអភិវឌ្ឍធនធានយុវជន ដើម្បីឈានទៅរកការឈ្នះបានមេដាយមាស នៅពេលកម្ពុជា ធ្វើជាម្ចាស់ផ្ទះការប្រកួតកីឡាយុវជនអាស៊ី ឆ្នាំ២០២៩។
ការលើកឡើងបែបនេះ ដោយសារលោកមើលឃើញថា ការប្រកួតកីឡាចំបាប់យុវជនលើកនេះ មានក្មេងៗចូលរួមច្រើន មកពីតាមខេត្តកំពង់ចាម ខេត្តកណ្តាល ខេត្តតាកែវ ពោធិ៍សាត់ កំពង់ឆ្នាំង និងរាជធានីភ្នំពេញ ហើយពួកគេ បានប្រកួតប្រជែងគ្នាដោយភាពសប្បាយរីករាយ ហើយសកម្មភាពនេះ នឹងក្លាយជាចលករដ៏សំខាន់ ក្នុងការជំរុញឱ្យពួកគេ បន្តអភិវឌ្ឍសមត្ថភាព ក្លាយជាអត្តពលិកកម្រិតខ្ពស់ ដែលអាចនឹងដណ្តើមបានមេដាយជូនជាតិបាន។
លោក Casey Barnett បានថ្លែងថា៖ «ខ្ញុំពិតជាសប្បាយចិត្តណាស់ នៅពេលឃើញក្មេងៗ បង្ហាញភាពរីករាយ ក្នុងការចូលរួមហ្វឹកហាត់ និងប្រកួតចំបាប់យ៉ាងច្រើនបែបនេះ។ ពួកគេ បានបង្ហាញពីមោទនភាព ក្នុងការប្រកួតប្រជែង ដណ្តើមយកមេដាយ ក៏ដូចជាបង្កើតបាននូវចំណងមិត្តភាពជាមួយក្មេងៗមកពីតាមបណ្តាខេត្តផ្សេងៗទៀត»។
លោក Casey បន្ថែមថា៖ «នេះជាចំណុចសំខាន់ ក្នុងការអភិវឌ្ឍវិស័យកីឡាចំបាប់របស់យើង គឺបើយើងអភិវឌ្ឍកីឡាឈានទៅរកភាពជោគជ័យក្នុងកម្រិតអន្តរជាតិ យើងត្រូវចាប់ផ្តើមពីក្មេង។ យើងធ្វើឱ្យពួកគេ មានភាពរីករាយ ក្នុងការចូលរួម ហើយពួកគេនឹងបន្តអភិវឌ្ឍសមត្ថភាពទៅជាជំនាញ»។
ជាមួយគ្នានេះ ប្រធានសហព័ន្ធកីឡាចំបាប់អាស៊ីអាគ្នេយ៍ លោក Casey Barnett បានមើលឃើញថា ក្មេងៗជាច្រើន ដែលបានចូលរួមការប្រកួតកីឡាចំបាប់យុវជនថ្នាល ឆ្នាំ២០២៥នេះ គឺមានគុណភាពកើនឡើងខ្លាំង បើធៀបនឹងការប្រកួតយុវជនកន្លងមក ហើយការកើនឡើងនេះ ក៏ដោយសារគ្រូបង្វឹកមានគុណភាពខ្ពស់ ហើយសហព័ន្ធ ក៏បានឧបត្ថម្ភសម្ភារ និងទីកន្លែងហ្វឹកហាត់ដល់បណ្តាក្លិបនៅតាមខេត្តមួយចំនួន ដែលជួយសម្រួលដល់ការហ្វឹកហាត់ចំបាប់នៅតាមភូមិ។
លោក Casey Barnett ពេលចូលរួមនៅក្នុងពិធីបិទការប្រកួតកីឡាចំបាប់យុវជន ឆ្នាំ២០២៥ កាលពីថ្ងៃអាទិត្យ។ រូបថត សហការី
ចំពោះអត្ថប្រយោជន៍ទាំងនេះ លោក Casey យល់ថា វាជាការបោះជំហានទៅមុខយ៉ាងល្អ ក្នុងការអភិវឌ្ឍធនធានយុវជនកីឡាចំបាប់កម្ពុជា ដោយលោករំពឹងថា នៅក្នុងចំណោមក្មេងៗទាំងអស់នេះ នឹងមានអ្នកមានសមត្ថភាពលេចធ្លោ អាចឈានទៅដណ្តើមបានមេដាយមាស ក្នុងការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជា ត្រូវធ្វើម្ចាស់ផ្ទះ ជាប្រវត្តិសាស្រ្តលើកដំបូង។
លោក Casey ដែលជាអ្នកឧបត្ថម្ភ សម្រាប់រៀបចំការប្រកួតកីឡាចំបាប់យុវជននេះ បានបញ្ជាក់ថា៖ «ក្រុមអត្តពលិកវ័យក្មេងរបស់យើងនៅពេលនេះ អាចនឹងក្លាយជាម្ចាស់មេដាយមាស ក្នុងការប្រកួតកីឡាយុវជនអាស៊ី ឆ្នាំ២០២៩ អ៊ីចឹងយើងនឹងបន្តគាំទ្ររៀបចំការប្រកួតចំបាប់យុវជននេះ ហើយសង្ឃឹមថា ៥ឆ្នាំនេះ យើងនឹងឃើញមានយុវជនមានជំនាញកម្រិតខ្ពស់ អាចប្រកួតប្រជែងយកឈ្នះប្រទេសជិតខាងយើងបាន»។
ចំពោះការប្រកួតកីឡាចំបាប់យុវជន ឆ្នាំ២០២៥ កាលពីថ្ងៃអាទិត្យ កន្លងមកនេះ មានអ្នកចូលរួមចំនួន១៩៥នាក់ ក្នុងនោះមានកីឡាការិនី ៥៣ នាក់ កីឡាករ ១០៨ នាក់ គ្រូបង្វឹក គ្រូជំនួយ និងគណ:កម្មការ ៣៤នាក់។ អ្នកទាំងអស់នេះ ប្រកួតតំណាងឱ្យក្លិបចំនួន១៧ ហើយជាលទ្ធផល ក្រុមអត្តពលិកមកពីក្លិបព្រះធាតុខេត្តពោធិ៍សាត់ ជាប់លេខ១ ដោយឈ្នះបានមេដាយមាស៣ និងសំរឹទ្ធ១។
ចំណែកក្លិបកីឡាចំបាប់ចំនួន៧ទៀត រួមមាន Kiri Jiu-Jisu Wrestling, CamEd Wrestling, ចំបាប់ឃ្លាំងមឿងខេត្តពោធិ៍សាត់, Judo Club, ចំបាប់បារមីមេទ័ពម៉ឺនឯកវិហារសួគ៌, ចំបាប់យាយព្រីងមានរិទ្ធិ និងក្លិប Project Aokas Wrestling ក៏ដណ្តើមបានមេដាយមាស ពីការប្រកួតនេះដែរ ខណៈក្លិបចំនួន២ទៀត បានឈ្នះមេដាយប្រាក់ និងក្លិបចំនួន៥ទៀត បានត្រឹមមេដាយសំរឹទ្ធ ប៉ុន្តែក្លិបកីឡាចំបាប់ក្រសួងមហាផ្ទៃ និងចំបាប់រិទ្ធីសែន មិនដណ្តើមបានមេដាយទេ៕
