ក្រុមតិភូកីឡាប្រដាល់កម្ពុជា ដឹកនាំដោយលោក ខូវ ឆាយ កំពុងផ្សព្វផ្សាយគុនខ្មែរ នៅលើទឹកដីសហរដ្ឋមេរិក។ រូបថត Krud Kun Khmer
ប្រធានសហព័ន្ធកីឡាប្រដាល់គុនខ្មែរ លោក ខូវ ឆាយ បានអះអាង សហហព័ន្ធ ត្រៀមនឹងបង្កើតឱ្យមាននូវក្រុមមេធាវី ប្រចាំសហព័ន្ធផ្ទាល់ ដើម្បីចាត់វិធានការក្តៅទៅលើអ្នករិះគន់បែបអគតិមួយចំនួន ដែលតែងតែជេរប្រមាថដល់អាយុជីវិត និងឪពុកម្តាយរបស់កីឡាករ ធ្វើឱ្យប៉ះពាល់ដល់សេចក្តីថ្លៃថ្នូរសម្រាប់សង្គមជាតិ ជាពិសេសធ្វើឱ្យកីឡាករមួយចំនួនបាក់ទឹកចិត្ត រហូតបង់បោះចោលអាជីពរបស់ខ្លួន។
នៅក្នុងបទសម្ភាសផ្ទាល់ជាមួយអតីតកីឡាករជើងខ្លាំង នួន សូរិយា នៅសហរដ្ឋអាមេរិក កាលពីថ្ងៃចន្ទម្សិលមិញនេះ លោក ខូវ ឆាយ បានទម្លាយអារម្មណ៍ពិតរបស់ខ្លួនថា លោកក៏មានការខឹងទៅនឹងអ្នកគាំទ្រមួយចំនួន ដែលតែងតែបានបញ្ចេញមតិយោបល់(comment)រិះគន់ដោយប្រើពាក្យពេចន៍ជេរប្រមាថធ្ងន់ៗដល់កីឡាករ ហើយរូបលោកផ្ទាល់ ក៏ធ្លាប់ទទួលរងការជេរប្រមាថដូចគ្នា។
លោក ខូវ ឆាយ បានចាត់ទុកក្រុមរិះគន់បែបជេរប្រមាថទាំងអស់នោះ ថាជា «ជនអគតិ» ដែលត្រូវតែបង្កើតឱ្យមានក្រុមមេធាវី ដើម្បីចាត់វិធានការផ្លូវច្បាប់ទៅលើជនទាំងអស់នោះ ព្រោះបើបណ្តោយទៀត វានឹងធ្វើឱ្យមានការប៉ះពាល់ដល់សេចក្តីថ្លៃថ្នូររបស់សង្គមជាតិកាន់តែធ្ងន់ ជាពិសេសធ្វើឱ្យកីឡាករមួយចំនួនបាក់ទឹកចិត្ត រហូតបង់បោះចោលអាជីពរបស់ខ្លួន ព្រោះទ្រាំលែងមាន ចំពោះការជេរប្រមាថ គ្មានសីលធម៌ទាំងអស់នោះ។
លោក ខូវ ឆាយ បាននិយាយថា៖ «ពីមុនមក ខ្ញុំមិនសូវជាយកចិត្តទុកដាក់ទេ អារឿងជេរកីឡាករហ្នឹង ព្រោះសូម្បីខ្ញុំក៏គេជេរច្រើនដែរ ប៉ុន្តពេលខ្លះវាជ្រុលហួសហេតុពេក អ៊ីចឹងយើងត្រូវតែលុបបំបាត់បញ្ហាជេរនេះ»។
លោកបន្ថែមថា៖ «សួរថា ចូលមក commet ជេរម្តាយឪពុករបស់គេ និងជេរប្រមាថដល់អាយុជីវិតរបស់គេ តើវាមានជួយអ្វីដល់ការស្ថាបនាគុនខ្មែររបស់យើងទេ? អ៊ីចឹងឥឡូវនេះ សហហព័ន្ធ មានវិធានការបង្កើតមេធាវីប្រចាំសហព័ន្ធតែម្តង។ ជនណា ដែលធ្វើលើសលប់ពេក យើងប្តឹងតែម្តង»។
នៅត្រង់ចំណុចនេះ លោក ខូវ ឆាយ បានទទួលស្គាល់ថា មានទស្សនិកជនច្រើនណាស់ បានគាំទ្រ និងលើកទឹកចិត្តដល់កីឡាករគុនខ្មែរ ហើយថែមទាំងបានជួយឧបត្ថម្ភដល់កីឡាករទៀត ចំណែកអ្នកខ្លះទៀត ក៏បានរិះគន់ក្នុងន័យស្ថាបនា ធ្វើឱ្យគុនខ្មែរ កាន់តែមានភាពរីកចម្រើនទៅមុខ ប៉ុន្តែអ្នកខ្លះទៀត បានចូលមក commet ជេរទាំងងងឹតងងុល មិនយល់ពីការប្រកួតផង ហើយក្រុមជនអគតិទាំងនេះហើយ ដែលជាមុខសញ្ញា សហព័ន្ធ ត្រូវចាត់វិធានការតាមផ្លូវច្បាប់។
