លោក Daniel Zhang ថ្លែងក្នុងកម្មវិធីមួយកាលពីឆ្នាំមុន។ រូបថត AFP
ក្រុងស៊ាងហៃៈ ដោយសារបុគ្គលិកលក្ខណៈផ្ទាល់ខ្លួន និងជំនាញលោក Daniel Zhang ដែលជាអគ្គនាយកក្រុមហ៊ុន Alibaba នឹងបើកយុគសម័យថ្មីមួយសម្រាប់ក្រុមហ៊ុនពាណិជ្ជកម្មអេឡិចត្រូនិកដ៏ធំរបស់ចិនមួយនេះ នៅពេលលោកចូលកាន់តំណែងជាអ្នកដឹកនាំទាំងស្រុងបន្តវេនពីស្ថាបនិកក្រុមហ៊ុនលោក Jack Ma។
កាលពីថ្ងៃចន្ទលោក Ma បានប្រកាសថា ក្នុងរយៈពេល ១ ឆ្នាំ លោកនឹងប្រគល់តំណែងជាប្រធានប្រតិបត្តិរបស់ក្រុមប្រឹក្សារបស់ក្រុមហ៊ុន Alibaba ទៅលោក Zhang ដែលជាអគ្គនាយកក្រុមហ៊ុន។
លោក Zhang វ័យ ៤៦ ឆ្នាំ ដែលជាគណនេយ្យករមួយរូប ត្រូវបានក្រុមអ្នកវិភាគលើកឡើងថា លោកមានលក្ខណសម្បត្តិលើសពីសមត្ថភាពការងារនេះ។ លោកបានសិក្សាជំនាញហិរញ្ញវត្ថុនៅសាកលវិទ្យាល័យហិរញ្ញវត្ថុ និងសេដ្ឋកិច្ចនៃទីក្រុងស៊ាងហៃ និងត្រូវបានគេមើលឃើញថាជាមនុស្សមានចរិតសុភាពរាបសា។
លោកគឺជាអ្នកគ្រប់គ្រងជាន់ខ្ពស់នៅក្រុមហ៊ុនសវនកម្ម Price Waterhouse Coopers និងជាប្រធានមន្រ្តីប្រតិបត្តិក្រុមហ៊ុនហ្គេមអនឡាញចិនមួយមុនពេលចូលបម្រើការងារនៅក្រុមហ៊ុន Alibaba ក្នុងឆ្នាំ ២០០៧ ក្នុងឋានៈជាប្រធានមន្រ្តីហិរញ្ញវត្ថុ (COO) ផ្នែកគេហទំព័រទីផ្សារអនឡាញ Taobao។
លោក Zhang ត្រូវបានគេទទួលស្គាល់ចំពោះការប្រែក្លាយគេហទំព័រពាណិជ្ជកម្មអនឡាញ Tmall ដែលបម្រើជាទីតាំងមួយសម្រាប់អ្នកលក់ និងអ្នកទិញឲ្យជួបគ្នាសម្រាប់ប្រតិបត្តិការទិញលក់ឲ្យទៅជាអាជីវកម្មជោគជ័យបំផុតរបស់ក្រុមហ៊ុន Alibaba និងបង្កើតឲ្យមានថ្ងៃលក់រាយដ៏ធំបំផុតរបស់ប្រទេស ចិន ដែលមានឈ្មោះថា «Singles'' Day» នៅថ្ងៃទី១១ ខែវិច្ឆិកាជារៀងរាល់ឆ្នាំ។
ដោយចាប់ផ្តើមដំបូងក្នុងឆ្នាំ ២០០៩ ដែលស្រដៀងទៅនឹងថ្ងៃ «Black Friday» របស់អាមេរិកដែរនោះ ថ្ងៃលក់រាយ «Singles'' Day» កាលពីឆ្នាំមុនបានឃើញការទិញលក់ទំនិញលើគេហទំព័រពាណិជ្ជកម្មអនឡាញរបស់ក្រុមហ៊ុន Alibaba ក្នុងទឹកប្រាក់ជាង ២៥ ពាន់លានដុល្លារ ដែលកើនឡើងជិត ៤០ ភាគរយបើធៀបនឹងឆ្នាំ២០១៦។
ប្រាក់រាប់ពាន់លានដុល្លារត្រូវបាននាំយកមកក្នុងថ្ងៃលក់រាយនេះតាមរយៈក្រុមហ៊ុនពាណិជ្ជកម្មអេឡិចត្រូនិកដែលជាគូប្រជែងរបស់ក្រុមហ៊ុន Alibaba ដែលក្រុមហ៊ុនទាំងនោះបានចូលរួមក្នុងថ្ងៃលក់រាយនេះដែរ។
