លោក ឡុង ឌីម៉ង់ អគ្គរាជទូតកម្ពុជាប្រចាំប្រទេសកូរ៉េខាងត្បូង។ រូបថត ហ្វេសប៊ុក
ភ្នំពេញៈ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េបានធ្វើការណែនាំ និងផ្សព្វផ្សាយស្តីពីការថែទាំសុខភាពនារដូវវស្សាទៅដល់ពលករ សិស្ស-និស្សិត និងប្រជាពលរដ្ឋខ្មែរប្រមាណជាង ៦ ម៉ឺននាក់ដែលកំពុងធ្វើការ និងរស់នៅក្នុងប្រទេសកូរ៉េខាងត្បូង ដើម្បីការពារ និងទប់ស្កាត់នូវហានិភ័យផ្សេងៗព្រោះតែមានអ្នកស្លាប់ជារៀងរាល់ឆ្នាំជាមធ្យមពី ១០ ទៅ ១៥ នាក់ក្នុង ១ ឆ្នាំ។
យោងតាមសេចក្តីណែនាំរបស់ស្ថានទូតខ្មែរប្រចាំនៅកូរ៉េបានធ្វើការណែនាំចំនួន ៩ ប្រការសម្រាប់ការពារ លើកកម្ពស់សុខុមាលភាព និងទប់ស្កាត់នូវហានិភ័យមួយចំនួនដែលអាចធ្វើឱ្យប៉ះពាល់ដល់សុខភាព និងអាយុជីវិតដ៏មានតម្លៃរបស់ប្រជាពលរដ្ឋកម្ពុជានៅពេលអាកាសធាតុចុះត្រជាក់ខ្លាំងនៅប្រទេសមួយនេះ។
លិខិតបានឱ្យដឹងថា នៅពេលធ្វើដំណើរឬទៅធ្វើការនៅខាងក្រៅផ្ទះត្រូវស្លៀកសម្លៀកបំពាក់ឱ្យបានក្រាស់ និងប្រើកន្សែងរុំក ពាក់មួក ព្រមទាំងពាក់ស្រោមដៃ, សម្រាកឱ្យបានគ្រប់គ្រាន់ និងធ្វើលំហាត់ប្រាណងាយៗនៅក្នុងផ្ទះឱ្យបានទៀងទាត់។
សេចក្តីណែនាំនេះបានបន្តថា៖ «ពេលគេងត្រូវបើកម៉ាស៊ីនសំណើម ឬត្រូវដាក់ទឹកមួយផ្តិលនៅក្នុងបន្ទប់ ឬបង្ហើបបង្អួចបន្តិច ប៉ុន្តែកុំបើកម៉ាស៊ីនកម្តៅខ្លាំងពេក ដោយរក្សាកម្តៅក្នុងបន្ទប់ឱ្យនៅត្រឹមសីតុណ្ហភាពពី ២០ ទៅ ២៥ អង្សារ។ កុំបិទបង្អួចបន្ទប់ជិតពេកត្រូវទុកចន្លោះបង្អួចឱ្យមានខ្យល់អុកស៊ីហ្ស៊ែនចេញចូលគ្រប់គ្រាន់ក្នុង ១ ថ្ងៃ ២ ទៅ ៣ ដងអាចបើកម្តងរយៈពេល ១០ នាទី»។
ស្ថានទូតបានបន្តថា ប្រជាពលរដ្ឋ និងពលករទាំងអស់ត្រូវបរិភោគអាហារដែលសម្បូរជីវជាតិឱ្យបានគ្រប់គ្រាន់ ជាពិសេសប្រភេទអាហារដែលមានវីតាមីន D ដូចជាត្រី ស៊ុតលឿង ថ្លើម ឈីស ជាដើម និងត្រូវពិសាទឹកឱ្យបានគ្រប់គ្រាន់ចៀសវាងការបាត់បង់ជាតិទឹកនៅក្នុងខ្លួន។
