ឧបករណ៍កែច្នៃរ៉ែដែលនឹងត្រូវដំឡើងក្នុងគម្រោងរ៉ែមាសអូរខ្វាវរបស់ក្រុមហ៊ុន Renaissance Minerals (Cambodia) មានទីតាំងនៅខេត្តមណ្ឌលគិរី។ រូបថត សហការី
ភ្នំពេញៈ Renaissance Minerals (Cambodia) Ltd គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL ដែលចុះបញ្ជីនៅផ្សារហ៊ុនប្រទេសអូស្ដ្រាលីបានឱ្យដឹងថា បច្ចុប្បន្នក្រុមហ៊ុនខ្លួនកំពុងស្ថិតក្នុងដំណើរការសាងសង់រោងចក្រកែច្នៃក្នុងគម្រោងរ៉ែមាសអូរខ្វាវ ខេត្តមណ្ឌលគិរី។ បើទោះបីការរីករាលដាលជំងឺកូវីដ ១៩ បានបង្កឱ្យមានបញ្ហាប្រឈមមួយចំនួនក៏ដោយ ក៏ក្រុមហ៊ុននេះរំពឹងថា នឹងអាចទាញយករ៉ែមាសបាននៅក្នុងឆមាសទី ១ ឆ្នាំ ២០២១។
លោក Bernie Cleary ប្រធានផ្នែកប្រតិបត្តិការក្រុមហ៊ុន Renaissance Minerals (Cambodia) Limited បានសរសេរមកកាន់ ភ្នំពេញ ប៉ុស្ដិ៍ ថា ថ្មីៗនេះក្រុមហ៊ុនបាននាំចូលឧបករណ៍សម្រាប់រោងចក្រកែច្នៃ ដែលរួមមានឧបករណ៍ឯកទេសប្រើប្រាស់ក្នុងការរុករករ៉ែ ឧបករណ៍កាយដីធុនធ្ងន់ ឧបករណ៍កម្ទេចថ្ម និងទាញយករ៉ែមាស។
លោកសរសេរថា៖ «រោងចក្ររ៉ែប្រភេទនេះ គឺជាលើកដំបូងដែលត្រូវបានកសាងនៅកម្ពុជា បន្ទាប់ពីរយៈពេលជាច្រើនឆ្នាំនៃការរុករក និងការអនុវត្តតាមដំណើរការដ៏ហ្មត់ចត់នៃការវាយតម្លៃលម្អិតលើផលប៉ះពាល់បរិស្ថាន និងសង្គមត្រូវបានបញ្ចប់ ដើម្បីធានាមិនមានការខាតបង់ចំពោះបរិស្ថាន ឬផលប៉ះពាល់អវិជ្ជមានលើសហគមន៍»។
លោកថ្លែងថា៖ «គម្រោងនេះទទួលបានការអនុញ្ញាតផ្នែកបរិស្ថានពេញលេញពីក្រសួងបរិស្ថានក្នុងឆ្នាំ ២០១៧ និងអាជ្ញាប័ណ្ណរុករករ៉ែឧស្សាហកម្មជាបន្តបន្ទាប់ពីក្រសួងរ៉ែ និងថាមពលក្នុងឆ្នាំ ២០១៨ កិច្ចព្រមព្រៀងវិនិយោគរ៉ែកាលពីចុងឆ្នាំ ២០១៩ ជាមួយក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ»។
