សហមគន៍នាំភ្ញៀវទេសចរដើរកម្សាន្តនៅភ្នំត្បែងក្នុងខេត្តព្រះវិហារ។ រូបថត USAID ព្រៃឡង់បៃតង
ព្រះវិហារៈ សហគមន៍ចំនួនបីនៅភ្នំត្បែងក្នុងខេត្តព្រះវិហារ បាននិងកំពុងតែធ្វើការវាយតម្លៃទីតាំងជាបឋម ដើម្បីសាងសង់ផ្លូវលំថ្មីមួយខ្សែនៅលើកំពូលភ្នំត្បែង ដើម្បីទាក់ទាញភ្ញៀវទេសចរ ដោយមានការគាំទ្រពីគម្រោង USAID ព្រៃឡង់បៃតង។
ផ្លូវលំនឹងតភ្ជាប់សហគមន៍តំបន់ការពារធម្មជាតិ ចាក់អង្រែ តាំងយូ និងដាតាវឹក ដែលសមាជិកសហគមន៍បានធ្វើការសិក្សាទីតាំងដោយប្រើជំនាញ និងចំណេះដឹងដែលទទួលបានក្នុងវគ្គបណ្តុះបណ្តាលរយៈពេលច្រើនសប្តាហ៍ស្តីពីការអភិវឌ្ឍផ្លូវលំ ដែលត្រូវបានប្រារព្ធធ្វើនៅខេត្តសៀមរាប ដោយមានការគាំទ្រពីធនាគារពិភពលោក ក្រោមគម្រោង និរន្តរភាពតំបន់ទេសភាព និង ទេសចរណ៍ធម្មជាតិកម្ពុជា (CSLEP) និងរៀបចំដោយក្រសួងបរិស្ថាន។ នេះបើយោងតាមគម្រោង USAID ព្រៃឡង់បៃតង។
ប្រវែងសរុបនៃផ្លូវលំដែលសិក្សាថ្មីនេះមាន ២០,២៣គីឡូម៉ែត្រ ដែលចាប់ផ្តើមពីចំណុចឡើងភ្នំត្បែង តាមជណ្តើរឈើដែលទើបសាងសង់ថ្មីនៅសហគមន៍ចាក់អង្រែ។ នៅលើកំពូលភ្នំ ផ្លូវលំនេះ នឹងត្រូវធ្វើកាត់តាមលំនាំធម្មជាតិនៃភ្នំ និងជ្រលងភ្នំ ដែលមាននៅលើភ្នំត្បែង។ កន្លែងសម្រាក និងចំណុចចាប់អារម្មណ៍ជាច្រើន នឹងត្រូវបានបញ្ចូលទៅក្នុងផ្លូវលំថ្មីនេះ សម្រាប់អ្នកឡើងភ្នំ។ នៅតាមផ្លូវលំនេះ នឹងមានទឹកហូរ ទឹកធ្លាក់ ដើមឈើដែលមានអាយុកាលរាប់រយឆ្នាំ ជម្រកសត្វព្រៃនិងបក្សី ទិដ្ឋភាពថ្ងៃរះ និងថ្ងៃលិច វត្តអារាម និងទីសក្ការបូជា។ បន្ថែមពីនេះ ចំណុចកណ្តាលនៃផ្លូវលំ គឺជាកន្លែងបោះជំរំនៅសហគមន៍តាំងយូ ដែលភ្ញៀវទេសចរអាចចំណាយពេលគេងមួយយប់នៅទីនេះ ដែលរៀបចំដោយសហគមន៍ ហើយវាមានទីតាំងស្ថិតនៅលើច្រាំងនៃភ្នំ។
ផ្លូវថ្មីនេះនឹងបញ្ចប់នៅត្រឹមសហគមន៍ដាតាវឹក ដែលភ្ញៀវទេសចរ នឹងចុះពីភ្នំត្បែង តាមរយៈជណ្តើរឈើមួយផ្សេងទៀត។ ផ្លូវនេះ ក៏អាចងាយស្រួលសម្រាប់ការជិះកង់លើភ្នំ ហើយកង់ក៏មានសម្រាប់ជួលនៅលើកំពូលភ្នំត្បែងនេះ។
គម្រោង USAID ព្រៃឡង់បៃតង បានលើកឡើងថា ការធ្វើផ្លូវលំមានសារៈសំខាន់ណាស់សម្រាប់ការអភិវឌ្ឍតំបន់ទេសចរណ៍ធម្មជាតិ និងនិរន្តរភាពរបស់វា។ ផ្លូវលំដែលត្រូវបានអភិវឌ្ឍ និងថែទាំបានល្អ បង្កើនបទពិសោធន៍របស់អ្នកទេសចរ និងអាចកាត់បន្ថយផលប៉ះពាល់ដល់បរិស្ថាន។ នៅពេលដែលអ្នកទស្សនាស្វែងរកបទពិសោធន៍ដែលផ្សារភ្ជាប់ពួកគេជាមួយនឹងធម្មជាតិ ផ្លូវលំអាចបំពេញគោលបំណងរបស់អ្នកទស្សនាបានច្រើន និងអាចបង្កើនការទស្សនាទៅកាន់សហគមន៍អេកូទេសចរណ៍ទាំងនោះ។
នៅពេលដែលការពិនិត្យ និងវាយតម្លៃបរិស្ថាន សម្រាប់ផ្លូវលំថ្មីនៅលើភ្នំត្បែងនេះត្រូវបានបញ្ចប់ សមាជិកសហគមន៍នឹងដាក់សំណើទៅអាជ្ញាធរឃុំ កម្មវិធីអភិវឌ្ឍន៍សហប្រជាជាតិ (UNDP) និង អង្គការស្បៀងនិងកសិកម្មនៃសហប្រជាជាតិ (FAO) ដើម្បីការគាំទ្រហិរញ្ញវត្ថុ៕
