ប្លង់ផ្ទះតង់ ដែលក្រសួងបរិស្ថានសាងសង់ជូនសហគន៍ ដែលធ្វើឡើងតាមរចនាបទខ្មែរ មានលក្ខណៈទំនើប មានអនាម័យ សោភ័ណភាពស្អាត សម្រាប់ការលំហែកម្សាន្តបៃតង។ រូបថតៈ ក្រសួងបរិស្ថាន
សៀមរាបៈ ផ្ទះតង់ចំនួន ១០ផ្ទះ ត្រូវបានចាប់ផ្តើមសាងសង់ តាមរចនាបទខ្មែរ ជាជំហានដំបូងនៅថ្ងៃចន្ទ ទី២ ខែធ្នូនេះ នៅក្នុងសហគមន៍តំបន់ការពារធម្មជាតិ ព្រៃធំអន្លង់ធំ ស្ថិតនៅលើខ្នងភ្នំគូលែន នៃឧទ្យានជាតិព្រះជ័យវរ្ម័ន នរោត្តម«ភ្នំគូលែន» ដើម្បីពង្រឹងការអភិរក្សព្រៃឈើ និងលើកកម្ពស់ជីវភាពសហគមន៍ ជាមួយសក្តានុពលលំហែបៃតង។
ផ្ទះតង់ទាំងនេះត្រូវបានផ្តល់ឱ្យ ដោយក្រសួងបរិស្ថានតាមរយៈគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) ដែលដឹកនាំអនុវត្តដោយក្រសួងបរិស្ថាននិងក្រសួងអភិវឌ្ឍជនបទ ក្រោមហិរញ្ញប្បទាន ធនាគារពិភពលោក មូលនិធិបរិស្ថានសកលនិងរាជរដ្ឋាភិបាលកម្ពុជា។
ក្រសួងបរិស្ថានបញ្ជាក់ថា៖«តង់ស្នាក់សម្រាប់ទេសចរណ៍ សាងសង់ឡើងតាមរចនាបទខ្មែរ និងមានលក្ខណៈទំនើប មានអនាម័យ សោភ័ណភាពស្អាត ការលំហែកម្សាន្ត ប្រកបដោយសុខុដុមរមនាជាមួយធម្មជាតិសម្រាប់ឱ្យភ្ញៀវជាតិ ឬអន្តរជាតិ ដែលមកកម្សាន្តបោះតង់ និងដើរទស្សនាជុំវិញព្រៃសហគមន៍ តំបន់ទីទួលបុរាណ ប្រាសាទបុរាណ កន្លែងវប្បធម៌ ប្រវត្តិសាស្រ្ត និងតំបន់ទេសភាពធម្មជាតិផ្សេងទៀតលើខ្នងភ្នំគូលែន»។
រដ្ឋមន្រ្តីក្រសួងបរិស្ថាន លោក អ៊ាង សុផល្លែត បានជួបសំណេះសំណាលជាមួយអាជ្ញាធរដែនដី ដៃគូសហការ និងប្រជាពលរដ្ឋនៅក្នុងសហគមន៍ តំបន់ការពារធម្មជាតិព្រៃធំអន្លង់ធំ នាថ្ងៃទី៣០ ខែវិច្ឆិកាកន្លងមក។
លោករដ្ឋមន្រ្តីបានលើកឡើងថា សហគមន៍តំបន់ការពារធម្មជាតិដើរតួនាទីសំខាន់ក្នុងកិច្ចការងារការពារ និងអភិរក្សព្រៃឈើសហគមន៍ ។
លើសពីនោះ វាក៏ជាកន្លែងដែលសហគមន៍ត្រូវធ្វើជាម្ចាស់ សម្រាប់ការអភិវឌ្ឍគោលដៅលំហែបៃតង ដែលត្រូវស្វាគមន៍ ភ្ញៀវទេសចរមកកម្សាន្តតាមរយៈការបោះតង់សម្រាកនិងទស្សនាទេសភាពធម្មជាតិ ទីតាំងវប្បធម៌ ប្រវត្តិសាស្រ្ត សាសនា ជាដើម នៅក្នុងព្រៃសហគមន៍ទៀតផង។
លោករដ្ឋមន្រ្តីមានប្រសាសន៍ថា៖«សហគមន៍តំបន់ការពារធម្មជាតិ នៅលើខ្នងភ្នំគូលែន ជាតំបន់ដែលមានព្រៃឈើក្រាស់ មានទេសភាពស្រស់ស្អាត ហើយអាចឱ្យភ្ញៀវទេសចររបោះតង់សម្រាកក្បែរមាត់ទឹក និងទស្សនាប្រាសាទនានាក្នុងព្រៃជាច្រើនទៀតផង»។
សហគមន៍តំបន់ការពារធម្មជាតិនេះ ត្រូវបានបង្កើតឡើងនៅឆ្នាំ២០០១ ដែលមាន ផ្ទៃដីប្រហែលជា៣៦៥ហិកតា ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ។
អ្នកនាំពាក្យក្រសួងបរិស្ថាន លោកខ្វៃ អាទិត្យាបានឱ្យដឹងថា គិតត្រឹម ឆ្នាំ២០២៤ សហមន៍តំបន់ការពារធម្មជាតិ សរុបមានចំនួន ១៩៣សហគមន៍ ត្រូវបានបង្កើតឡើង ដែលមានសមាជិកសរុបចំនួន ៧៣ ១៤៩គ្រួសារ និង គ្របដណ្តប់លើផ្ទៃដីព្រៃជាង ៣៣ម៉ឺនហិកតា ស្ថិតក្នុងខេត្តចំនួន១៥។
