បុគ្គលិកធនាគារ Industrial and Commercial Bank of China កំពុងរាប់ប្រាក់យន់។ AFP
ក្រុងប៉េកាំងៈ ធនាគារកណ្ដាលប្រជាជនចិន (PBoC) បានប្រកាសកាលពីថ្ងៃអាទិត្យថាខ្លួននឹងទម្លាក់អនុបាតទុនបម្រុងកាតព្វកិច្ច (RRR) សម្រាប់ធនាគារភាគច្រើនចំនួន ០,៥០ ភាគរយ ដើម្បីបន្ធូរបន្ថយការរឹតបន្តឹងលើការផ្ដល់មូលនិធិសម្រាប់ក្រុមហ៊ុនតូចៗ ខណៈសង្គ្រាមពាណិជ្ជកម្មជាមួយអាមេរិកកើនឡើង។
ធនាគារកណ្តាលចិនបានឲ្យដឹងក្នុងសេចក្ដីប្រកាសព័ត៌មានមួយថា វិធានការកាត់បន្ថយបរិមាណសាច់ប្រាក់ដែលធនាគារត្រូវតែរក្សាទុកធ្វើជាទុនបម្រុងនេះនឹងបញ្ចេញមូលនិធិសរុបចំនួន ៧០០ ពាន់លានយន់ (១០៨ ពាន់លានដុល្លារ) នៅក្នុងធនាគារពាណិជ្ជ និងធនាគារធំៗរបស់រដ្ឋ។
គោលនយោបាយនេះនឹងចូលជាធរមាននៅថ្ងៃទី ៥ ខែកក្កដាមួយថ្ងៃមុនពេលពន្ធនាំចូលថ្មីរបស់អាមេរិកគ្រោងនឹងដកហូតពន្ធលើការនាំចូលរបស់ប្រទេសចិនដែលមានតម្លៃ ៣៤ ពាន់លានដុល្លារ។ ទឹកប្រាក់ ១៦ ពាន់លានដុល្លារផ្សេងទៀតត្រូវបានកំណត់ទិសដៅសម្រាប់ពន្ធនៅពេលអនាគត។
ក្រុមអ្នកវិភាគឲ្យដឹងថា ចក្ខុវិស័យពន្ធនាំចូលរួមជាមួយទិន្នន័យសេដ្ឋកិច្ចមិនរឹងមាំកាលពីខែមុនបានបណ្ដាលឲ្យធនាគារកណ្ដាលចិនចាត់វិធានការបន្ធូរបន្ថយគោលនយោបាយនេះ។
លោក Ting Lu ប្រធានសេដ្ឋវិទូចិនដែលកំពុងបម្រើការងារនៅធនាគារវិនិយោគ Nomura បានឲ្យដឹងក្នុងកំណត់ហេតុមួយថា៖ «វាបញ្ជូនសញ្ញាដ៏រឹងមាំមួយនៃការបន្ធូរបន្ថយរបស់គោលនយោបាយពីសំណាក់ក្រុមប្រឹក្សារដ្ឋ និងធនាគារកណ្តាលចិន»។
លោក Ting Lu មានប្រសាសន៍ថា៖ «យើងជឿជាក់ថាសេដ្ឋកិច្ចរបស់ប្រទេសចិននឹងធ្លាក់ចុះដល់កម្រិតទាបបំផុត ហើយស្ថានការអាចកាន់តែអាក្រក់ខ្លាំង មុនពេលមានភាពប្រសើរឡើងវិញ»។
ធនាគារកណ្ដាលចិនបានឲ្យដឹងថា ធនាគារនឹងប្រើប្រាស់មូលនិធិដោយមិនមានការរឹតបន្តឹង ដោយសារការកាត់បន្ថយអនុបាតទុនបម្រុងកាតព្វកិច្ចនេះ នឹងផ្ដល់ហិរញ្ញប្បទានដល់ក្រុមហ៊ុនតូចៗ និងគាំទ្រដល់ «ការដោះដូរបំណុលទៅជាភាគហ៊ុន»។
និយតករកំពុងជំរុញឲ្យមានការដោះដូរបំណុលទៅជាភាគហ៊ុន ដើម្បីសម្រាលបន្ទុកហិរញ្ញវត្ថុលើក្រុមហ៊ុនជំពាក់បំណុលច្រើនរបស់ប្រទេសចិន។ ប៉ុន្តែរហូតមកដល់ពេលនេះការដោះដូរនានាមិនទាន់ត្រូវបានអនុវត្តឲ្យបានទូលំទូលាយនៅឡើយទេ៕ LA
