ភ្ញៀវទេសចរបរទេសធ្វើដំណើរតាម ទូកល្បឿនលឿន សុខ ចំរើន ពីបាត់ដំបងទៅសៀមរាប។ រូបថត សហការី
សៀមរាប-បាត់ដំបង៖ ការធ្វើដំណើរតាមទូក រវាងខេត្តសៀមរាប និងបាត់ដំបង បានចាប់ផ្តើមដំណើរការឡើងវិញចាប់ពីថ្ងៃទី១ ខែសីហា ដើម្បីភាពរីករាយរបស់អ្នកធ្វើដំណើរ ដែលស្វែងរកបទពិសោធប្លែកតាមរយៈភូមិបណ្តែតទឹក និងទេសភាពធម្មជាតិតាមផ្លវូទឹក។
យោងតាមការចុះផ្សាយរបស់មន្ទីរទេសចរណ៍ខេត្តបាត់ដំបងនាពេលថ្មីៗនេះ ក្រុមហ៊ុនទូកទេសចរណ៍បើកដំណើរការឡើងវិញ ដោយផ្តល់ឱកាសឱ្យអ្នកធ្វើដំណើរទស្សនាបឹងទន្លេសាបនិងស្ទឹងសង្កែ។
ភ្ញៀវទេសចរអាចទិញសំបុត្រទូកតាមសណ្ឋាគារ ផ្ទះសំណាក់ ឬដោយផ្ទាល់ពីភ្នាក់ងារលក់សំបុត្ររបស់ក្រុមហ៊ុនដូចជា Angkor Express Boat និង CHANN-NA Express Boat។
លោក ឈាង ប៊ុនណាត ជាអ្នកបើកទូកឱ្យក្រុមហ៊ុន ចាន់ណា កាណូតដឹកអ្នកដំណើរ (CHANN-NA Express Boat) បានប្រាប់ភ្នំពេញប៉ុស្តិ៍ថ្ងៃពុធនេះថា នៅលើទូកចំណុះ ៣០នាក់របស់លោកមានភ្ញៀវ ១២ នាក់ ដែលធ្វើដំណើរពីសៀមរាប ខណៈអ្នកដំណើរខ្លះឡើងចុះនៅតាមភូមិបណ្ដែតទឹកនីមួយៗ។
លោកថ្លែងថា៖ «យើងដំណើរការរៀងរាល់រដូវទឹកឡើង ហើយនៅរដូវនេះ យើងចាប់ផ្ដើមពីថ្ងៃទី ១ ខែសីហា។ អរគុណមន្ទីរទេសចរណ៍ដែលជួយផ្សព្វផ្សាយដោយសារកន្លងមកមិនដែលខាងទេសចរណ៍ជួយផ្សព្វផ្សាយទេ»។
លោកបានឱ្យដឹងថា ក្រៅពីភ្ញៀវមកពីសៀមរាប ភ្ញៀវចាប់ពីភូមិបណ្ដែតទឹកព្រែកទាល់ ភូមិបណ្ដែតបាក់ព្រា និងភូមិផ្សេងៗទៀតឡើងចុះៗទៅគោលដៅរបស់ពួកគេ។ ដូច្នេះ ការធ្វើដំណើរតាមផ្លូវទឹកនៅតែពេញនិយមសម្រាប់សហគមន៍លើភូមិបណ្ដែតទឹកនៃបឹងទន្លេសាបនេះ។
ជាមួយការដំណើរចន្លោះពី ៦ ទៅ ៧ ម៉ោង លោក ប៊ុនណាត បាននិយាយថា ការផ្អាកមួយរយៈកន្លងមក កម្ពស់ទឹកទាបពេកដោយការទប់ទឹករបស់ក្រុមហ៊ុនចិន ហើយលោកបារម្ភពីបញ្ហានៃការធ្វើដំណើរតាមទូកមានរយៈពេលខ្លី ដោយសារខ្វះទឹក។
ភ្នំពេញប៉ុស្ដិ៍ព្យាយាមទាក់ទងខាងក្រុមហ៊ុន Angkor Express តែមិនបានជោគជ័យ។ បុរសម្នាក់បានលើកទូរស័ព្ទតែមិនចង់និយាយ ហើយបានបិទចោលភ្លាមៗ។
យ៉ាងណាមិញ អ្នកនាង មិន ដានី អ្នកលក់សំបុត្រទូកល្បឿនលឿន សុខ ចំរើន ទិសដៅ សៀមរាប-បាត់ដំបង-សៀមរាប បាននិយាយថា ក្រុមហ៊ុន សុខ ចំរើន បើកដំណើរការអាជីវកម្មទូកដឹកអ្នកដំណើរនេះជាងម្ភៃឆ្នាំមកហើយ។ ជារៀងរាល់ឆ្នាំ ទូកទាំងនេះរត់ដឹកអ្នកដំណើរនៅរាល់រដូវកាលទឹកឡើង ដែលភាគច្រើនចាប់ពីខែសីហារហូតចូលដល់ខែមីនា។
