ខ្សែប្រយុទ្ធ Cristian មិនអាចចូលរួមជួយក្រុមស្វាុយរៀង ពេលជួបក្រុម Madura United ថ្ងៃស្អែកនេះទេ ក្រោយមានរបួស ពេលប្រកួតជាមួយក្រុមភ្នំពេញក្រោន កាលពីថ្ងៃសៅរ៍។ រូបថត ស្វាយរៀង
គ្រូបង្គោលក្រុមព្រះខ័នរាជស្វាយរៀង លោក Pep Monuz បានចាត់ទុកការជួបក្រុម Madura United FC របស់ឥណ្ឌូនេស៊ី នៅពហុកីឡដ្ឋានជាតិមរតកតេជោ នាយប់ម៉ោង៧ ថ្ងៃព្រហស្បតិ៍ស្អែកនេះ ជាការប្រកួតប្រវត្តិសាស្រ្តមួយសម្រាប់ក្រុមរបស់លោក ដែលបានប្រឹងប្រែងខ្លាំងបំផុត ទម្រាំឡើងមកដល់វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League 2024-2025នេះ។
ជាមួយគ្នានេះ លោក Pep បានទទួលស្គាល់ថា Madura ជាក្រុមខ្លាំង ដែលសម្បូរទៅដោយធនធានកីឡាករ ហើយក៏ធ្លាប់បានឈ្នះក្រុមស្វាយរៀង ២-១ ក្នុងវគ្គចែកពូល នៃការប្រកួតពានរង្វាន់ AFC Challenge League 2024-2025 នេះ នៅទឹកដីប្រទេសម៉ុងហ្គោលី កាលពីថ្ងៃទី២ ខែវិច្ឆិកា ឆ្នាំ២០២៤ផងដែរ ប៉ុន្តែលោក Pep បានដាក់ក្តីសង្ឃឹមខ្ពស់ទៅលើកូនក្រុមរបស់លោកថា នឹងដណ្តើមជ័យជម្នះ សម្រាប់ការប្រកួតនៅលើទឹកដីខ្លួនឯងស្អែកនេះ។
លោក Pep បាននិយាយ ក្នុងសន្និសីទកាសែត កាលពីព្រឹកថ្ងៃពុធនេះថា៖ «ការប្រកួតនៅថ្ងៃស្អែក ជាប្រវត្តិសាស្រ្តមួយសម្រាប់ក្រុមរបស់យើង ហើយនេះជាការប្រកួតដ៏លំបាក និងតាងតឹង ព្រោះ Madura ជាក្រុមមានគុណភាពកីឡាករល្អ តែបើសិនជាយើងធ្វើបានល្អ តាមរបៀបលេងរបស់យើង គឺយើងនឹងទទួលបានលទ្ធផលល្អ»។
គ្រូបង្គោលក្រុមស្វាយរៀងរូបនេះ បានឱ្យដឹងទៀតថា ការប្រកួតនៅវគ្គពាក់កណ្តាលផ្តាច់ព្រ័ត្រនេះ វាខុសប្លែកពីការប្រកួតជម្រុះក្នុងពូល H នៅម៉ុងហ្គោលី ព្រោះមានអាកាសធាតុ និងបរិយាយកាសខុសគ្នា ហើយពេលនេះ Madura United ក៏បានផ្លាស់ប្តូរគ្រូបង្វឹក និងនាំចូលកីឡាករថ្មីៗមួយចំនួន និងផ្លាស់ប្តូររបៀបលេង។
តែទោះយ៉ាងណា លោក Pep Monuz បញ្ជាក់ថា៖ «ការប្រកួតជើងទី១នេះ យើងមានអាទិភាពជាង ព្រោះលេងនៅលើទឹកដីរបស់យើង ដែលមានអ្នកគាំទ្រច្រើន មកគាំទ្រ និងលើកទឹកចិត្តដល់ពួកយើង ប៉ុន្តែនេះជាការប្រកួត២ជើង អ៊ីចឹងនៅពេលទៅលេងនៅទឹកដីឥណ្ឌូនេស៊ី ក៏យើងនៅតែរក្សាផ្នត់គំនិតនៃការលេងរបស់យើងដដែល»។