នៅក្នុងការ Live វីដេអូ កាលពីសប្តាហ៍មុន លោក ឡុង ឌីម៉ង់ អគ្គរាជទូតកម្ពុជាប្រចាំប្រទេសកូរ៉េខាងត្បូងបានលើកឡើងថា សព្វថ្ងៃនេះប្រជាពលរដ្ឋខ្មែរដែលកំពុងរស់នៅ និងធ្វើការនៅក្នុងប្រទេសកូរ៉េមានប្រមាណជាង ៦ ម៉ឺននាក់ក្នុងនោះមានពលករប្រមាណជា ៥ ម៉ឺននាក់ក្នុងនោះមានពី ១០ ទៅ ១៥ ភាគរយជាពលករខុសច្បាប់ (ពលករដែលចប់អាណត្តិហើយមិនទាន់បានត្រឡប់ទៅផ្ទះវិញ) ស្ត្រី ឬបុរសខ្មែរដែលរៀបការស្វាមី ឬភរិយាជនជាតិកូរ៉េមានប្រមាណជាជិត ១ ម៉ឺននាក់ និងនិស្សិតប្រមាណជា ៤០០ នាក់។
លោកបានថ្លែងថា៖ «ពលករ និងប្រជាពលរដ្ឋខ្មែរយើងនៅក្នុងប្រទេសកូរ៉េនេះ ជួបប្រទះទាំងសុខ និងទុក្ខ ហើយយើងបានធ្វើការដោះស្រាយនូវបញ្ហាជាច្រើនបន្តបន្ទាប់គ្នាដល់ពួកគាត់។ ដោយឡែកមានបញ្ហាមួយក្នុងចំណោមបញ្ហាទាំងអស់ដែលយើងបានជួបប្រទះដែលជាទុក្ខព្រួយដ៏ធំរបស់ពួកយើងគឺការទទួលមរណភាពរបស់ពលរដ្ឋ និងពលកររបស់ខ្មែរយើងមួយចំនួន ដែលក្នុង ១ឆ្នាំៗជាមធ្យមមានចន្លោះពី ១០ ទៅ ១៥ នាក់បានស្លាប់បាត់បង់ជីវិត»។
លោក ឡុង ឌីម៉ង់ បានបញ្ជាក់បន្ថែមថា អ្នកទាំងនោះស្លាប់ដោយសារបញ្ហាផ្សេងៗគ្នាគឺអ្នកខ្លះស្លាប់ដោយសារបញ្ហាបេះដូង ជំងឺរ៉ាំរ៉ៃ គ្រោះថ្នាក់ចរាចរណ៍ អត្តឃាត និងឃាតកម្មជាដើម។ លោកថា៖ «ខ្ញុំចង់ជម្រាបជូនផងដែរថា ក្នុងចំនួនបងប្អូនដែលស្លាប់ចន្លោះពី ១០ ទៅ ១៥ នាក់នោះ គឺមានប្រមាណជា ៦០ ភាគរយដែលយើងទទួលបានរបាយការណ៍មកថា ស្លាប់ដោយសារជំងឺគាំងបេះដូងដែលអ្នកខ្លះស្លាប់នៅក្នុងបន្ទប់គេងតែងម្តង»។
លោក ឡុង ឌីម៉ង់ ពន្យល់ថា មូលហេតុដែលនាំឱ្យពលករខ្មែរភាគច្រើនមានជំងឺគាំងបេះដូងនេះមានកត្តាផ្សេងៗគ្នាដូចជា បញ្ហាផ្លូវចិត្ត ការហូបមិនគ្រប់គ្រាន់ គេងមិនគ្រប់គ្រាន់ អាកាសធាតុត្រជាក់ខ្លាំងជាដើម។
លោកថា៖ «យើងតែងតែខិតខំដោះស្រាយដោយមិនដែលគិតថាពលរដ្ឋខ្លួនទទួលគ្រោះថ្នាក់ដល់ជីវិតហើយបែរជាបោះបង់ចោល គឺយើងមិនដែលបោះបង់ចោលនោះទេ គឺយើងតែងតែគិតគូរជួយសម្របសម្រួលដោះស្រាយជូនពលរដ្ឋយើងជានិច្ច»៕