ភ្ញៀវទេសចរបរទេសធ្វើដំណើរតាម ទូកល្បឿនលឿន សុខ ចំរើន ពីបាត់ដំបងទៅសៀមរាប។ រូបថត សហការី
អ្នកនាង ដានី បានឱ្យដឹងថា៖ «សម្រាប់ឆ្នាំនេះទឹកឆាប់ឡើងលឿន ដូច្នេះយើងអាចដំណើរការ ដោយចាប់ផ្ដើមរត់តាំងពីខែ ៧ (កក្កដា) រហូតមក។ ទូករបស់យើងមាន ៣ ខ្នាតគឺខ្នាតតូចអាចដឹកអ្នកដំណើរបាន ១២នាក់ ខ្នាតកណ្ដាល ២០ ទៅ៣០នាក់ និងខ្នាតធំ អាចដាក់បានមនុស្សពី ៦០ ទៅ ១២០នាក់។ តម្លៃសម្រាប់ភ្ញៀវខ្មែរ សៀមរាប បាត់ដំបង គឺ ១៥ដុល្លារ និងភ្ញៀវបរទេស ២៥ដុល្លារ»។
ក្នុងមួយថ្ងៃ ទូកដឹកភ្ញៀវពីសៀមរាប ទៅបាត់ដំបង ធ្វើដំណើរ ១ ជើងដោយទៅទទួលភ្ញៀវនៅម៉ោង ៦កន្លះព្រឹក និងចេញដំណើរនៅម៉ោង ៧កន្លះ។ រយៈពេលធ្វើដំណើរអាចខុសគ្នាអាស្រ័យទៅលើកត្តាខ្យល់ផងដែរ។
ការធ្វើដំណើរពីសៀមរាបទៅបាត់ដំបងតាមផ្លូវទឹកនេះមានរយៈពេលប្រមាណ ៦ ម៉ោង ដោយសារភ្ញៀវត្រូវចុះទទួលទានអាហារថ្ងៃត្រង់នៅភូមិបាក់ព្រា មុននឹងបន្តដំណើរទៅគោលដៅបាត់ដំបង។
យ៉ាងណាមិញ អ្នកនាង ដានី ទទួលស្គាល់ថា មធ្យោបាយធ្វើដំណើរនេះក៏មិនសូវមានភ្ញៀវដែរ ដោយក្នុងមួយថ្ងៃទូករត់តែមួយជើងប៉ុណ្ណោះ ហើយភាគច្រើនជាភ្ញៀវបរទេស ខណៈភ្ញៀវខ្មែរមានត្រឹមតែ ២០ ទៅ ៣០ភាគរយទេ។
លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង ក្រោយខកខានមួយរយៈ ការដាក់ឱ្យដំណើរការកាណូតឡើងវិញនេះ ភ្ញៀវអាចទទួលបានបទពិសោធលើសពីការធ្វើដំណើរពីទីតាំងមួយទៅទីតាំងមួយ ដោយពួកគេអាចទស្សនាព្រៃលិចទឹក មើលឃើញពីការរស់នៅពលរដ្ឋលើភូមិបណ្ដែតទឹក ការប្រកបរបរនេសាទ និងគយគន់ដងស្ទឹងសង្កែរជាដើម។
ទស្សនៈរបស់អ្នកដំណើរ
អ្នកនាង Sheree Hooker ជាអ្នកធ្វើដំណើរដែលបានជិះទូកពីសៀមរាបទៅបាត់ដំបង បានចែករំលែកបទពិសោធដោយសរសេរនៅលើវេបសាយ South Asia Backpacker កាលពីថ្ងៃទី១៨ ខែធ្នូ ឆ្នាំ២០២៣។
អ្នកនាង Hooker បានពណ៌នាការជិះទូកពីខេត្តសៀមរាបទៅបាត់ដំបងថាជាដំណើរផ្សងព្រេងដ៏ពិសេសមួយ ដែលផ្តល់នូវទស្សនីយភាពដ៏កម្រក្នុងការទស្សនាជីវិតពិតរបស់ប្រជាជនខ្មែរ។
អ្នកនាងបានកត់សម្គាល់ថា៖ «ការជិះទូកគឺជារឿងដែលត្រូវធ្វើសម្រាប់អ្នកចង់ឃើញជ្រុងមួយនៃផ្នែកទេសចរណ៍នៃប្រទេសកម្ពុជា»។
