ទីតាំងនៃមជ្ឈមណ្ឌលវប្បធម៌ជនជាតិនៅភ្នំដោះក្រមុំ ក្នុងខេត្តមណ្ឌលគិរី។ សមាគម Adhoc
មណ្ឌលគិរីៈ តំណាងជនជាតិដើមភាគតិច បានអះអាងកាលពីម្សិលមិញថា អាជ្ញាធរខេត្តមណ្ឌលគិរីនៅពុំទាន់ចុះទៅ វាស់វែងដីដែលជាទីតាំងរបស់មជ្ឈមណ្ឌលវប្បធម៌របស់ជនជាតិដើមលើភ្នំដោះក្រមុំនៅឡើយទេ បើទោះជាលោកនាយករដ្ឋមន្ត្រីបានចេញបញ្ជាតាំងពីចុងខែមុនក្ដី ខណៈពួកគាត់ចង់ឲ្យពន្លឿនការងារនេះឲ្យបានឆាប់។ ប៉ុន្តែអាជ្ញាធរថា កំពុងដោះស្រាយបញ្ហានេះហើយ។
លោក គ្រើង តុលា លេខាធិការនៃគណៈកម្មាធិការមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំបានប្រាប់ភ្នំពេញប៉ុស្ដិ៍ម្សិលមិញថា ក្រុមជនជាតិចង់ឲ្យអាជ្ញាធរពាក់ព័ន្ធចុះទៅសិក្សាវាស់វែងនិងបោះបង្គោលកំណត់ទំហំផ្ទៃដីលើភ្នំដោះក្រមុំដែលជាទីតាំងនៃមជ្ឈមណ្ឌលវប្បធម៌របស់ជនជាតិដើមឱ្យបានឆាប់។
លោក តុលា អះអាងថា តាម ស.ជ.ណ របស់រដ្ឋាភិបាលក្នុងឆ្នាំ ២០០៤ បានកំណត់ថា មជ្ឈមណ្ឌលវប្បធម៌ជនជាតិដើមលើភ្នំដោះក្រមុំគឺមានទំហំផ្ទៃដីសរុប ១០២ ហិកតាដែលលាតសន្ធឹងចាប់ពីជើងភ្នំ ចង្កេះភ្នំ និងដល់កំពូលភ្នំ ប៉ុន្តែលោកថា បច្ចុប្បន្ននៅតាមចង្កេះភ្នំ មានផ្ទះពលរដ្ឋជាង ១០០ គ្រួសារ និងមានខារ៉ាអូខេ ២ កន្លែង ដែលលោកថា សង់ រំលោភយកដីមជ្ឈមណ្ឌលវប្បធម៌ជនជាតិដើមនិងកាន់កាប់ដោយខុសច្បាប់ ។
លោក តុលា បន្តថា ក្រោយពី មានអនុសាសន៍ពីលោក ហ៊ុន សែន កាលពីថ្ងៃទី ២៨ ខែកុម្ភៈដើម្បីឱ្យអាជ្ញាធរខេត្តដកហូតមកវិញនូវដីភ្នំដែលគេបានរំលោភយកគឺអាជ្ញាធរពាក់ព័ន្ធខេត្តបានបើកប្រជុំមួយកាលពីថ្ងៃទី ១ មីនា ប៉ុន្តែក្រោយមកនៅពុំទាន់បានចុះទៅវាស់វែងទេ។
លោកថា៖ «អ៊ីចឹងរវាងមន្ត្រីជំនាញពាក់ព័ន្ធយើងបានជួបគ្នាហើយ ប៉ុន្តែមិនទាន់បានចុះទៅភ្នំដោះក្រមុំហ្នឹងទេ ហើយយើងក៏អត់ទាន់បានកំណត់ត្រឹមណាៗទេ អត់ទាន់ចុះទៅចុច GPS និងទៅ
បោះបង្គោលនៅឡើយទេ»។
បើតាមលោក តុលា ក្នុងកិច្ចប្រជុំដែលដឹកនាំដោយអភិបាលខេត្ត លោក ស្វាយ សំអ៊ាង នោះបានសម្រេចកំណត់វិធីសាស្ដ្រដោះស្រាយបញ្ហាដីធ្លីលើភ្នំដោះក្រមុំ ដោយយកកំណត់ហេតុកាលពីឆ្នាំ ២០១៦ ធ្វើជាគោលក្នុងការកំណត់ព្រំដីឱ្យបានជាក់លាក់ និងការរក្សាទុកដីសម្រាប់កម្មសិទ្ធិរបស់មន្ទីរចំនួន ៣ ឱ្យនៅដដែលដូចជាមន្ទីររ៉ែនិងថាមពល មន្ទីរឧស្សាហកម្ម និងសិប្បកម្ម និងមន្ទីរមុខងារសាធារណៈ។
