មណ្ឌលគិរីៈ ប្រជាសហគមន៍ជនជាតិដើមភាគតិចព្នងប្រមាណជាង ១០០ នាក់ដែលរស់នៅ ឃុំស្រែហ៊ុយ ស្រុកកោះញែក ខេត្តមណ្ឌលគិរីបាននាំគ្នាតវ៉ាពីម្សិលមិញប្រឆាំងទៅនឹងចំណាត់ការរបស់ក្រុមមន្ត្រីឧទ្យានុរក្សដែនជម្រកសត្វព្រៃស្រែពកដែលបានចុះដកបង្គោលរបងឈើកំណត់ទីតាំងព្រៃកប់ខ្មោចដូនតារបស់ពួកគាត់។
លោក ទេន ប៊ុនសាម អាយុ ៣៦ ឆ្នាំរស់នៅភូមិឈុល ឃុំស្រែហ៊ុយ ប្រាប់ភ្នំពេញប៉ុស្តិ៍ម្សិលមិញថា បង្គោលឈើកំណត់ព្រំប្រទល់ដីព្រៃកប់សពដូនតារបស់ពួកគាត់រាប់សិបដើមត្រូវបានក្រុមមន្ត្រីបរិស្ថាន និងអាជ្ញាធរមូលដ្ឋានចុះរុះរើ និងដកចេញដោយពុំបានជូនដំណឹងពីមូលហេតុឲ្យបានច្បាស់លាស់ជាមុននោះទេ។
លោក ប៊ុនសាម ថា៖ «យើងមិនដឹងពីមូលហេតុដែលមន្ត្រីបរិស្ថាន និងអាជ្ញាធរមូលដ្ឋានចុះដកបង្គោលកំណត់ព្រំប្រទល់ដីព្រៃផ្នូរខ្មោចដូនតារបស់យើងនោះទេ។ យើងមានក្ដីបារម្ភខ្លាំងណាស់ជុំវិញករណីនេះ ព្រោះកន្លងមកថ្មីៗនេះមានមនុស្សចម្លែកៗជាច្រើនបានចេញចូលនៅក្នុងភូមិរបស់ពួកយើង ហើយពួកគេបានស៊ើបសួរចង់ទិញដីព្រៃពីសហគមន៍របស់យើង តែពួកយើងមិនព្រម»។
លោកបន្តថាបន្ទាប់ពីមានករណីបែបនេះកើតឡើងក្រុមអ្នកភូមិក៏បាននាំគ្នាបោះបង្គោលហ៊ុមព័ទ្ធដីព្រៃផ្នូរខ្មោចដូនតា ដើម្បីការពារពីការរំលោភបំពាននានាពីជនឱកាសនិយមទាំងនោះ។
ប៉ុន្តែកាលពីថ្ងៃចន្ទមុននេះស្រាប់តែមានអាជ្ញាធរភូមិ ឃុំ និងអាជ្ញាធរជំនាញផ្នែកបរិស្ថាននាំគ្នាចុះដកបង្គោលទាំងនោះអស់រាប់សិបដើមតែម្ដង។
ជាមួយគ្នានេះដែរលោក ស្រ៊ីន កាហេ អាយុ ២៦ ឆ្នាំរស់នៅភូមិឆុងប៉ាង ឃុំស្រែហ៊ុយ ដែលបានទៅចូលរួមនៅក្នុងការតវ៉ាដែរនោះបាននិយាយបន្ទរថាដីព្រៃផ្នូរដូនតាគឺជាដីព្រៃចុងក្រោយរបស់ពួកគាត់ដែលជាជនជាតិដើមភាគតិចព្នងសម្រាប់រក្សាទុក និងប្រើប្រាស់ច្រើនយ៉ាង។