លោក Zhang បានក្លាយជា COO របស់ក្រុមហ៊ុន Alibaba ក្នុងឆ្នាំ ២០១៣ និងជាអគ្គនាយក (CEO) ក្នុងឆ្នាំ២០១៥។
ស្ថិតក្រោមអាណត្តិរបស់លោក Zhang ក្រុមហ៊ុន Alibaba បានផ្លាស់ប្តូរពីប្រតិបត្តិការតាមកុំព្យូទ័រទៅជាប្រតិបត្តិការតាមទូរស័ព្ទដៃដែលបច្ចុប្បន្នមានជិត ៨០ ភាគរយ នៃទំហំទំនិញសរុប។
ដោយប្រាក់ចំណូលកើនឡើង ភាគហ៊ុនរបស់ក្រុមហ៊ុន Alibaba បានកើនឡើងជិត ៩០ ភាគរយ។ បច្ចុប្បន្នក្រុមហ៊ុននេះគឺជាក្រុមហ៊ុនមួយក្នុងចំណោមក្រុមហ៊ុនដែលមានតម្លៃបំផុតក្នុងពិភពលោក ដោយមានមូលធននីយកម្មទីផ្សារប្រហែល ៤៣០ ពាន់លានដុល្លារ។
លោក Zhang គឺជាមនុស្សម្នាក់ដែលគេស្គាល់ថា មិនចូលចិត្តប្រកួតប្រជែង តែបណ្តុះបណ្តាលខ្លួនឯងឲ្យក្លាយជាមនុស្សដែលមិនអាចបំបាក់បាន។
លោក Jeffrey Towson ដែលជាអ្នកនិពន្ធសៀវភៅ និងជាសាស្រ្តាចារ្យផ្នែកពាណិជ្ជកម្មនៅសាកលវិទ្យាល័យប៉េកាំងបានថ្លែងថា៖ «លោក Jack Ma មានភាពជាអ្នកដឹកនាំមួយដែលគួរឲ្យជឿ។ លោក Daniel Zhang មិនមាននោះទេ។ ប៉ុន្តែនៅពេលគាត់ផ្តល់បទសម្ភាសក្នុងសន្និសីទសារព័ត៌មាន គាត់ឆ្លាតខ្លាំងណាស់។ វាមិនដូចជាអ្វីដែលគាត់មានសោះ»។
លោក Zhang ចូលចិត្តបាល់បោះ និងបាល់ទាត់។ លោកត្រូវបានប្រព័ន្ធផ្សព្វផ្សាយនិយាយថា ជាអ្នកគាំទ្រក្លិបបាល់ទាត់ Arsenal។
ស្ថិតក្រោមការដឹកនាំរបស់លោកក្រុមហ៊ុន Alibaba បានវិនិយោគលើគំនិតផ្តួចផ្តើមថ្មីផ្សេងៗ រួមទាំងហាងលក់រាយរបស់ Alibaba ប្រព័ន្ធកុំព្យូទ័រខ្លោដ ព័ត៌មានឌីជីថល វិស័យលក់គ្រឿងទេស ការដឹកជញ្ជូនអាហារ និងការផ្សព្វផ្សាយពាណិជ្ជកម្ម។
កាលពីខែសីហា ក្រុមហ៊ុន Alibaba ចងសម្ព័ន្ធភាពជាមួយក្រុមហ៊ុនកាហ្វេ Starbucks ដើម្បីទាញយកអត្ថប្រយោជន៍ពីទីផ្សារកាហ្វេដែលកំពុងរីកចម្រើនរបស់ប្រទេស ចិន ហើយកាលពីខែមេសាក្រុមហ៊ុនបានបញ្ចប់ការទិញក្រុមហ៊ុនដឹកជញ្ជូនអាហារចិន Ele.me និងទិញយកក្រុមហ៊ុនផ្សេងទៀត។
លោក Zhang បានថ្លែងក្នុងបទសម្ភាសមួយនៅដើមឆ្នាំនេះថា៖ «ក្នុងពិភពជំនួញ ភាពរំភើបមិនចេះចប់ទេ ការប្រកួតប្រជែងក៏មិនចេះចប់ដែរ។ អ្នកត្រូវត្រៀមខ្លួនគ្រប់វិនាទីអ្នកចាំបាច់ត្រូវបើកភ្នែកនៅពេលដេក។ អ្នកត្រូវបន្តរៀនសូត្រ និងច្នៃប្រឌិត»៕ AFP/PS