លោក Pep Munoz គ្រូបង្គោលក្រុមស្វាយរៀង (ឆ្វេង) បានចាប់ដៃស្វាគមន៍លោក Angel Afredo Vera នៅក្នុងសន្និសីទកាសែត។ រូបថត ស្វាយរៀង
ទន្ទឹមជាមួយគ្នានេះ ខ្សែប្រយុទ្ធប្រេស៊ីលទាំង២នាក់គឺ Moresche និង Cristian ដែលជាអ្នកនាំលេងយ៉ាងសំខាន់ នៅក្នុងក្រុមស្វាយរៀងនោះ មិនអាចជួយក្រុម នាជំនួបជាមួយក្រុម Madura នៅថ្ងៃស្អែកនេះទេ ដោយសារពួកគេ មានរបួស ប៉ុន្តែលោក Pep មិនបានខ្វល់ខ្វាយទៅលើរឿងនេះឡើយ។
លោក Pep បញ្ជាក់ថា៖ «កីឡាករទាំង២នេះ ពិតជាសំខាន់ សម្រាប់ក្រុមរបស់យើង ប៉ុន្តែខ្ញុំអត់មានក្តីបារម្ភអ្វីទាំងអស់ ព្រោះយើងមានសុទ្ធតែកីឡាករល្អៗនៅក្នុងក្រុម ហើយពួកគាត់អាចលេងនៅក្នុងការប្រកួតនេះបាន អ៊ីចឹងតាមរយៈកីឡាករដែលមាន គឺយើងអាចរៀបចំតាមរបៀបលេងរបស់យើង ជាពិសេសនៅពេលយើងរក្សាបាល់ អ៊ីចឹងការប្រកួតនៅថ្ងៃស្អែក យើងអាចនឹងឈ្នះការប្រកួត នៅពេលដែលយើងមានបាល់»។
គ្រូបង្វឹកសញ្ជាតិអេស្ប៉ាញរូបនេះ បានបន្ថែមថា៖ «នេះជាការប្រកួតអន្តរជាតិ វគ្គពាក់កណ្តាលផ្តាច់ព្រ័ត្រដ៏ធំ ខណៈ Madura United ជាក្រុមដ៏ល្អ ដែលសម្បូរដោយកីឡាករមានគុណភាព ទាំងកីឡាករក្នុងស្រុក និងកីឡាករបរទេស អ៊ីចឹងយើងត្រូវព្យាយាមលេងឱ្យបានល្អ ដើម្បីឈ្នះការប្រកួតនៅក្នុងដី ហើយព្យាយាមរក្សាអ្វីដែលយើងបានធ្វើនេះ បន្តទៅលេងជើងទី២ នៅឥណ្ឌូនេស៊ី»។
ចំណែកលោក Angel Afredo Vera គ្រូបង្គោលថ្មីរបស់ក្រុម Madura United ក៏បានសរសើរពីគុណភាពលេងរបស់ក្រុមស្វាយរៀង ផងដែរ។ «ខ្ញុំជឿជាក់ថា គុណភាពកីឡាករក្នុងក្រុមស្វាយរៀង សុទ្ធតែជាកីឡាករល្អ រីឯយុទ្ធសាស្រ្តនៃការលេងរបស់ក្រុមស្វាយរៀង រឹតតែល្អ ហេតុនេះហើយខ្ញុំបានធ្វើការវិភាគទៅលើក្រុមនេះ និងព្យាយាមកែប្រែចំណុចមួយចំនួន ដើម្បីត្រៀមជួបក្រុមស្វាយរៀង នៅថ្ងៃស្អែក»។
តែទោះបីជាយ៉ាងណា លោក Angel Afredo Vera ក៏បានដាក់ទិសដៅ ដណ្តើមយកលទ្ធផលល្អ។ លោកបញ្ជាក់ថា៖ «យើងត្រូវព្យាយាមលេងឱ្យមានភាពវៃឆ្លាត ព្រោះជាការប្រកួត២ជើង ហេតុនេះសង្ឃឹមថា ការប្រកួតនៅក្រៅទឹកដីនេះ យើងនឹងទទួលបានលទ្ធផលល្អ ដើម្បីបង្កើតភាពខ្លាំង សម្រាប់ការប្រកួតជើងទី២ នៅក្នុងទឹកដីយើងវិញ»៕