អ្នកនាងបានឱ្យថា ការប្ដូរពីការធ្វើដំណើរតាមផ្លូវគោករយៈពេល ៤ ម៉ោង ទៅជាការជិះទូករយៈពេលរហូតដល់ ៩ ម៉ោងអាចជាបទពិសោធន៍គួរឱ្យខ្លាច។ ប៉ុន្តែការចំណាយពេលជាច្រើនម៉ោងនេះផ្តល់នូវទំនាក់ទំនងកាន់តែស៊ីជម្រៅជាមួយនឹងវប្បធម៌ និងទេសភាពដ៏ស្រស់ត្រកាល។
ទូកទេសចរ សំចតនៅកំពង់ទូកចុងឃ្នាស ខេត្តសៀមរាប។ រូបថត សហការី
ពេលវេលាដ៏ល្អសម្រាប់ការធ្វើដំណើរតាមទូក គឺចាប់ពីខែសីហា ដល់ខែកុម្ភៈ នៅពេលដែលកម្ពស់ទឹកឡើងខ្ពស់។
ដំណើរនេះចាប់ផ្តើមនៅផែចុងឃ្នាស ដោយកាត់តាមបឹងទន្លេសាប និងតាមដងស្ទឹងសង្កែ។ អ្នកធ្វើដំណើរឆ្លងកាត់ភូមិបណ្តែតទឹក និងបានឃើញសត្វស្លាប និងការនេសាទបែបប្រពៃណី។
អ្នកនាង Hooker បានសរសេរថា៖ «ផ្លូវនេះពិតជាមានទេសភាពដ៏អស្ចារ្យ ជាមួយនឹងការឈប់សម្រាកនៅភូមិបណ្ដែតទឹក ដូចជា ឃុំកោះជីវាំង ដែលផ្តល់នូវបទពិសោធន៍វប្បធម៌ពិសេស»។
គន្លឹះសុវត្ថិភាព និងផាសុកភាព
អ្នកធ្វើដំណើរគួរតែរៀបចំកៅអីជ័ររឹង ឬបង់ឈើ និងអង្គុយត្រូវកម្តៅថ្ងៃ។ ឡេការពារកម្តៅថ្ងៃ និងមួកការពារកម្តៅថ្ងៃគឺចាំបាច់ណាស់។
អ្នកធ្វើដំណើរដែលមានបទពិសោធ Hooker បានណែនាំថា៖ «អង្គុយនៅខាងមុខ ដើម្បីជៀសវាងសំឡេងម៉ាស៊ីនរំខាន ឬយកកាសស្តាប់ ប្រសិនបើអ្នកអង្គុយកន្លែងផ្សេង។ អ្នកក៏អាចអង្គុយនៅលើដំបូលក៏បានផងដែរ»។
អ្នកនាង Hooker បានកត់សម្គាល់ថា៖ «មានអាវពោងគ្រប់គ្រាន់សម្រាប់មនុស្សគ្រប់គ្នា ហើយទូកមិនមានភាពចង្អៀតទេ ទោះបីជាយ៉ាងណាក៏ដោយ បញ្ហាមេកានិចអាចកើតឡើង ដែលអាចធ្វើឱ្យមានការពន្យារពេលការធ្វើដំណើរ»។
អ្នកធ្វើដំណើរដែលមានគម្រោងធ្វើដំណើរតាមផ្លូវទឹករវាងខេត្តសៀមរាប និងបាត់ដំបង គួរតែយកចិត្តទុកដាក់នូវគន្លឹះសំខាន់ៗ ដើម្បីធានាបាននូវការធ្វើដំណើរប្រកបដោយភាពរលូន។
ការកក់សំបុត្រមួយថ្ងៃ ឬពីរថ្ងៃជាមុន គឺជារឿងសំខាន់ ជាពិសេសក្នុងរដូវភ្ជុំបិណ្ឌ។ អាហារសម្រន់គឺចាំបាច់ដោយសារតែការចាប់ផ្តើមដំបូង ទោះបីជាអាហារថ្ងៃត្រង់ឈប់ពាក់កណ្តាលផ្លូវក៏ដោយ។
អ្នកធ្វើដំណើរត្រូវបានណែនាំឱ្យប្រើបង្គន់នៅលើគោកឱ្យហើយ និងកន្លែងឈប់អាហារថ្ងៃត្រង់ ព្រោះបន្ទោរបង់លើទូកមិនសូវល្អទេ។ វត្ថុសំខាន់ៗ ដូចជា ក្រដាសអនាម័យ និងជែលលាងដៃ អាចជួយជៀសវាងបញ្ហាកខ្វក់។
អ្នកនាង Hooker បានបន្ថែមថា៖ «ការជិះទូកពីខេត្តសៀមរាបទៅបាត់ដំបងស្វែងយល់ច្រើនអំពីវប្បធម៌ដ៏គួរឱ្យចាប់អារម្មណ៍ និងជាចំណុចលេចធ្លោនៃដំណើរកម្សាន្តណាមួយទៅកាន់អាស៊ីអាគ្នេយ៍»៕