ឆ្លើយតបនឹងការលើកឡើងនេះ លោក ស្វាយ សំអ៊ាង អភិបាលខេត្តមណ្ឌលគិរីបញ្ជាក់ថា បញ្ហានៅលើភ្នំដោះក្រមុំគឺមន្ត្រីពាក់ព័ន្ធនិងតំណាងជនជាតិបានស្រុះស្រួលគ្នាអស់ហើយ។
លោកថា៖ «ខ្ញុំដោះហើយ អាហ្នឹងខ្ញុំដោះហើយតើ មិនមែនមិនដោះឯណា តែពលរដ្ឋខូច អាហ្នឹងដោះហើយ ក៏ថាអត់ដោះដែរ»។
ប៉ុន្តែ លោក ឡុង វិបុល អភិបាលក្រុងសែនមនោរម្យ បញ្ជាក់បន្ថែមថា ការប្រជុំដោះស្រាយបញ្ហាទន្ទ្រានយកភ្នំដោះក្រមុំធ្វើកម្មសិទ្ធិនេះ គឺមិនមែនទើបតែធ្វើក្រោយអនុសាសន៍របស់លោក ហ៊ុន សែន នោះទេ គឺអាជ្ញាធរខេត្តបានប្រជុំនិងដោះស្រាយជាច្រើនលើកមកហើយ ដោយនៅសល់តែ ១១ គ្រួសារ ប៉ុណ្ណោះ។
លោកបន្តថា បញ្ហាលើភ្នំដោះក្រមុំគឺស្ទើរតែដោះស្រាយបានទាំងស្រុងហើយ ដោយនៅតែអាជ្ញាធរនិងមន្ត្រីជំនាញអន្តរក្រសួងកំណត់ពេលចុះវាស់់ទំហំផ្ទៃដីដើម្បីឲ្យដឹងថា ទីតាំងណាត្រូវទុកជូនពលរដ្ឋ និងដីត្រូវដក
ហូតពីពលរដ្ឋមុនរាយការណ៍ជូននាយករដ្ឋមន្ត្រី។
លោកថា៖ «វាស់កន្លែងណាដែលយើងត្រូវយកមកវិញ កន្លែងណាដែលយើងត្រូវជូនពលរដ្ឋ។ ទោះបីជាយើងត្រូវយកមកវិញ ប៉ុន្តែកន្លែងខ្លះពលរដ្ឋតាំងលំនៅតាំងពីមុនទីតាំងហ្នឹងចុះបញ្ជីទៅទៀត»។
ប៉ុន្តែលោក ឡុង វិបុល មិនទាន់អាចអះអាងថា អាជ្ញាធរនឹងចុះទៅវាស់វែងផ្ទាល់នៅពេលណានៅឡើយទេ។ លោក អ៊ាង ម៉េងលី មន្ត្រីអាដហុកប្រចាំខេត្តមណ្ឌលគីរីយល់ឃើញថា អាជ្ញាធរគួរតែដោះស្រាយបញ្ហាដីនៅលើភ្នំដោះក្រមុំ តាមអនុសាសន៍នាយករដ្ឋមន្ត្រីនិងធ្វើយ៉ាងណាឱ្យជនជាតិភាគតិច
ស្ងប់ចិត្តអាចទទួលយកបាន។
លោកថា៖ «ចំពោះខ្ញុំយល់ថា ពលរដ្ឋទាមទារដីទំហំជាក់ស្ដែងដែលកំណត់នៅក្នុង ស.ជ.ណ ហើយរាល់ថ្ងៃនេះ មានការទន្ទ្រានយកពីសំណាក់អ្នកនៅក្នុងតំបន់ហ្នឹង ហើយគាត់ចង់ឱ្យអាជ្ញាធរដោះស្រាយបញ្ហាហ្នឹងឱ្យបានជាក់លាក់»។
ថ្វីដ្បិតដីមជ្ឈមណ្ឌលវប្បធម៌ជនជាតិដើមមាន ១០២ ហិកតា ប៉ុន្តែបច្ចុប្បន្នត្រូវគេទន្ទ្រានយក និងនៅសល់តែ ៨៧ ហិកតាប៉ុណ្ណោះ។ នេះបើតាមការអះអាងរបស់លោកគ្រើន តុលា ៕
