តំបន់ទេសចរណ៍ចម្ការស្វាយក្នុងស្រុកសំឡូត កាលពីកន្លងទៅ។ ហុង មិនា
បាត់ដំបងៈ មន្ត្រីជំនាញនៃមន្ទីរទេសចរណ៍ខេត្តបាត់ដំបង បានចុះពិនិត្យ និងសិក្សាអំពីសក្តានុពលគោលដៅទេសចរណ៍ចំនួន ៥ ទីតាំង ដើម្បីរៀបចំធ្វើផែនការអភិវឌ្ឍន៍ទេសចរណ៍ ខណៈអ្នកជំនាញទេសចរថា ការអភិវឌ្ឍគោលដៅទេសចរណ៍ទាំងនោះនឹងធ្វើឱ្យមានកំណើនភ្ញៀវទេសចរជាតិ និងអន្តរជាតិមកទស្សនាខេត្តនេះកាន់តែច្រើន។
លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឱ្យដឹងនៅថ្ងៃទី១១ ខែមករាថា ថ្មីៗនេះលោកបានដឹកនាំមន្ត្រីជំនាញចុះពិនិត្យ និងសិក្សាសក្តានុពលទេសចរណ៍ និងប្រមូលទិន្នន័យសំខាន់ៗ នៅតាមរមណីយដ្ឋាន និងគោលដៅទេសចរណ៍ចំនួន ៥ ទីតាំងដើម្បីរៀបចំគម្រោងអភិវឌ្ឍន៍គោលដៅទេសចរណ៍ក្នុងក្រុងស្រុកទាំងនោះ។
លោកបានបន្តថា រមណីយដ្ឋាននិងគោលដៅទេសចរណ៍ទាំង៥ទីតាំងនោះរួមមាន ល្អាងកង្កែប ស្ថិតនៅស្រុកបាណន់ , ល្អាងទាក់ទ្រាំង ស្ថិតនៅស្រុករតនមណ្ឌល ,រមណីយដ្ឋានទឹកពុះ ស្ថិតនៅស្រុកកំរៀង, រមណីយដ្ឋាន ល្អាង ១០០ ភ្នំ ប្រាំពីរ ស្ថិតនៅស្រុកភ្នំព្រឹក និងទឹកធ្លាក់ព្រំដែនកម្ពុជា-ថៃ ស្ថិតនៅស្រុកសំពៅលូន។
លោកបញ្ជាក់ថា៖«ក្រោយពីសិក្សាហើយ ក្រុមការងារនឹងបន្តរៀបចំជាផែនការអភិវឌ្ឍន៍គោលដៅទាំងនោះ ដើម្បីសហការជាមួយអាជ្ញាធរក្នុងការជំរុញភាពទាក់ទាញបន្ថែមនៅទីនោះ»។
លោកបានបន្ថែមថា ចំពោះលទ្ធផលសម្រេចយ៉ាងណាអាស្រ័យលើការរៀបចំជាផែនការអភិវឌ្ឍន៍គោលដៅទេសចរណ៍នៅក្នុងតំបន់ទាំងនោះ ហើយត្រូវជួបប្រជុំជាមួយរដ្ឋមន្ត្រីក្រសួងទេសចរណ៍សិន។ ដូច្នេះឥឡូវនេះខាងមន្ទីរគ្រាន់តែបានចុះពិនិត្យនិងសិក្សាអំពីសក្ដានុពលគោលដៅទេសចរណ៍ទាំងនោះដើម្បីធ្វើរបាយការណ៍ត្រៀមពិភាក្សាជាមួយក្រសួង។
ដោយឡែក លោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានឱ្យដឹងដែរថា ខេត្តបាត់ដំបងគឺជាតំបន់ប្រវត្តិសាស្ត្រមួយ ខណៈខេត្តនេះមានទាំងសំណង់អគារនៅសល់កាលពីសម័យអាណានិគមបារាំង និងរមណីយដ្ឋានមួយចំនួន ត្រូវបានបញ្ចូលទៅជាតំបន់បេតិកភណ្ឌវប្បធម៌ប្រវត្តិសាស្ត្រ។
លោកបានបន្តថា ជាមួយនឹងការអភិវឌ្ឍគោលដៅទេសចរណ៍ក្នុងរមណីយដ្ឋានទាំងអស់នេះបន្ថែមទៀត គឺវាបង្កើនឱ្យមានកន្លែងកម្សាន្តដ៏សម្បូរបែប ហើយនឹងជួយឱ្យប្រជាពលរដ្ឋខ្មែរចងចាំនូវរមណីយដ្ឋានប្រវត្តិសាស្ត្រ ក៏ដូចជាក្រុងបាត់ដំបង និងទឹកដីខេត្តបាត់ដំបងទាំងមូល។ ក្រៅពីនេះក៏ជួយទាក់ទាញភ្ញៀវទេសចរជាតិ និងអន្តរជាតិបន្ថែមទៀត ដើម្បីចូលមកកម្សាន្តក្នុងខេត្តនេះផងដែរ។
លោកបានថ្លែងថា៖«នៅពេលមានការអភិវឌ្ឍគោលដៅទេសចរណ៍ក្នុងក្រុងស្រុកទាំង៥ទីតាំងនេះ ប្រាកដណាស់ច្បាស់ជាបានចូលរួមចំណែកជួយទៅដល់សេដ្ឋកិច្ចប្រជាពលរដ្ឋនៅមូលដ្ឋានទាំងអស់ហ្នឹងតាមរយៈការលក់ផលិតផលរបស់ពួកគាត់ និងការផ្ដល់សេវាកម្មណាមួយទៅកាន់ភ្ញៀវទេសចរដែលគាត់មកទស្សនា»។
អ្នកជំនាញទេសចរណ៍រូបនេះបានបន្ថែមថា ជាពិសេសវាក៏រួមចំណែកជួយកាត់បន្ថយការធ្វើចំណាកស្រុករបស់ប្រជាពលរដ្ឋនៅមូលដ្ឋាននោះ ហើយមួយវិញទៀតរមណីយដ្ឋានដែលជាគោលដៅក្នុងការអភិវឌ្ឍទេសចរណ៍ទាំងនោះ នឹងក្លាយទៅជាតំបន់ដែលមានការអភិរក្ស៕
