ភាពមិនប្រក្រតីបន្តក្នុងសាវនាការថ្ងៃទី០៦ឧសភានៅតុលាការក្រុងភ្នំពេញធ្វើឲ្យមានក្តីសង្ឃឹមតិចតួចចំពោះជនជាប់ចោទទាំង២៣រូបជាមួយសម្រែកទាមទាររកយុត្តិធម៌យ៉ាងផុសផុលពីសំណាក់សកម្មជនដីផ្លីនិងសាច់ញ្ញាតិជនជាប់ចោទដែលត្រូវបានចោទប្រកាន់យ៉ាងហោចណាស់ពីបទបង្ករអសន្តិសុខសង្គម។
ការចាប់ខ្លួនត្រូវបានធ្វើឡើងនៅពេលដែលកូនរបស់លោកស្រី ប៉ាន់ ស៊ីណា កំពុងប្រតិបត្តិការណ៍ការងារជាអ្នកអង្កេតការណ៍ក្នុងព្រឹត្តិការណ៍បាតុកម្មបង្ហូរឈាមរវាងបាតុករក្នុងឧស្សាហកម្មវាយនភ័ណ្ឌដើម្បីទាមទារដំឡើងប្រាក់បៀវត្តន៍១៦០ដុល្លា និងកងកំលាំងប្រដាប់អាវុធដែលបានបង្ករភាពអាប់អួរយ៉ាងខ្លាំងក្នុងវិស័យវាយនភ័ណ្ឌកម្ពុជា។
ការបិទសាវនាការកាលពីល្ងាចថ្ងៃទី០៦ ខែឧសភាម្សិលមិញនេះបានបន្សល់នូវការមន្ទិលសម្រាប់មន្រ្តីសិទ្ធិមនុស្សអំពីអព្យាក្រឹត្តិភាពរបស់តុលាការសាលាដំបូងរាជធានីភ្នំពេញដែលជាទូទៅរងការចោទប្រកាន់ថាស្ថិតនៅក្រោមឥទ្ធិពលអ្នកនយោបាយ។