លោក កាហេ ថា៖ «ជនជាតិដើមភាគតិចព្នងយើងខ្ញុំ រស់នៅអាស្រ័យលើការដាំដុះ ចិញ្ចឹមសត្វ គោ ក្របី និងការរុករកអនុផលព្រៃឈើ។ ព្រៃផ្នូរខ្មោចដូនតាគឺជាក្ដីរំពឹងចុងក្រោយរបស់ពួកយើង ដូច្នេះពួកយើងមិនឲ្យអ្នកណាម្នាក់រំលោភបំពានយកបានឡើយ ពួកយើងស៊ូស្លាប់ដើម្បីការពារវាសម្រាប់អ្នកជំនាន់ក្រោយរបស់ពួកយើង»។
ទោះជាយ៉ាងណាអ្នកភូមិទាំងអស់មិនបានដឹងច្បាស់ថា ដីព្រៃផ្នូរខ្មោចដូនតារបស់ពួកគាត់មានទំហំប៉ុន្មាននោះទេ។ ពួកគាត់និយាយក្នុងភាពស្រពេចស្រពិលថា ដីព្រៃផ្នូរខ្មោចដូនតានោះមិនធំទេគឺមានទំហំប្រមាណមិនដល់ ១០០០ ម៉ែត្រ ៤ ជ្រុងនោះទេ ប៉ុន្តែទំហំនេះត្រូវបានលោក សយ ច្រឹប មេឃុំ ស្រែហ៊ុយ អះអាងថាមិនត្រឹមត្រូវនោះទេ។
លោក សយ ច្រឹប បានអះអាងដែរថាការពិតដីព្រៃផ្នូរខ្មោចដូនតារបស់ពួកគេមានទំហំ ៥០០ ម៉ែត្រ ៤ ជ្រុង ឬស្មើ ២៥ ហិកតា ហើយដីនេះត្រូវបានរដ្ឋាភិបាលកាត់ឲ្យសហគមន៍របស់ពួកគាត់តាំងពីឆ្នាំ ២០០៣ មកម្ល៉េះ។ ទីតាំងដីព្រៃនោះគឺស្ថិតនៅម្ខាងផ្លូវនៃទីតាំងដីដែលពួកគាត់កំពុងនាំគ្នាបោះបង្គោលរបងហ៊ុមព័ទ្ធនេះ។
លោកបញ្ជាក់ថា៖ «យើងគាំទ្រចំពោះស្មារតីការពារ និងអភិរក្សព្រៃផ្នូរដូនតារបស់ពួកគាត់ ប៉ុន្តែអ្វីដែលពួកគាត់កំពុងធ្វើបានរំលោភមួយផ្នែកទៅលើព្រៃដែនជម្រកសត្វព្រៃស្រែពក និងមួយផ្នែកទៀតបានរំលោភលើដីព្រៃបម្រុងទុករបស់រដ្ឋ»។
លោក ព្រំ សុវណ្ណា ប្រធានតំបន់ការពារដែនជម្រកសត្វព្រៃស្រែពកថ្លែងថា៖ «ករណីប្រជាសហគមន៍នៅក្នុងភូមិឈុល និងភូមិឆុងប៉ាង សមត្ថកិច្ចជំនាញយើងគាំទ្រចំពោះស្មារតីចេះការពារ និងអភិរក្សព្រៃឈើ និងផ្នូរដូនតារបស់ពួកគាត់ ប៉ុន្តែសកម្មភាពរបស់ពួកគាត់ពេលខ្លះធ្វើហួសព្រំដែន និងមិនត្រឹមត្រូវតាមច្បាប់នោះទេគឺពួកគាត់បានបោះបង្គោលកំណត់ព្រំដីព្រៃផ្នូរដូនតារបស់គាត់រំលោភចូលក្នុងដីដែនជម្រករបស់យើង»។
លោកបានបន្ថែមថាទោះយ៉ាងណាក៏ដោយនៅពេលនេះក្រុមមន្ត្រីជំនាញផ្នែកបរិស្ថាននៃដែនជម្រកសត្វព្រៃស្រែពក កំពុងសហការជាមួយអាជ្ញាធរមូលដ្ឋានចុះធ្វើការសម្របសម្រួល និងធ្វើការពន្យល់ណែនាំដល់អ្នកភូមិទាំងនោះហើយ៕
