ឡូហ្គោរបស់ធនាគារ ANZ នៅការិយាល័យក្រុងស៊ីដនី។ រូបថត AFP
ក្រុងស៊ីដនីៈ មន្ត្រីប្រតិបត្តិជាន់ខ្ពស់ ៦ រូបដែលកំពុងស្ថិតក្នុងមុខតំណែង និងអតីតមកពីធនាគារធំៗដូចជា Deutsche Bank ធនាគារ Citigroup និងធនាគារ ANZ កាលពីថ្ងៃអង្គារត្រូវបានចោទប្រកាន់ដោយព្រះរាជអាជ្ញាសហព័ន្ធប្រទេសអូស្ត្រាលីពីបទប្រព្រឹត្តអំពើឧក្រិដ្ឋលក្ខណៈជាក្រុម តាមរយៈការប្រមូលមូលធនរាប់ពាន់លានដុល្លារ។
ការចោទប្រកាន់នេះធ្វើឡើង ខណៈដែលធនាគារឈានមុខគេរបស់ប្រទេសអូស្ត្រាលីទាំងនោះប្រឈមនឹងការត្រួតពិនិត្យយ៉ាងហ្មត់ចត់ទៅលើឥរិយាបថរបស់ធនាគារទាំងនោះក្នុងគ្រាដែលគណៈកម្មការមួយកំពុងបើកដំណើរការស៊ើបអង្កេតការប្រព្រឹត្តមិនត្រឹមត្រូវនៅក្នុងវិស័យនេះ។
លោក John McLean លោក Itay Tuchman និងលោក Stephen Roberts មកពីធនាគារ Citigroup លោក Michael Ormaechea និងលោក Michael Richardson អតីតមន្ត្រីប្រតិបត្តិរបស់ធនាគារ Deutsche Bank និងលោក Rick Moscati មកពីធនាគារ ANZ ត្រូវបានចោទប្រកាន់ បន្ទាប់ពីការស៊ើបអង្កេតដោយគណៈកម្មការប្រកួតប្រជែង និងអតិថិជនអូស្ដ្រាលី (ACCC)។
ធនាគារ ANZ របស់ប្រទេសអូស្រា្ដលី និងធនាគារ Deutsche Bank និងធនាគារ Citigroup ដែលជាទីប្រឹក្សារបស់ធនាគារ ANZ ប្រឈមនឹងការចោទប្រកាន់ពីបទប្រមូលមូលធនចំនួន ២,៥ ពាន់លានដុល្លារអូស្ដ្រាលី (១,៩ ពាន់លានដុល្លារ) កាលពីឆ្នាំ ២០១៥ ពីក្រុមវិនិយោគិនស្ថាប័នផងដែរ។
គណៈកម្មការ ACCC បានឲ្យដឹងថាការចោទប្រកាន់នេះពាក់ព័ន្ធនឹងការរៀបចំលក្ខណៈជាក្រុមដែលត្រូវបានចោទប្រកាន់ទាក់ទងនឹងការជួញដូរភាគហ៊ុនរបស់ធនាគារ ANZ ដែលបានរៀបចំឡើងដោយធនាគារ Deutsche Bank និងធនាគារ Citigroup។
គណៈកម្មការ ACCC បញ្ជាក់ថាធនាគារ ANZ និងក្រុមមន្ត្រីប្រតិបត្តិទាំងនេះមានការ «ជាប់ទាក់ទងដោយចេតនាក្នុងការប្រព្រឹត្តមួយចំនួន ឬទាំងអស់ដែលត្រូវបានចោទប្រកាន់» បន្ទាប់ពីការទិញភាគហ៊ុនជាលក្ខណៈស្ថាប័ននៅឆ្នាំ ២០១៥។
លោក Rod Sims ប្រធានគណៈកម្មការ ACCC បានឲ្យដឹងក្នុងសេចក្ដីប្រកាសព័ត៌មានមួយដោយមិនផ្ដល់ព័ត៌មានលម្អិតបន្ថែមថា៖ «ការចោទប្រកាន់ធ្ងន់ធ្ងរទាំងនេះគឺជាលទ្ធផលនៃការស៊ើបអង្កេតរបស់ ACCC ដែលកំពុងដំណើរការក្នុងរយៈពេលជាង ២ ឆ្នាំមកនេះ»។
យោងតាមគណៈកម្មការ ACCC ទង្វើប្រព្រឹត្តលក្ខណៈជាក្រុមនេះកើតមានឡើងនៅពេលក្រុមហ៊ុនធ្វើសកម្មភាពរួមគ្នាជាជាងប្រកួតប្រជែងគ្នាទៅវិញទៅមក ដើម្បីបង្កើនប្រាក់ចំណេញរបស់សមាជិកក្នុងក្រុមនេះ។
ធនាគារទាំងអស់ ៣ បានឲ្យដឹងថាពួកគេនឹងប្រឆាំងការចោទប្រកាន់នេះ ដែលគ្រោងនឹងបើកសវនាការនៅក្នុងតុលាការទីក្រុងស៊ីដនីនៅខែក្រោយ៕ LA