លោកបន្តថា ក្នុងនោះ សហគមន៍ជាង៥០ មានសត្តានុពល ដែលអាចរៀបចំជាតំបន់ទេសចរណ៍ធម្មជាតិ។ ប៉ុន្តែនាពេលបច្ចុប្បន្ននេះ មានសហគមន៍ ប្រមាណជា៣០ហសគមន៍កំពុងតែដំណើរការ បង្កើតចំណូលពីទេសចរណ៍ធម្មជាតិ។
លោក ញ៉ន ម៉ុច សមាជិកសហគមន៍តំបន់ការពារធម្មជាតិព្រៃធំអន្លង់ធំ សង្ឃឹមថាជីវភាពរបស់ប្រជាសហគមន៍លើខ្នងភ្នំ និងប្រសើរឡើង នៅពេលមានសមិទ្ធផលថ្មី ដូចជាកន្លែងបោះតង់ និងផ្ទះតង់សម្រាប់ទេសចរអាចមកស្នាក់ លំហែកម្សាន្ត។
លោកបានឱ្យដឹងថា នាពេលបច្ចុប្បន្ននេះ ភ្ញៀវទេសចរជាច្រើនកំពុងតែចាប់អារម្មណ៍តំបន់នេះ ហើយការគាំទ្ររបស់ក្រសួងបរិស្ថាន និងជំរុញការអភិវឌ្ឍសេដ្ឋកិច្ចរបស់ប្រជាសហគមន៍បន្ថែមទៀត ដែលពីមុនធ្លាប់ពឹងលើធនធានព្រៃឈើ ហើយបានងាកមកពង្រឹងមុខរបរសេវាកម្មទេសចរណ៍វិញ។
លោកបាននិយាយថា៖«ប្រជាពលរដ្ឋ ដែលរស់នៅក្នុងសហគមន៍ បានខិតខំរួមគ្នាទប់ស្កាត់ការកាប់បំផ្លាញព្រៃឈើ និងបានចូលរួមដាំដាំឈើឡើងវិញ ដើម្បីបង្កើនគម្របព្រៃឈើផងដែរ»។
ក្រសួងបរិស្ថាន បាននិងកំពុងអភិវឌ្ឍគោលដៅលំហែបៃតង នៅតាមសហគមន៍តំបន់ការពារធម្មជាតិ ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា។ យុទ្ធសាស្រ្តចក្រាវិស័យបរិស្ថាន បានកំពុងធ្វើឱ្យសហគមន៍មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី។ ក្នុងនោះរួមមាន ការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់សហគមន៍។
ទាក់ទងទៅនឹងវិស័យទេសចរណ៍ធម្មជាតិ ក្នុងខេត្តសៀមរាបនេះផងដែរ លោកនាយករដ្ឋមន្រ្តីហ៊ុន ម៉ាណែតបានផ្តល់ជូននូវដំណោះស្រាយមួយចំនួននៅសហគមន៍ទេសចរណ៍ធម្មជាតិកំពង់ភ្លុក ក្នុងស្រុកប្រាសាទបាគង បន្ទាប់ពីបានចុះទៅពិនិត្យស្ថានភាព និងទស្សនាតំបន់ទេសចរណ៍ធម្មជាតិនេះ នាថ្ងៃទី១ ធ្នូនេះ។
យោងតាមបណ្តាញសង្គមផ្លូវការរបស់ប្រមុខរដ្ឋាភិបាលបានឱ្យដឹងថា បន្ទាប់ពីបានទស្សនកិច្ច និងជួបសំណេះសំណាលផ្ទាល់ជាមួយសហគមន៍ ជាពិសេស អ្នកប្រកបរបរជាអ្នកបើកបរកាណូត និងអុំទូកបម្រើសេវាជូនអ្នកទេសចរលោកនាយករដ្ឋមន្រ្តីទទួលបាននូវសំណូមពរមួយចំនួន។
ក្នុងនោះ ប្រមុខរដ្ឋាភិបាលបាន ផ្តល់ជាដំណោះស្រាយមួយចំនួនដូចជា កសាងផ្លូវកៅស៊ូ ៨គីឡូម៉ែត្រ លើផ្លូវក្រាលគ្រួសក្រហម ដែលមានស្រាប់ ដើម្បីផ្តល់ភាពងាយស្រួលក្នុងការធ្វើដំណើរ និងកាត់បន្ថយការហុយ។
លោកនាយករដ្ឋមន្រ្តីក៏បានសម្រេច កសាងបញ្ជរលក់សំបុត្រថ្មីរបស់សហគមន៍ ដែលនឹងជួយឱ្យសហគមន៍មិនចាំបាច់ជួលដី ដើម្បីលក់សំបុត្រដូចពេលបច្ចុប្បន្ន ហើយនិងផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាន នៅក្នុងតំបន់ផងដែរ៕