សកម្មភាពគាំទ្ររបស់ទស្សនិកជន ចំពោះការប្រកួតកីឡាប្រដាល់គុនខ្មែរ ខណៈសហព័ន្ធកីឡាប្រដាល់កម្ពុជា ត្រៀមបង្កើតក្រុមមេធាវី ដើម្បីចាត់វិធានការក្តៅដល់អ្នករិះគន់បែបអគតិ។ រូបថត Krud Kun Khmer
លោក ខូវ ឆាយ បញ្ជាក់ថា៖ «បើយើងមិនធ្វើអ្វីសោះ អត់បានទេ ហើយការធ្វើបែបនេះ ដើម្បីការពារផលប្រយោជន៍ដល់កីឡាកររបស់យើង ព្រោះកីឡាករយើងមួយចំនួន នៅមានផ្លូវចិត្តមិនទាន់រឹងមាំទេ អ៊ីចឹងនៅពេលទទួលការជេរប្រមាថខ្លាំង គាត់អាចឈប់ ធ្វើឱ្យយើងបាត់បង់ធនធានមានសមត្ថភាព និងមានទេពកោសល្យ ដោយសារតែមនុស្សអគតិមួយចំនួននោះ»។
លោកបានសង្កត់ធ្ងន់ថា៖ «យើងត្រូវតែធ្វើជាគំរូដល់មនុស្សអគតិមួយចំនួនហ្នឹង ឱ្យមានការជាប់ទោសទណ្ឌខ្លះទៅ ថ្ងៃក្រោយរាងចាលលែងហ៊ានជេរម្រាយ ជេរឪពុកគេទៀតហើយ។ អ៊ីចឹងចំពោះអ្នកណាដែលបានធ្វើ (ជេរប្រមាថ)ជ្រុលហួសហេតុ យើងនឹងរៀបចំកសាងសំណុំរឿង អនុវត្តតាមច្បាប់។ យើងត្រូវធ្វើកាចបន្តិចហើយ ព្រោះបើធ្វើស្លូតពេក គេមើលងាយ និងជិះជន់»។
ជុំវិញប្រធានបទនៃ «ការជេរប្រមាថ»នេះ វាពិតជាបានកើតមាន នៅក្នុងវិស័យកីឡានៅកម្ពុជា ជាពិសេសកីឡាប្រដាល់គុនខ្មែរ ដែលកំពុងមានប្រជាប្រិយភាពខ្លាំងជាងគេ និងមានការប្រកួតជារៀងរាល់សប្តាហ៍ ព្រោះអ្នកគាំទ្រមួយចំនួន តែងតែប្រើអារម្មណ៍ផ្ទាល់ខ្លួនហួសហេតុពេក គឺទទួលយកតែពេលប្រកួតឈ្នះ ប៉ុន្តែពេលប្រកួតចាញ់ ពួកគេតែងជេរប្រមាថទៅដល់កីឡាករ ហើយក៏មានការ comment ជេរគ្នា នៅពេលផ្សាយផ្ទាល់ លែងគិតពីសេចក្តីថ្លៃថ្នូរអ្វីទាំងអស់ ហើយ។
កីឡាករលំដាប់ខ្លាំងៗរបស់កម្ពុជា ដូចជា ធឿន ធារ៉ា, ឈឿង ល្វៃ, ឡៅ ចន្ទ្រា, បឺត សង្ឃឹម, ឈុត សេរីវ៉ាន់ថង និង ធន់ រិទ្ធី ជាដើម សុទ្ធតែធ្លាប់ទទួលរងការជេរប្រមាថ នៅពេលពួកគេប្រកួតចាញ់ ឬធ្វើអ្វីមួយខុស ហើយកាលពីពេលថ្មីៗនេះ កីឡាករ ចំរើន គុនខ្មែរ និង សាន់ គុនខ្មែរ បានទទួលរង់ការរិះគន់បែបជេរប្រមាថខ្លាំង បន្ទាប់ពីពួកគេបានប្រកួតចាញ់ដោយពិន្ទុ និងចាញ់សន្លប់ក្នុងទឹកទី១ សម្រាប់ការប្រកួតនៅប្រទេសអូស្រ្តាលី កាលពីថ្ងៃទី២២ ខែមីនា ឆ្នាំ២០២៥។
ជុំវិញប្រធានបទ «ជេរប្រមាថ» នេះ លោក Tommy Kim ទីប្រឹក្សាស្ថានីយទូរទស្សន៍ថោន និងជាប្រធាន IPCC ប្រចាំនៅកម្ពុជា ដែលតែងតែរៀបចំឱ្យមានព្រឹត្តិការណ៍អន្តរជាតិធំៗ ទាំងនៅក្នុងស្រុក និងក្រៅប្រទេសនោះ បានស្នើសុំឱ្យអ្នកគាំទ្របញ្ឈប់ការរិះគន់ បែបមិនឱ្យតម្លៃដល់កីឡាករកម្ពុជា និងកីឡាករបរទេសនេះ ព្រោះវាបានប៉ះពាល់ដល់ការខិតប្រឹងប្រែងរបស់គ្រប់ភាគីពាក់ព័ន្ធ ក្នុងការផ្សព្វផ្សាយ «គុនខ្មែរ» ទៅកាន់ឆាកអន្តរជាតិ៕
