ប្រតិភូកីឡាឃីកបុកស៊ីងកម្ពុជា បានថតជុំគ្នា នៅព្រលានយន្តហោះអន្តរជាតិភ្នំពេញ មុនបន្តដំណើរទៅប្រទេសថៃ កាលពីថ្ងៃចន្ទ។ រូបថត សហការី
សហព័ន្ធកីឡាប្រដាល់ឃីកបុកស៊ីងកម្ពុជា បានបញ្ជូនកីឡាករ កីឡាការិនីចំនួន១៣នាក់ ទៅចូលរួមប្រជែងរកមេដាយ ក្នុងការប្រកួតកីឡាឃីកបុកស៊ីងកម្រិតពិភពលោក «Kickboxing World Cup 2025» ជាលើកដំបូង នៅទីក្រុងបាងកក ប្រទេសថៃ ដោយព្រឹត្តិការណ៍នេះ មានអត្តពលិកជាង១ពាន់នាក់ មកពី៥២ប្រទេសចូលរួម។
លោក ហេង សុឃន ប្រធានសហព័ន្ធកីឡាឃីកបុកស៊ីងកម្ពុជា និងជាប្រធានប្រតិភូកីឡាឃីកបុកស៊ីងកម្ពុជា បានឱ្យដឹងថា ការចេញទៅប្រកួត Kickboxing World Cup នៅប្រទេសថៃនេះ ត្រូវបានធ្វើឡើងក្រោមការអនុញ្ញាត និងជួយជ្រោមជ្រែងរបស់ក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា (NOCC) ដោយក្នុងនោះក្រុមឃីកបុកស៊ីងកម្ពុជា ទាំង១៣នាក់ ត្រូវប្រកួតប្រជែងនៅលើវិញ្ញាសាចំនួន៣ ដែលនឹងធ្វើរហូតដល់ថ្ងៃទី១២ ខែមេសា។
ជាមួយគ្នានេះ លោក សុឃន បានចាត់ទុកការចេញទៅប្រកួតកម្រិតពិភពលោក នៅប្រទេសថៃលើកនេះ ជាឱកាសដ៏សំខាន់ សម្រាប់កីឡាករកីឡាការិនីឃីកបុកស៊ីងកម្ពុជា បានដកស្រង់បទពិសោធន៍ និងច្ចេកទេសថ្មីៗបន្ថែមទៀត ដើម្បីត្រៀមខ្លួនឱ្យបានកាន់តែប្រសើរ សម្រាប់ការប្រកួតស៊ីហ្គេម លើកទី៣៣ នៅប្រទេសថៃ ចុងឆ្នាំ២០២៥នេះ។
លោក ហេង សុឃន ប្រធានសហព័ន្ធកីឡាឃីកបុកស៊ីងកម្ពុជា ពេលផ្តល់បទសម្ភាសឱ្យប្រព័ន្ធផ្សព្វផ្សាយ នៅព្រលានយន្តហោះអន្តរជាតិភ្នំពេញ កាលពីថ្ងៃចន្ទ។ រូបថត សហការី
លោកបានបញ្ជាក់ នៅព្រលានយន្តហោះអន្តរជាតិភ្នំពេញ កាលពីថ្ងៃចន្ទថា៖ «ការចូលរួមប្រកួត Kickboxing World Cup នេះ ជាការដកស្រង់បទពិសោធន៍ និងផ្លាស់ប្តូរបច្ចេកទេសគ្នា ដើម្បីត្រៀមលក្ខណៈសម្បត្តិចូលរួមការប្រកួតស៊ីហ្គេម នៅប្រទេសថៃ។ នេះជាការបង្កើនគុណវុឌ្ឍិដើម្បីវាស់ស្ទង់សមត្ថភាពពិតរបស់អត្តពលិកយើង ថា ស្ថិតនៅចំណុចណាឱ្យប្រាកដ មុនស៊ីហ្គេម មកដល់»។
លោកបន្ថែមថា៖ «អត្តពលិក ដែលយើងបញ្ជួនទៅប្រកួត Kickboxing World Cup នេះសុទ្ធតែជាបេក្ខភាពត្រៀមស៊ីហ្គេម ឆ្នាំ២០២៥ ហើយសង្ឃឹមថា ពួកគាត់នឹងធ្វើបានល្អ ព្រោះយើងធ្លាប់ទទួលបានជោគជ័យ សម្រាប់ការម្ចាស់ផ្ទះការប្រកួតកីឡាឃីកបុកស៊ីងជើងអាស៊ី ឆ្នាំ២០២៤ម្តងហើយ»។
គួររំឭកថា ការធ្វើម្ចាស់ផ្ទះការប្រកួតកីឡាឃីកបុកស៊ីងជើងឯកអាស៊ី (Asian Kickboxing Championships) កាលពីខែតុលា ឆ្នាំ២០២៤នោះ ក្រុមកីឡាឃីកបុកស៊ីងកម្ពុជា ដណ្តើមបានមេដាយមាស៩ ប្រាក់៤ សំរឹទ្ធ២៨ និងឈរនៅលេខ៤ បន្ទាប់ពីអ៊ូសបេគីស្ថាន ដែលឈ្នះបានមេដាយមាស ២០ ប្រាក់ ៥ សំរឹទ្ធ ៣ ហើយកាហ្សាក់ស្ថាន ឈរលេខ២ ឈ្នះបានមេដាយមាស ១៨ ប្រាក់ ១២ និងសំរឹទ្ធ៧ រីឯវៀតណាម ឈរលេខ៣ ដោយឈ្នះមេដាយមាស ១០ ប្រាក់ ១១ និងសំរឹទ្ធ ១១។
ចំណែកការប្រកួត Kickboxing World Cup នេះ លោក ហេង សុឃន ក៏មានការបារម្ភទៅដល់ប្រទេសទាំង៣នេះ។ លោកបញ្ជាក់ថា៖ «យើងមានការបារម្ភទៅលើប្រទេសដែលមានធនធានខ្លាំង ជាពិសេសប្រទេសកាហ្សាក់ស្ថាន និងអ៊ូសបេគីស្ថាន ដែលមានគុណវុឌ្ឍិខ្លាំងជាងយើង ប៉ុន្តែយើងក៏មិនខ្លាច ក្នុងការប្រកួតប្រជែងជាមួយពួកគេនោះដែរ»៕