លោក Morgan Hart ប្រធានផ្នែកគ្រប់គ្រងក្រុមហ៊ុន Emerald បានឱ្យដឹងនៅក្នុងរបាយការណ៍ហិរញ្ញវត្ថុចុងខែកញ្ញាថា ក្នុងអំឡុងត្រីមាសទី ៣ ក្រុមហ៊ុនបានបន្តជំរុញសកម្មភាពអភិវឌ្ឍន៍នៅគម្រោងរ៉ែអូរខ្វាវជាមួយការរីកចម្រើនក្នុងការពិនិត្យដែកថែប គ្រឿងបង្គុំមេកានិក និងអគ្គិសនីសំខាន់ៗបន្ថែមលើហេដ្ឋារចនាសម្ព័ន្ធទីតាំង ស្របនឹងការកំណត់ពេលវេលាការអភិវឌ្ឍគម្រោងនេះ។
លោកលើកឡើងថា៖ «ការអភិវឌ្ឍរ៉ែមាសអូរខ្វាវត្រូវបានកំណត់ពេលវេលាទាក់ទងនឹងការប្រែប្រួលអាកាសធាតុតាមរដូវ។ ការអភិវឌ្ឍគម្រោងនេះបានរីកចម្រើនគួរឱ្យកត់សម្គាល់ ស្របនឹងការរំពឹងទុកក្នុងអំឡុង «រដូវវស្សា» ចាប់ពីខែមិថុនាដល់ខែតុលា»។
ក្រុមកម្មករថតពីមុខគ្រឿងចក្ររបស់គម្រោងរ៉ែមាសអូរខ្វាវ។ សហការី
លោកថ្លែងថា តុល្យភាពនៃសកម្មភាពការសាងសង់តាមរយៈការអនុវត្តការងារ និងការផលិតរ៉ែមាសលើកដំបូងនឹងត្រូវបញ្ចប់ជាមួយនឹងអត្ថប្រយោជន៍បន្ថែមនៃការកើតឡើងក្នុងអំឡុងពេល «រដូវប្រាំង»។
លោកបានបន្តថា៖ «ស្ដង់ដាពិសេសដែលក្រុមរបស់យើងខិតខំប្រឹងប្រែងនឹងកំណត់នៅក្នុងប្រទេសនេះទាក់ទងនឹងពិធីសារសមរម្យ ដើម្បីធានាបាននូវសុខុមាលភាពរបស់បុគ្គលិក ក្រុមហ៊ុនម៉ៅការ និងភាគីពាក់ព័ន្ធ ជាពិសេសនៅក្នុងអំឡុងពេលបញ្ហាប្រឈមជំងឺកូវីដ ទូទាំងពិភពលោក គឺជាកត្តាដ៏សំខាន់ចំពោះក្រុមហ៊ុន Emerald ក្នុងការអនុលោមតាមគោលការណ៍របស់យើង»។
យោងតាមលោក Bernie អណ្ដូងរ៉ែនេះ នឹងផលិតរ៉ែមាសបាន ១០៦ ០០០ អោនស៍ ក្នុង ១ ឆ្នាំ និងរយៈពេលរុករករ៉ែមាសដំបូងជាង ៧ ឆ្នាំនឹងបង់ពន្ធ និងសួយសារដល់រាជរដ្ឋាភិបាលកម្ពុជា។
យោងតាមរបាយការណ៍ហិរញ្ញវត្ថុក្រុមហ៊ុន Emerald បានបញ្ចប់កាលពីខែកញ្ញា គម្រោងរ៉ែមាសអូរខ្វាវបានទទួលបានមូលនិធិពេញលេញចំនួន ៩៨ លានដុល្លារអាមេរិកសម្រាប់ការអភិវឌ្ឍរ៉ែមាសបន្ត «តាមពេលវេលាតាមថវិកា» និងការផ្ដល់សាច់ប្រាក់ជារួមកាលពីថ្ងៃទី ៣០ ខែកញ្ញា ឆ្នាំ ២០២០ មានប្រហែល ១០៩ លានដុល្លារអូស្ដ្រាលី។ របាយការណ៍នេះបន្តថា៖ «ក្រុមហ៊ុន Emerald នៅតែទទួលបានមូលនិធិពេញលេញ ដើម្បីអភិវឌ្ឍគម្រោងរ៉ែមាសអូរខ្វាវនេះជាមួយនឹងយថាភាពបន្ថែម»៕LA
