ទីក្រុងមីឡេនដ៍ៈ ដោយសារការត្អូញត្អែរញយដងហើយនៅមិនស្តាប់នោះ ទើបប្រជាពលរដ្ឋក្នុងមូលដ្ឋានមួយ នាំគ្នាប្តឹងសាលាក្រុង រហូតដល់មានចំណាត់ការភ្លាមៗ។
ជារឿយៗ គេមិនត្រឹមតែចង់មានជីវភាពស្តុកស្តម្ភល្អ និងរស់នៅជិតតំបន់ជាទីក្រុង ដែលមានភាពរស់រវើកគួរឱ្យរស់នៅនោះទេ ថែមទាំងចង់បានការទទួលទានដំណេកយ៉ាងលុងលក់ថែមទៀតផង។
ជីវិតអ្នករស់នៅទីក្រុង ក្រោយពីបានស្វែងរកឃើញទីឋានដែលមានភាពសុខស្រួលហើយ ស្រាប់តែនាពេលរាត្រី ក៏ឮសំឡេងអ៊ូរអរខាងក្រៅបង្អួចនៅល្វើយៗនោះ គឺមានអ្នកខ្លះមានចិត្តស្រឡាញ់សន្តិភាព និងសំងំគេង។ តែអ្នកខ្លះទៀតមិនអាចនៅស្ងៀមបានទេ។
ជាក់ស្តែងដូចករណីនៅក្នុងតំបន់ Porta Venezia នៃទីក្រុង Milan ដែលមានសេវាកម្មបម្រើអាហារនៅពេលយប់ជ្រៅនោះ កំពុងប្រឈមនឹងការហាមឃាត់បណ្តោះអាសន្ន ដោយសារតែមានការត្អូញត្អែរពីអ្នកភូមិផង។
ដោយឡែកតំបន់សង្កាត់នេះ គឺជាទីប្រជុំជននៃក្រុមសហគមន៍ LGBTQ+ ដ៏ពេញនិយម និងជាទីកន្លែងកម្សាន្តដ៏មមាញឹក១ នាពេលរាត្រីនៅក្នុងទីក្រុង Milan ប្រទេសអ៊ីតាលី។
ទោះបីជាយ៉ាងណាក៏ដោយ អាជីវកម្មនានាដូចជា ហាង ឬតូបលក់ទំនិញ បារ៍ និងសូម្បីតែគ្រឿងម៉ាស៊ីនបំពាក់លក់គ្រឿងភេសជ្ជៈផ្សេងៗ ក៏ត្រូវបានបង្ខំឱ្យបិទ ឬហាមប្រាម នៅចន្លោះម៉ោងពាក់កណ្តាលអធ្រាត្រដល់ម៉ោង ៦ ព្រឹក សម្រាប់ថ្ងៃនៃសប្តាហ៍ និងនៅចាប់ពីម៉ោង ១ និង ៣០ នាទី អាធ្រាត្រដល់ម៉ោង ៦ ព្រឹក នៅថ្ងៃសុក្រ និងសៅរ៍។
ការហាមប្រាមបានកើតឡើង បន្ទាប់ពីគណៈកម្មាធិការអ្នកស្រុក Lazzaretto បានជំរុញឱ្យមានំណាត់ការពីអាជ្ញធរ ហើយអ្នកស្រុកខ្លះថែមទាំងបានប្តឹងសាលាក្រុងទៀតផង ជុំវិញរឿងមានសំឡេងរំខានដល់ពួកគេនៅពេលយប់។
ការហាមឃាត់នេះ ត្រូវបានកំណត់តាំងថ្ងៃអាទិត្យទី ១៩ ខែវិច្ឆិកា ឆ្នាំ២០២៣ កន្លងមក។ រឹតតែតឹងរ៉ឹងចំពោះអ្នកលក់ដូរតាមដងផ្លូវ ដោយពួកគេប្រាប់ថា ពួកគេមិនអាចលក់ដូរក្នុងរយៈពេល ១២ ម៉ោងបានទេ គឺចាប់ពីម៉ោង ៦ ល្ងាចមកនោះ។ មិនមែនជាលើកទីមួយទេ ដែលទីក្រុង Milan បានដាក់បម្រាមបែបនេះនៅពេលយប់។
ដូចជាករណីនៅខែកក្កដា ឆ្នាំ ២០២២ និងខែមិថុនា ឆ្នាំ២០២៣ ជុំវិញរឿងលក់ភេសជ្ជៈនានានៅម៉ោងយប់ជ្រៅ ដែលត្រូវបានហាមឃាត់នៅកណ្តាលទីក្រុង ដើម្បីកាត់បន្ថយការបន្លឺសំឡេងរំខាននៅពេលយប់។
គួររំឮកដែរថា ការលក់គ្រឿងស្រវឹង ត្រូវបានហាមឃាត់ផងដែរចាប់ពីម៉ោង៧ យប់ ដល់ម៉ោង៧ ព្រឹក តាំងខែឧសភា ឆ្នាំ២០២០ បើទោះបីជា កាលនៅស្ថិតនៅក្នុងការព្រួយបារម្ភលើការរឹតត្បិតជំងឺកូវីដ១៩ ក៏ដោយ។
លោក Guiesseppe Sala អភិបាលក្រុង Milan ថ្លែងប្រាប់សារព័ត៌មាន Ansa ៖«មើលទៅគំនិតចង់បានទីក្រុង ដែលមានសេវាកម្ម ២៤ ម៉ោងនោះ លែងមានទៀតហើយ! »។
លោក Marco Granelli ក្រុមប្រឹក្សាសន្តិសុខនៃក្រុង Milan ប្រាប់ La Repubblica ថា៖«ក៏ប៉ុន្តែ ខណៈដែលអ្នកស្រុកបង្ហាញពីអារម្មណ៍ពិតដោយសារមានសំឡេងរំខាន នៅពេលយប់យ៉ាងនេះក្តី សូមកុំឱ្យក្លាយជារឿងដែលរារាំងដល់អ្នកដំណើរពីចម្ងាយ ដែលចង់មកលេងទីក្រុងដ៏រុងរឿងនេះអ៊ី!»។
លោកបន្តថា៖«យើងមិនចង់ដាក់ពិន័យលើការសប្បាយ ឬការធ្វើអាជីវកម្មនានានោះទេ។ ទោះជាយ៉ាងនេះក្តី យើងត្រូវតែអនុញ្ញាតឱ្យប្រជាពលរដ្ឋសម្រាកបានស្រួល ហើយប្រជាពលរដ្ឋទាំងអស់ក៏ទទួលបានកន្លែងសាធារណៈប្រកបដោយគុណភាព និងសុវត្ថិភាពដែរ»៕
