មុនពេលថ្ងៃរះ កសិករ ឆាត ឈឿម បានឡើងទៅដល់ចុងត្នោតរួចទៅហើយ ដើម្បីយកបំពង់ដែលពេញដោយទឹកត្នោត និងជំនួសដោយបំពង់ថ្មី។
កសិករដែលរស់នៅក្នុងភូមិធ្លក ឃុំរំចេក ស្រុកបន្ទាយស្រី ខេត្តសៀមរាបនេះ បានប្រកបមុខរបរជាអ្នកឡើងត្នោតប្រមាណ ២០ឆ្នាំមកហើយ ដោយជារៀងរាល់ថ្ងៃ លោកឡើងដើមត្នោតជាង ២០ដើម ទាំងព្រឹកទាំងល្ងាច ដើម្បីយកទឹកត្នោតមកធ្វើជាស្ករត្នោតធម្មជាតិ។
បុរសវ័យជាង ៥០ឆ្នាំរូបនេះ ធ្វើការងារឡើងត្នោតដោយក្ដីស្រឡាញ់ និងជាប្រពៃណី ដើម្បីផ្គត់ផ្គង់គ្រួសារ ខណៈដែលអ្នកប្រកបរបបដូចគ្នានេះនៅក្នុងភូមិ បានបោះបង់ចោលដោយកត្តាផ្សេងៗ ហើយមិនមានក្មេងជំនាន់ក្រោយណាមកចាប់របរនេះទេ។
ជារៀងរាល់ថ្ងៃ លោក ឆាត ឈឿម អាចផលិតស្ករត្នោតធម្មជាតិបានប្រមាណពី ២០ ទៅ ៣០គីឡូក្រាម អាស្រ័យលើអាកាសធាតុល្អ ដែលអំណោយផលដល់ការផលិតទឹកត្នោត។ ស្ករត្នោតធម្មជាតិរបស់កសិករខាងលើនេះ លក់ក្នុងតម្លៃដុំជាង ៥ពាន់រៀលក្នុងមួយគីឡូ ចំណែកតម្លៃរាយ អាចលក់ក្នុងតម្លៃជាង ៦ពាន់រៀល។
បើទោះបីជារបរនេះមិនសូវមានអ្នកធ្វើក៏ដោយ ប៉ុន្តែលោកក៏ជួបប្រទះនូវបញ្ហាមួយចំនួនផងដែរ ដូចជាការប្រើកម្លាំងឡើងទៅលើដើមត្នោតជារៀងរាល់ថ្ងៃ និងការរកស៊ីមិនស្មោះត្រង់របស់ឈ្មួញខ្លះ ដែលទិញស្ករត្នោតសុទ្ធ យកទៅលាយជាមួយគ្រឿងផ្សំផ្សេងៗ ឬលាយស្ករសជាដើម ដើម្បីផលិតស្ករក្នុងបរិមាណច្រើន និងលក់ក្នុងតម្លៃទាប ចំណេញលឿន។
យ៉ាងណាក៏ដោយ ស្ករត្នោតរបស់លោក ឆាត ឈឿម មានការពេញនិយមណាស់នៅក្នុងភូមិ រហូតអ្នកភូមិដែលមានសាច់ញាតិនៅបរទេសដូចជានៅអូស្ត្រាលី និងអាមេរិក តែងទិញស្កររបស់គាត់ជាច្រើនគីឡូ ដើម្បីផ្ញើទៅបងប្អូនរបស់ពួកគេ នេះក៏ដោយសារ ការប្តេជ្ញាចិត្តរបស់លោក ឈឿម ដែលបន្តផលិតស្ករត្នោតតាមប្រពៃណី និងធម្មជាតិសុទ្ធសាធ។
លោក ឈឿម ជឿជាក់ថា ស្ករត្នោតដែលមានគុណភាពល្អ នៅតែមានតម្រូវការពីអ្នកប្រើប្រាស់ ជាពិសេសអ្នកដែលគិតពីសុខភាព ផលិតផលធម្មជាតិ និងអ្នកដែលគាំទ្រដល់កសិករផលិតស្ករត្នោតដោយភាពស្មោះត្រង់៕
